रिपोर्ट माग्दा प्रहरीको लाठी

यस्तै पीडा सहन नसकेकै कारण जिल्लाका विभिन्न क्वारेन्टाइन र आइसोलेसनमा बसेका संक्रमित र शंकास्पद व्यक्तिहरु ‘विद्रोह’ गर्ने अवस्थामा पुगेका छन् । शनिबार क्वारेन्टाइनबाट जबरजस्ती निस्किन खोज्दा नारायण नगरपालिकाको त्रिभुवन मावि र डुंगेश्वर गाउँपालिकाको मटेलास्थित सीता माविमा संक्रमित–प्रहरीबीच झडप भयो । चार जना घाइते भएका छन् । ‘क्वारेन्टाइनमा बसेको एक महिना पुग्न लागिसक्यो, रोगको कुनै लक्षण देखिएको छैन, रिपोर्ट पनि आउँदैन, घरका मान्छेले चिन्ता मानिरहेका छन्,’ दिनेशले भने, ‘हाम्रो पीडा कसले सुन्ने ? भेडाबाख्राजस्तो भएर कहिलेसम्म बसिरहनुपर्ने ?’

१५ वर्षीय एक संक्रमितलाई दुई हप्तासम्म नारायण क्याम्पसको क्वारेन्टाइनमा राखियो । त्यसपछि फेरि त्रिभुवन माविमा ल्याएर राखिएको छ । एक साताअघि नै दोस्रोपटक स्वाब संकलन गरेर पठाए पनि अहिलेसम्म रिपोर्ट नआउँदा बाध्य भएर प्रदर्शनमा उत्रिनुपरेको उनले बताए । ‘हामीलाई त आइसोलेसन भनेको के हो थाहै छैन, क्वारेन्टाइनमै कहिले यता कहिले उता गरिरहेका छौं,’ उनले भने, ‘छिटो छुटकारा दिनुहोस् भनेर माग गर्दा प्रहरीको लाठी खानुपरेको छ ।’ प्रहरीले लाठी र बुटले हान्दा टाउको र ढाडमा चोट लागेको छ ।

प्रदेशको सामाजिक विकास मन्त्रालयका अनुसार आइतबारसम्म कर्णालीमा ९ सय ६७ जनामा संक्रमण पुष्टि भएकमोमा दैलेखका मात्र ५ सय ३८ जना छन् । संक्रमितहरुलाई विभिन्न विद्यालयका क्वारेन्टाइनमै राखिएको छ । संक्रमण पुष्टि भएको तीन साता बिते पनि उनीहरुको दोस्रोपटकको रिपोर्ट आइसकेको छैन । यसले गर्दा उनीहरु आत्तिएका छन् । एक साताअघि पठाइएका स्वाबको रिपोर्टसमेत आइसकेको छैन ।

प्रहरीसँगको झडपमा घाइते भएकाहरुले उपचार गर्ने नाममा आफूहरुलाई थुन्ने काम भएको उनीहरु बताउँछन् । संक्रमण नभएकालाई पनि संक्रमित बसेकै क्वारेन्टाइनमा राखिँदा जोखिम झनै बढेको छ । सदरमुकामको त्रिभुवन माविमा ४३ जना बसिरहेका छन् । तीमध्ये २९ जना संक्रमित हुन् । ‘हामीलाई संक्रमण छ कि छैन भन्ने थाहै छैन, तर संक्रमित बसिरहेको क्वारेन्टाइनमा राखिएको छ,’ शनिबार घाइते भएका एक युवाले भने, ‘यस्तो जोखिममा कसरी बस्न सकिन्छ ?’

दैलेखका ११ वटै स्थानीय तहमा संक्रमण फैलिएको छ । सबैभन्दा बढी नारायण नगरपालिकामा १ सय ९६ जना संक्रमित छन् । प्रमुख जिल्ला अधिकारी युवराज कट्टेलका जेठ महिनामा मात्र करिब १३ हजार व्यक्ति आएकोमा आइतबारसम्म ६ हजार १५ जना क्वारेन्टाइनमा बसिरहेका छन् । १ हजार १ सय ३६ स्वाबको नमुनाको रिपोर्ट अझैसम्म आएको छैन । एक हप्ताअघि नै पठाइएको रिपोर्ट नआउँदा मान्छेहरुलाई सम्झाइबुझाइ गर्न निकै समस्या भएको उनले बताए । ‘स्वाबको रिपोर्ट समयमै आइदिएको भए यस्तो अवस्था आउने थिएन, रिपोर्ट नआउँदा निकै अन्योल हुने गरेको छ,’ उनले भने, ‘निकै सम्झाइबुझाई गर्दा पनि उग्र भएर बाहिर निस्किन थालेपछि झडपको अवस्था आएको छ ।’

जिल्ला प्रहरी प्रमुख डीएसपी हरिबहादुर वलीले समयमै रिपोर्ट नआउँदा उत्पन्न समस्याले सुरक्षा जोखिमसमेत बढाएको बताए । संक्रमितहरु आफू बसिरहेको स्थानबाट बाहिर निस्केर बजारमा हिँड्न थालेपछि बल प्रयोग गर्दा झडप भएको उनको भनाइ छ ।