कोरोनाले आमा बितेको चार दिनपछि संक्रमित छोराको पनि मृत्यु- समाचार - कान्तिपुर समाचार

कोरोनाले आमा बितेको चार दिनपछि संक्रमित छोराको पनि मृत्यु

लीला श्रेष्ठ

भक्तपुर — पाटन अस्पतालमा उपचाररत मध्यपुर थिमि नगरपालिका–७, नगदेशका कोरोना संक्रमित ४० वर्षीय व्यक्तिको मृत्यु भएको छ । नगरप्रमुख मदनसुन्दर श्रेष्ठका अनुसार भदौ २ देखि पाटन अस्पतालमा उपचाररत उनको मंगलबार राति मृत्यु भएको हो ।

भदौ १३ गते उनकी ६२ वर्षीया आमाको पनि कोरोना संक्रमणकै कारण पाटन अस्पतालमा मृत्यु भएको थियो । ‘आमालाई दमको समस्या थियो, छोरामा भने अन्य कुनै रोग पत्ता लागेको थिएन,’ श्रेष्ठले भने । ती व्यक्तिकी गर्भवती श्रीमतीसहित परिवारका ६ जनामा पनि कोरोना संक्रमण देखिएको र उनीहरू सबै होम आइसोलेसनमा रहेको श्रेष्ठले जानकारी दिए ।

यससँगै भक्तपुरमा कोरोना संक्रमणबाट मृत्यु हुनेको संख्या ९ पुगेको छ । तीमध्ये पाँच पुरुष र चार महिला छन् ।

प्रकाशित : भाद्र १७, २०७७ १२:५०
प्रतिक्रिया
पठाउनुहोस्

मल पाउने आशमा घण्टौं लाइनमा [तस्बिरहरु]

रमेशकुमार पौडेल

चितवन — धानमा राख्ने युरिया मल पाउने आशले कोरोना कहरमा पनि किसानहरु भीडभाडमा घण्टौं पालो कुरेर बस्न बाध्य छन् । भरतपुर महानगरपालिका–६ गीतानगरमा बुधबार बिहानैदेखि भीडभाड थियो ।

सर्वोदय बहुउद्देश्यीय सहकारीले १२० बोरा युरिया मल बाँड्दै थियो । मल लिन एक हजारभन्दा धेरै स्थानीय बिहान तीन बजेबाटै लाइन लागेका थिए । सहकारीले एक जनालाई १० केजीको दरले मल बाँड्यो । ६ सय जनाले मल पाए । अरु रित्तै फर्किए ।

चितवनमा निषेधाज्ञा छ । भेला, जमघट र हिँडडुल गर्न बन्देज छ । तर कोरोनाको जोखिम मोलेर लामबद्ध भएका किसानहरुमध्ये धेरैले मल नै पाएनन् । पाएकाहरुले पनि आवश्यकताभन्दा एकदम न्यून पाए । सहकारीका सचिव होमनाथ अधिकारी कम्तीमा तीन चार हजार बोरा मल आवश्यक पर्ने बेलामा सय बोरा मल आएको बताउँछन् ।


प्रकाशित : भाद्र १७, २०७७ १२:२४
पूरा पढ्नुहोस्
प्रतिक्रिया
पठाउनुहोस्
×