ताल फुट्दा उजाडियो सैनीबजार- समाचार - कान्तिपुर समाचार

ताल फुट्दा उजाडियो सैनीबजार

मेनुका ढुंगाना

अछाम — कैलाश खोलाको बाढीले जिल्लाकै पुरानो ग्रामीण बजार रामारोशन–५ सैनीबजारको गत मंगलबार एकै रातमा नामोनिसान मेटियो । सैनीका २५ घरमध्ये २२ घर बाढीले बगाएको छ ।

घरसँगै ४ परिवारका १७ जना बेपत्ता भएका थिए । बेपत्तामध्ये शनिबारसम्म ७ जनाको मात्रै शव भेटिएको छ । १० जना अझै फेला परेका छैनन् । बस्ती नै शोकमा डुबेको छ । तत्कालीन सैनी साविकको रामारोशन र भाटाकाटिया गाविसको व्यापारिक केन्द्र हो ।

स्थानीय तह गठनसँगै रामारोशन–५ मा समेटिएपछि सैनीबजारको पनि स्वरूप फेरिएको थियो । चार वर्षमै व्यापारिक चहलपहल बढेपछि स्थानीयले लाखौं लगानी थपेर घर बनाएका थिए । ‘मंगलबारयताका रात छटपटीमै बितिरहेका छन्,’ सैनीबजारका दीर्घराज रोकायाले भने, ‘एकै दिनको बाढीले बजार उजाड बन्यो, हाम्रो उठिबास भयो । अब त आकाशमा बादल देख्दा पनि कतिखेर बाढी आउँछ भन्ने डर लाग्न थाल्यो ।’ सैनीबजारमा रोकाया र खडक बटालाको पसल मात्रै बचेको छ । सैनीबजारसहित कैलाश खोलाको बाढीले करिब २ सय ५० परिवार विस्थापित भएका छन् ।

ताल फुटेर पहिरो

रामारोशन पर्यटकीय क्षेत्रमा १२ वटा ताल छन् । स्थानीयहरूका अनुसार कैलाश खोलाको मुहान नै ती तालहरू हुन् । १२ तालमध्येको गाग्रे ताल फुटेर रोला खोला किमडीखाँदमा पहिरो खस्यो । लगातारको वर्षाले त्यही पहिरो बगेर कैलाश खोलामा भीषण बाढी आएको सैनीबजारका स्थानीय कमान साउदले बताए । ‘ताल फुटेर बाढी आएको हुन सक्छ भन्ने शंका थियो, शनिबार हामी त्यही क्षेत्रमा पुग्यौं, गाग्रे ताल फुटेको छ,’ साउदले भने, ‘माथिबाट ताल फुटेर कैलाश खोलामा उर्लिएपछि सैनीबजार बगायो ।’

उनले अझै पनि निरन्तर वर्षा भइरहेकाले यहाँका धनेसल्ला, सोड्ना जाततोलालगायतका बस्ती बाढीपहिरोको उच्च जोखिममा रहेको बताए । रामारोशन क्षेत्रको सबैभन्दा ठूलो किनिमिनी पाटनलाई समेत उक्त ताल फुटेर असर पारेको उनले बताए । ‘निरन्तर वर्षा भइरह्यो भने सबै पहिरोमा मिसिने सम्भावना छ, पैदल बाटोसमेत छैन,’ उनले भने ।

शुक्रबार स्थलगत अनुगमनमा आएका गृहमन्त्री रामबहादुर थापा, उद्योग, वाणिज्य तथा आपूर्तिमन्त्री लेखराज भट्टलगायतको टोलीसँग पीडित परिवारले आफ्ना समस्या राखेका थिए । विस्थापितको पुनःस्थापनाका लागि सरकारले तत्काल आवास निर्माणसँगै अन्य राहत सहयोग उपलब्ध गराउने मन्त्रीहरूले आश्वासन दिएको स्थानीयले बताए ।

प्रकाशित : भाद्र ७, २०७७ १०:१३
प्रतिक्रिया
पठाउनुहोस्

बाढीले बगायो सैनीबजारका २२ घर 

मेनुका ढुंगाना

सैनीबजार, अछाम — राति मुसलधारे वर्षा भइरहेको थियो । रामारोशन गाउँपालिका–५ को लघु जलविद्युत् पावर हाउसमा अपरेटर ५० वर्षीय दीर्घराज शाह मंगलबार पनि सधैंझै आफ्नो काम सकेर राति १० बजे घर पुगे ।

सैनीबजारस्थित घरमा उनका भाइ, बुहारी, बहिनी, भान्जा, भतिजा गरी ६ जना सँगै बस्थे । उनी भने बजारभन्दा माथिको घरमा बस्थे । कार्यालयबाट फर्केपछि बजारको घरमा बस्ने परिवारसँग भेट गरेर माथिल्लो घर गए ।

‘मध्यराति १२ बजे एक्कासि गड्याङगुडुङ भयो । जमिन पूरै हल्लियो । कहाँ के भयो थाहा भएन । मेरा ६ जनाको परिवारलाई घरैसहित खोलाले बगायो,’ शाह भन्छन्, ‘चिच्यायौं । करायौं र वरिपरिका आफन्तलाई खबर गर्न गयौं । त्यहाँ कोही बाँकी थिएनन् । सबैलाई घरसँगै कैलाश खोलाले बगाइसकेको रहेछ ।’ बुधबार दिउँसो घटनास्थल पुग्दा उनी कैलाश खोलालाई हेरेर टोलाइरहेका भेटिए । ‘पूरै घर बगायो । अहिले हेर्दा यहाँ पहिले घर कहाँ थियो पनि खुट्याउन नसकिने भएको छ,’ उनले भने, ‘अहिलेसम्म केही अत्तोपत्तो लागेको छैन, हाम्रो बिचल्ली भयो ।’ सैनीबजार पसेको कैलाश खोलाको बाढीले शाहको परिवारसँगै २२ घर बगायो । घटनामा परेका ११ जनाको अत्तोपत्तो छैन ।

रामारोशन गाउँपालिकाको अल्लेडी, खालबजार, मुजाबगर, गज्जडलगायतका बस्ती यसअघि नै बाढीको जोखिममा भए पनि सैनीबजारमा त्यस्तो जोखिम नठानिएको स्थानीय पूर्णबहादुर साउदले बताए । ‘कैलाश खोलाभन्दा सैनीबजार उचाइमा छ । यसरी बाढी आउला भनेर कल्पना पनि थिएन । अझै पनि बाढीले क्षतविक्षत बनायो भन्ने विश्वास गर्न सकिएको छैन,’ उनले भने ।

बाढीले दर्नाको पक्की पुलसमेत बगेको स्थानीय पुष्प विष्टले बताए । कैलाश खोलाको बाढीले छेउछाउका घर, पसल र खेत बगाएको उनले बताए । विष्टका अनुसार दर्नाको सबैभन्दा बढी धान उत्पादन हुने नगरर्नाको कोसेडा खेत बगर बनेको छ । ठाउँ ठाउँमा बाढीले सडक पनि बगाउँदा उद्धारकर्मी तत्काल पुग्न सकेनन् । सदरमुकाम मंगलसेनदेखि करिब ४० किमि पूर्वको घटनास्थलमा बुधबार दिउँसोमात्रै उद्धार टोली पुगेको थियो ।

नेपाली सेनाको हेलिकप्टरमा प्रमुख जिल्ला अधिकारी गोकर्णप्रसाद उपाध्याय नेतृत्वको टोली सैनीबजार पुगेको हो । घाइतेको उद्धार र बेपत्ताको खोजीका लागि सेना, सशस्त्र र प्रहरी गरी दुई सय सुरक्षाकर्मीसहितको टोली परिचालन भएको प्रजिअ उपाध्यायले बताए । ‘सडक ठाउँ ठाउँमा कतै बगेको छ, कतै पहिरोले बन्द गरेको छ,’ उनले भने, ‘खोजी र उद्धारमा सडकमार्गबाट आउनै सम्भव थिएन ।’

रामारोशनमा बाढीले घरसँगै बगाएकामध्ये ६ जनाको शव बुधबार दिउँसो फेला परेको छ । ‘६ मध्ये ३ जनाको सनाखत हुन बाँकी छ । ११ जना अझै बेपत्ता छन् । खोजी जारी छ,’ डीएसपी योगेन्द्रसिंह थापाले भने । उनका अनुसार ४ जनाको शव बान्नीगढी जयगढ गाउँपालिका–६ दर्नाको कोसेडा क्षेत्र र २ जनाको शव मंगलसेन नगरपालिका–३ रलेको लमतणा र सेरीमा भेटिएको हो । मृत्यु हुनेमा सैनीबजारका १२ वर्षीया नवीन साउद, ३२ वर्षीया गौरी शाह र ४८ वर्षीया चन्द्र साउद छन् । अन्य तीन जनाको सनाखत हुन बाँकी छ ।

बाढीले सैनीबजारका २२ घर, रामारोशन क्षेत्रका ९ झोलुंगे पुल, एउटा पक्की पुल, गाउँपालिकाको एउटा एम्बुलेन्स, ५ वटा लघु जलविद्युत्का पावर हाउस र ४ वटा मोटरसाइकल बगाएको रामारोशन गाउँपालिकाका अध्यक्ष झंकर साउदले बताए । ‘कैलाश खोला आसपासका खेतीयोग्य जमिन सबै बाढीले बगाएको छ । गाउँपालिका पूरै चिराचिरा भएको छ । ‘अझै क्षतिको सबै विवरण सबै आइसकेको छैन,’ उनले भने, ‘दर्ना पुलदेखि रामारोशनसम्म २५ ठाउँभन्दा बढी सडक बाढीले बगाएको छ ।’ विपद्मा परेका स्थानीयलाई अछाम रेडक्रसले राहत वितरण गरेको उनले बताए । कम्बल, त्रिपाल, भाँडावर्तन डोरीलगायतका सामग्री वितरण गरिएको छ ।

प्रकाशित : भाद्र ४, २०७७ ०७:५०
पूरा पढ्नुहोस्
प्रतिक्रिया
पठाउनुहोस्
×