नेपालमा राजनीतिक हिंसा र आक्रमण कायमै : अमेरिका 

कान्तिपुर संवाददाता

काठमाडौँ — अमेरिकाले नेपालमा सन् २०१९ मा कुनै पनि अन्तर्राष्ट्रिय आतंकवादी घटना नभए पनि अन्य राजनीतिक हिंसा र आक्रमण कायमै रहेको जनाएको छ । 

अमेरिकाको ब्यूरो अफ काउन्टर टेररिज्मले जारी गरेको ‘कन्ट्री रिर्पोट अन टेररिज्म–२०१९’ मा नेपालमा कमस्तरमा राजनीतिक हिंसा र ठूलो पूर्वाधार, सरकारी अधिकारी तथा स्थानीय रुपमा राजनीतिक दलहरुमा आबद्ध अधिकारीहरुमा आक्रमण भएको उल्लेख गरिएको छ ।

सन् २०१९ मा भएका उप–निर्वाचन वरपर मतदातालाई डराउन केही घटना राजनीतिलाई केन्द्रित गर्दै गरिएको थियो । त्यस्ता धेरैजस्तो आक्रमणलाई नेत्रविक्रम चन्द ‘विप्लव’ नेतृत्वको कम्युनिष्ट पार्टीले गराएको निष्कर्ष रिर्पोटमा छ । चन्द नेतृत्वको पार्टी सन् २०१५ मा पूर्व नेपाल कम्युनिष्ट पार्टी (माओवादी केन्द्र) बाट फुटेर गएको हो । ‘नेपालको सुरक्षा निकायले लगातार रुपमा विप्लव समूहलाई निगरानी गरिरहेको छ,’ उक्त रिर्पोटमा भनिएको छ ।

भारततर्फ खुला सीमा, काठमाडौंमा देशको एक मात्र अन्तर्राष्ट्रिय विमानस्थल र अपर्याप्त सुरक्षा प्रोटोकलहरुका कारण नेपाल अन्तर्राष्ट्रिय आतंककारीहरुका लागि ट्रान्जिट वा रुटको रुपमा प्रयोग हुन सक्ने पनि रिपोर्टमा उल्लेख गरिएको छ ।

प्रकाशित : असार १२, २०७७ १९:०९
प्रतिक्रिया
पठाउनुहोस्

विरोधपछि हटाइयो ओली र दाहालका लागि राखिएको सोफा

भीम रावलको प्रश्न- कम्युनिष्ट पार्टीको बैठकमा कुर्सीमै असमानता किन ?
कान्तिपुर संवाददाता

काठमाडौँ — सत्तारुढ नेकपाको स्थायी कमिटी बैठकमा नेताहरुले विरोध गरेपछि दुई अध्यक्षका लागि राखिएको सोफा हटाइएको छ । बैठकमा प्रधानमन्त्री एवं अध्यक्ष केपी शर्मा ओली र अर्का अध्यक्ष पुष्पकमल दाहाल बस्नका लागि मञ्चमा सोफा राखिएको थियो । अन्य नेताहरुका लागि कुर्सीको व्यवस्था थियो । 

दोस्रो दिनको बैठकमा नेता भीम राववले बैठक कक्षको मञ्चमा दुई अध्यक्षका लागि छुट्टै सोफा किन राखेको भनेर प्रश्न गरेका थिए । नेता राववले कम्युनिष्ट पार्टीको बैठकमा कुर्सीमै असमानता किन भनेर प्रश्न गरेका थिए । यो सामन्तवादी प्रवृति भएको भन्दै उनले हटाउन माग गरे । उनले सोफा हटाउन माग गर्दा सबैले ताली बजाएर समर्थन गरेका थिए । त्यसलगत्तै अध्यक्षद्वयका लागि मञ्चमा राखिएका सोफा हटाईएको एक नेताले जानकारी दिए । त्यसपछि अन्य सदस्यलाई जस्तै अध्यक्षका लागि कुर्सीको व्यवस्था त्यहाँ भएको थियो ।

बुधबार बैठक सुरुवातका दिन वरिष्ठ नेता माधवकुमार नेपालले दुई अध्यक्षभन्दा पछि राखेको भन्दै कार्यालय सचिवलाई आफू बस्ने कुर्सी अगाडि सार्न लगाएका थिए । शुक्रबारबारको बैठकमा प्रधानमन्त्री ओली उपस्थित थिएनन् ।

नेकपाको माघमा बसेको केन्द्रीय कमिटी बैठकमा पनि नेताहरुले विरोध गरेपछि मन्ञ भित्तामा टाँसिएका दुई अध्यक्षका तस्बिर बैठकको बीचमै हटाएका थिए ।

प्रकाशित : असार १२, २०७७ १८:५४
पूरा पढ्नुहोस्
प्रतिक्रिया
पठाउनुहोस्
×