संघीय र प्रदेश सांसदहरूलाई विकास आयोजनामा भूमिका दिने विधेयक पारित
काठमाडौँ — विकासका आयोजना तर्जुमा गर्दा संघीय संसद्का सदस्य र प्रदेश सभा सदस्यहरूको भूमिका हुनुपर्ने व्यवस्थासहितको संघ, प्रदेश र स्थानीय तह (समन्वय तथा अन्तरसम्बन्ध) विधेयक प्रतिनिधिसभाबाट पारित भएको छ ।
सरकारी अधिकारीले सांसदहरू विकास निर्माणमा संलग्न हुन नहुने भन्दै विरोध गर्दै आएपनि राज्यव्यवस्था तथा सुशासन समितिले नेपाल सरकारले निर्माण गर्ने परियोजनामा संघीय सांसदरहरू र प्रदेश सरकारको बजेटका योजना तर्जुमामा प्रदेश सभा सदस्यहरूको भूमिका हुने व्यवस्थासहित विधेयक पारित भएको हो ।
प्रतिनिधिसभाको मंगलबारको बैठकले पारित गरेको संघ, प्रदेश र स्थानीय तह (समन्वय तथा अन्तरसम्बन्ध) विधेयक, २०७७ लाई बहुमतले पारित गरेको हो ।
विधेयकमा संघीय सरकारले आयोजना तर्जुमा गर्दा 'संघीय सांसदहरूको परामर्शकारी भूमिका रहनेछ' भन्ने लेखिएको छ । त्यस्तै, प्रदेशस्तरीय पर्ने र प्रदेशबाट कार्यान्वयन हुने आयोजनामा 'प्रदेश सभा सदस्यहरूको परामर्शकारी भूमिका रहनेछ' लेखिएको छ ।
योजना आयोगले आयोजनाको छनोट गर्नुपर्ने र सांसदहरूले तिनको कार्यान्वयन भयो कि भएन तथा आयोजनाको वितरण न्ययोचित भयो कि भएन भनेर अनुमगन र मूल्यांकन गर्ने भूमिकामा सांसदहरू रहनुपर्ने विधेयक प्रस्तुतकर्ता प्रधानमन्त्री तथा मन्त्रिपरिपषद्को कार्यालयका अधिकारीको भनाइ थियो । तर सांसदहरूले आफूहरूलाई विकास आयोजना छनोटमा सहभागी नगराएमा जनताबाट अलग्गिनुपर्ने अवस्था आउने भन्दै अडान राखेका थिए ।
प्रधानमन्त्री कार्यालयका सचिव धनराज ज्ञवालीले सांसदहरूले योजना आयोगले गर्ने कामका लागि अडान राख्न नहुने र त्यस किसिमको कानुन बनाउन पनि नसकिने बताएका थिए । तर, उक्त विधेयकमा नेकपाका सांसदहरूको अडान र प्रमुख प्रतिपक्षी कांग्रेस सांसदहरूको मौन समर्थनमा सांसदहरूलाई विकास आयोजनामा भूमिका दिने व्यवस्था राखिएको थियो ।
प्रतिनिधिसभाको आजको बैठकमा प्रधानमन्त्री केपी शर्मा ओलीको तर्फबाट कानुन, न्याय तथा संसदीय मामिलामन्त्री शिवमाया तुम्बाहाङ्फेले उक्त विधेयक पारित गरियोस् भन्ने प्रस्ताव प्रस्तुत गरेकी थिइन् ।
विधेयकका सम्बन्धमा सांसदहरूले उठाएको प्रश्नको जवाफ दिँदै मन्त्री तुम्बाहाङ्फेले संविधानमै व्यवस्था भएको संघ, प्रदेश र स्थानीय तहको अधिकार उपयोग र प्रभावकारिताका लागि विधेयकले प्रावधान समेटेको र यसको कार्यान्वयनका लागि महत्वपूर्ण भूमिका खेल्ने बताएकी थिइन् । विधेयकले तीन तहको सरकारको अन्तरसम्बन्धलाई व्यवस्थित गर्न विशेष ध्यान दिएको उनको भनाइ थियो ।
विधेयकमाथिको सैद्धान्तिक छलफलका क्रममा सांसद पुष्पा भुसालले तीन तहबीच राजनीतिक जटिलता र संवैधानिक झन्झटलाई ननिम्त्याउने प्रावधान कानुनमा राख्नुपर्ने सुझाव दिएकी थिइन् । तीन वर्षदेखि अभ्यासमा रहेको संघीय शासन प्रणालीलाई थप प्रभावकारी बनाई कार्यान्वयनका लागि नयाँ कानुनले सहयोग पुर्याउने सांसद महेश बस्नेतको भनाइ थियो ।
सांसद उमा रेग्मीले जिल्ला समन्वय समितिको भूमिकालाई प्रभावकारी बनाउने व्यवस्था विधेयकमा समेट्न माग गरेकी थिइन् भने तीन तहको सरकारलाई थप प्रभावकारी बनाउन विधेयकले सहयोग पुग्ने प्रेम सुवालको धारणा थियो ।
विकास आयोजना तर्जुमा गर्न सांसदहरूको भूमिमा राख्न सफल भएकोमा राज्यव्यवस्था समितिका सांसदहरूलाई धन्यवाद दिँदै सांसद रामकुमारी झाँक्रीले संघीय शासन व्यवस्थालाई थप प्रभावकारी बनाउन र केन्द्रदेखि तल्लो तहसम्मको विकास कार्यक्रमलाई परिणाममुखी बनाउन विधेयक उपयोगी हुने बताइन् ।
राष्ट्रिय सभामा उत्पत्ति भएको यो विधेयक प्रतिनिधिसभाबाट पास भएको सूचना राष्ट्रिय सभामा पठाइनेछ । त्यसपछि उक्त विधेयक प्रमाणीकरणका लागि राष्ट्रपतिकहाँ पठाइनेछ । राष्ट्रपतिले प्रमाणीकरण गरेपछि लागु हुनेछ ।
प्रकाशित : असार ९, २०७७ १८:४३