कोरोनाबाट २४ घन्टामा ८ जनाको मृत्यु, मृतकको संख्या ९१ पुग्यो- समाचार - कान्तिपुर समाचार

कोरोनाबाट २४ घन्टामा ८ जनाको मृत्यु, मृतकको संख्या ९१ पुग्यो

कान्तिपुर संवाददाता

काठमाडौँ — नेपालमा कोरोना भाइरस संक्रमणबाट थप ८ जना को मृत्यु भएको छ । कोरोना संक्रमणबाट पछिल्लो २४ घन्टामा ८ को मृत्यु भएको स्वास्थ्य तथा जनसंख्या मन्त्रालयले बुधबार औपचारिक रुपमा पुष्टि गरेको हो ।

ललितपुरस्थित किस्ट अस्पतालमा उपचाररत काठमाडौंको टेकुकी ७८ वर्षीया महिलाको कोरोना संक्रमणका कारण मृत्यु भएको छ । साउन २६ गतेदेखि किस्ट अस्पतालमा उपचाररत उनी मधुमेह, रक्तचापका समस्याबाट पीडित थिइन् ।

त्यसैगरी धादिङ निलकण्ठ नगरपालिका १४ निवासी ३२ वर्षीय पुरुषको साउन २७ गते ह्याम्स अस्पतालमा मृत्यु भएको छ । उनी क्षयरोगी थिए । २७ गते कोरोना पुष्टि भएका उनलाई भेन्टिलेटरमा राखेर उपचार गरिएको थियो ।

धनुषा जिल्ला जनकपुर उपमहानगरपालिका १ निवासी ७१ वर्ष पुरुषको मेडिसिटी अस्पतालमा उपचारका क्रममा मृत्यु साउन २८ गते मृत्यु भएको हो । उनलाई साउन ७ गते कोरोना पुष्टि भएको थियो ।

त्यसैगरी साउन १८ गतेदेखि पाटन अस्पतालमा उपचार गराइरहेकी धनुषा जिल्ला जनकपुर उपमहानगरपालिका ८ की ३८ वर्षीया महिलाको कोरोना संक्रमणबाट साउन २८ गते मृत्यु भएको हो । उनलाई साउन १८ गते कोरोना पुष्टि भएको थियो ।

त्यसका साथै सप्तरी जिल्ला डाक्नेश्वरी नगरपालिका ८ घर भएका ७२ वर्षीय पुरुषको साउन २७ गते मृत्यु भएको छ । उनी ४ दिनअघि ज्वरो आएर स्वाब संकलन गर्दा साउन २७ गते कोरोना पुष्टि भएको थियो । उनी थाइरोड तथा मधुमेहका तथा मुटुरोगी थिए ।

बीपी कोइराला स्वास्थ्य विज्ञान प्रतिष्ठानमा उपचारकाा क्रममा मोरङ बुढीगंगा गाउँपालिका–२ का ५५ वर्षीय पुरुषको साउन २८ गते कोरोना संक्रमणबाट मृत्यु भएको हो । ज्वरो खोकी र स्वासप्रश्वासमा समस्या आएपछि उनलाई साउन २६ गते प्रतिष्ठानमा उपचारका लागि ल्याइएको थियो ।

त्यसैगरी कपिलवस्तु नगरपालिका २ तौलिहवा निवासी ४२ वर्षीय पुरुषको साउन २८ गते कोरोनाका कारण मृत्यु भएको हो । ज्वरो तथा निमोनिया भइ उनी साउन २५ गते बुटवलको कोरोना विशेष अस्पताल भर्ना भएका थिए । उनमा साउन २७ गते कोरोना पुष्टि भएको थियो ।

बारा जिल्ला कलैया उपमहानगरपालिका निवासी ७५ वर्षीय पुरुषको साउन २८ गते किष्ट मेडिकल कलेजमा उपचारको क्रममा मृत्यु भएको छ । उनी साउन २६ गते अस्पताल भर्ना भएका थिए । साउन २८ गते कोरोना पुष्टि भएका उनी मिर्गौला तथा दमका रोगी थिए ।

यो सँगै नेपालमा कोरोना संक्रमणबाट मृत्यु हुनेको संख्या ९१ पुगेको छ ।

प्रकाशित : श्रावण २८, २०७७ १७:२६
प्रतिक्रिया
पठाउनुहोस्

धादिङका कोरोना संक्रमितको मृत्यु भएपछि जिल्ला सदरमुकाममा लकडाउन

हरिहरसिंह राठौर

धादिङ — सदरमुकामकै सिरानबजारका ३९ वर्षीय  होटल व्यवसायीको मृत्यु पछि कोरोना संक्रमण पुष्टिभएपछि जिल्ला सदरमुकाम पुन: लकडाउन गरिएको छ ।

तस्बिरः सटरस्टक ।

नीलकण्ठ नगरपालिका १४ छाप निवासी ती व्यवसायी बस चालेक समेत थिए । लकडाउन खुकुलो भएपछि उनी दैनिक जसो धादिङ काठमाडौं सिमाना खत्री पौवासम्म यात्रु ओसार्ने गरेका थिए ।

कमलपित्त लगायत रोगको उपचार गराइ रहेका उनलाई आइतबार उच्च ज्वरो आएपछि जिल्ला अस्पतालबाट थप उपचारका लागि ह्याम्स अस्पताल काठमाडौंमा भर्ना भएका थिए । मंगलबार उनको कोरोनाका कारण अस्पतालमै मृत्युभएपछि सेनाको टोलीले शव व्यवस्थापन गरेको नीलकण्ठ नगरपालिकाका उपप्रमुख मनराज भण्डारीले बताए ।

बुधबार बिहान बसेको जिल्ला कोरोना नियन्त्रण तथा व्यवस्थापन समितीको बैठकले सदरमुकाम लकडाउन गर्ने निर्णय गरेको हो ।

एक हप्ताको अवधीमा धादिङ सदरमुकाममा ५ जना र जिल्लाका अन्य स्थानमा १० जनालाई कोरोना संक्रमण देखिएपछि जिल्ला सदरमुकाम एक हप्ताका लागि पूर्ण बन्द गर्ने निर्णय भएको भण्डारीले बताए ।

प्रमख जिल्ला अधिकारी अस्मान तामाङले भदौ ३ गतेसम्मका लागि अत्यावसकीय सेवा बाहेक सेवाग्राहीको भीड हुने अन्य सबै सार्वजनिक सेवाहरु बन्द गर्ने निर्णय गरिएको बताए ।

हाल जिल्लाका १३ वटै स्थानीय तहमा २५ जना कोरोना संक्रमित देखिएको छ । ती मध्ये जिल्लाको आइसोलेसनमा १२ जना मात्रै रहेका र अन्य १३ जना राजधानीतिरै उपचार गराइरहेको जिल्ला जनस्वास्थ्य अधिकृत डा भुवन पौडेलले बताए ।

पृथ्वीराजमार्गको गल्छी बजारमा ३ जनालाई कोरोना संक्रमण देखिएपछि उक्त बजार एक हप्तालाई सिल गरिएकोछ । आदमघाट बजारमा एक जनालाई संक्रमण देखा परेपछि गत हप्ता देखि बजार बन्द गरिएको छ ।

प्रकाशित : श्रावण २८, २०७७ १७:०८
पूरा पढ्नुहोस्
प्रतिक्रिया
पठाउनुहोस्
×