एकताका लागि साझा र विवेकशीलले बनाए वार्ता समिति 

आचार्य र खनालले छोडे साझा पार्टी
कान्तिपुर संवाददाता

काठमाडौँ — साझा पार्टी र विवेकशील नेपाली दलले पुन: एकताका लागि वार्ता समिति बनाएका छन् । साझाले आइतबार बसेको केन्द्रीय समितिको अनलाइन बैठकले विचार मिल्ने पार्टी तथा समूहसँग एकीकरणका लागि भन्दै वार्ता समिति बनाएको हो । वार्ता टोलीमा समीक्षा बाँस्कोटा, केशव दाहाल, किरणकृष्ण श्रेष्ठ सदस्य छन् ।

बैठकका निर्णयबारे साझाका सहप्रवक्ता शरदराज पाठकले भने, 'पार्टीले समान सोच भएका पार्टी, समूह र व्यक्तिहरुसँग एकीकरणको प्रक्रियालाई अगाडि बढाउन वाग्मती प्रदेश संयोजक समीक्षा बाँस्कोटा, संगठन विभाग प्रमुख केशव दाहाल तथा केन्द्रीय सदस्य किरणकृष्ण श्रेष्ठ सम्मिलित तीन सदस्यीय राजनीतिक संवाद समिति गठन गर्ने निर्णय गर्‍यो ।'

विवेकशीलले यसअघि नै ३ सदस्यीय वार्ता टोली बनाएको थियो । समितिमा रमेश पौडेल, निर्देश सिलवाल र रन्जु दर्शना छन् ।

साझाको २६ गते बसेको सचिवालय बैठकमै विवेकशील लगायतसँग एकता गर्ने दुई प्रस्ताव पेस भएको थियो । उक्त बैठकमा प्रवक्तासमेत रहेका केन्द्रीय सदस्य सूर्यराज आचार्य र मुमाराम खनालले एकताका लागि अहिले पार्टी संरचना भंग गरेर संयोजकमात्र राख्ने र अन्य नेताहरुले एकताका लागि वार्ता टोली बनाउने प्रस्ताव राखेका थिए । वार्ता टोली बनाउने प्रस्ताव आइतबारको बैठकबाट पारित भएको हो ।

आचार्य र खनालले छोडे साझा पार्टी

पार्टी पुनर्संरचनाका लागि आफूहरुले राखेको प्रस्ताव अस्वीकृत भएपछि साझाका केन्द्रीय सदस्यद्वय सूर्यराज आचार्य र मुमाराम खनालले पार्टी परित्याग गरेका छन् । उनीहरुले पार्टीमा संयोजकमात्रै राखेर अन्य संरचना खारेज गर्दै साझा पार्टी निर्माणको अभियानमा लाग्‍नुपर्ने प्रस्ताव राखेका थिए । तर आइतबारको केन्द्रीय समिति बैठकले उक्त प्रस्ताव अस्वीकृत गरेपछि आचार्य र खनालले पार्टी नै छाडेका हुन् । तर सहप्रवक्ता पाठकले आचार्यले पार्टी नत्यागेको र खनालले राजीनामा दिएको दाबी गरे । 'पार्टीका केन्द्रीय सदस्य तथा प्रवक्ता सूर्यराज आचार्यले पार्टीको सबै जिम्मेवारी त्याग गरेर पार्टीको संरचनाभन्दा बाहिर बसेर वैकल्पिक पार्टी निर्माणमा भूमिका निर्वाह गर्नु भएको प्रस्तावलाई आजको बैठकले स्वीकृत गर्‍यो ।त्यसैगरी केन्द्रीय सदस्य मुमाराम खनालले व्यक्तिगत कारणहरु जनाइ दिनुभएको राजीनामा स्वीकृत गर्‍यो ।'

उनका अनुसार केन्द्रीय सदस्यद्वयले पार्टी निर्माणदेखि पुर्‍याएको योगदानको कदरस्वरुप आइतबारको केन्द्रीय समिति बैठकबाट धन्यवाद प्रस्ताव पारित गरेको छ ।

यी दुई पार्टी एकताको १७ महिनापछि २०७५ पुस अन्तिम साता विभाजित भएका थिए ।

प्रकाशित : असार २८, २०७७ २१:०२
प्रतिक्रिया
पठाउनुहोस्

अनुगमनको सुन गायब प्रकरण : वाणिज्यका दुई पूर्वनिर्देशकसहित ३ जनालाई भ्रष्टाचार मुद्दा

राजु चौधरी

काठमाडौँ — अख्तियार दुरुपयोग अनुसन्धान आयोगले वाणिज्य आपूर्ति तथा उपभोक्ता हित संरक्षण विभागका दुई पूर्वनिर्देशकसहित ३ जनामाथि विशेष अदालतमा भ्रष्टचार मुद्दा दायर गरेको छ । 

बजार अनुगमन र परीक्षण गर्न ल्याइएको सुनमा यथार्थ विवरण नराखी हिनामिनाको अभियोगमा आरोप पत्र दायर गरिएको हो । आयोगले तत्कालीन विभागका अनुगमन शाखा निर्देशक लक्ष्मण श्रेष्ठ, हरिनारायण बेल्वासे र नायब सुब्बा रामबहादुर थापा मगरविरुद्ध मुद्दा दायर गरेको हो । हाल श्रेष्ठ कृषि विभागमा कार्यरत छन् । बेल्वासे राष्ट्रिय योजनामा छन् । मगर भने सेवानिवृत भइसकेका छन् ।

आयोगका अनुसार श्रेष्ठले २०७३ माघ ७ गते न्युरोडको नोज पिन हाउस, २०७३ चैत ३० गते पोखरामा रहेको दलबहादुर एण्ड सुनचाँदी पसल, दि युनाइटेड ज्वलेलर्स प्रालि, गोरखा एण्ड बराह ज्वेलरी इण्डष्ट्रिज प्रालि, फेवा सन्तोष सुनचाँदी दोकान र अर्जुन पुम्दी भूम्दी सुनचाँदी पसलमा अनुगमन गरेको थियो । त्यसक्रममा संकलन गरिएको गहनाहरुका सम्बन्धमा जिल्ला प्रशासन कार्यालय कास्कीबाट उल्लेखित पसलका गहना जफत हुने ठहर्छ भन्ने फैसला हुँदासमेत फिर्ता नगरेको आयोगले जनाएको छ । ‘फैसला हुँदासमेत उक्त सरकारी सम्पत्ति सम्बन्धित कार्यालयमा फिर्ता नगरी सरुवा भएपश्चात् पनि उक्त गहनाहरु नबुझाई आफ्नो साथमा राखी हिनामिना गरेको,’ अख्तियारका प्रवत्ता प्रदीपकुमार कोइरालाले जारी गरेको विज्ञप्तिमा उल्लेख छ ।

विभागका तत्कालीन निर्देशक बेल्वासेले पनि काठमाडौंमा रहेको सूर्यबहादुर एण्ड सन्स ज्वेलर्समा अनुगमन गरी संकलन गरिएको गहनाहरुका सम्बन्धमा काठमाडौं जिल्ला अदालतबाट अभियोग दाबी नपुग्ने गरी फैसला हुँदा समेत उक्त सरकारी सम्पत्ति फिर्ता नगरेको जनाएको छ ।

सरुवापश्चात पनि उक्त पसलमा फिर्ता नगरी हिनामिना गरेको आयोगको विज्ञप्तिमा छ । यस्तै, तत्कालीन निदेशक श्रेष्ठकै नेतृत्वमा न्यूरोडको विभिन्न गहना पसलमा अनुगमन र सकलन गरिएको गहना नासु (हाल सेवानिवृत) रामबहादुर थापा मगरले हिनामिना गरेको उल्लेख छ ।

प्रकाशित : असार २८, २०७७ २०:२५
पूरा पढ्नुहोस्
प्रतिक्रिया
पठाउनुहोस्
×