दशगजाबाट सार्‍यो भारतले सुरक्षा पोस्ट- समाचार - कान्तिपुर समाचार

दशगजाबाट सार्‍यो भारतले सुरक्षा पोस्ट

शंकर आचार्य

पर्सा — पर्सास्थित ठोरीका बासिन्दाको विरोध र अडानपछि भारतीय पक्षले दशगजा क्षेत्रमा बनाउन लागेको सुरक्षा पोस्ट सीमाबाट करिब ३० मिटर पर सारेको छ ।

भारतीय पक्षले वन गस्तीका लागि भन्दै सोमबारदेखि ठोरी गाउँपालिका–४ विजयबस्तीस्थित दशगजामै टावरसहितको सुरक्षा पोस्ट बनाउन थालेको थियो । अचानक गिट्टी, बालुवा झारेर निर्माण कार्यसमेत थालेको भारतीय पक्षलाई स्थानीयले रोकेका थिए ।

मंगलबार फेरि दशगजामै सुरक्षा पोस्ट बनाउन भारतीय सुरक्षा फौज एसएसबी, बिहार प्रहरी र भारतीय वन विभागका अधिकारी आएका थिए । करिब २ सय ५० को संख्यामा भेला भएका स्थानीय, नेपाल तथा सशस्त्र प्रहरीसमेतको संयुक्त विरोध र अडानपछि भारतीय पक्ष आफ्नै भूमिमा सुरक्षा पोस्ट निर्माण गर्न सहमत भएको हो । ठोरी–४ का वडाध्यक्ष बहीबहादुर पाख्रिनले ठोरीवासी र जनप्रतिनिधिको अडानले भारतीय पक्ष पछि हटेको बताए । ‘कुनै पनि हालतमा दशगजामा सुरक्षा पोस्ट बनाउन दिन्नौं भनेर हामीले अडान लियौं,’ उनले भने,

‘भारतीय पक्ष अन्तत: पछि हट्न तयार भयो’

सशस्त्र प्रहरी बल सुवर्णपुर बीओपीका प्रमुख सशस्त्र प्रहरी निरीक्षक सिंहवीर मल्लले भारतीय पक्षले भ्यु टावरसहितको सुरक्षा पोस्ट निर्माण गर्न खोज्दा विवाद भएको बताए । यसअघि ठोरी गाउँपालिका–४ स्याउलीबस्तीमा पनि यसरी नै दशगजामै वन विभागको पोस्ट बनाउन खोज्दा स्थानीयले विरोध गरेपछि भारतीय पक्ष पछि हटेर आफ्नै भूमिमा बनाइरहेको छ । करिब ५ वर्षअघि भारतीय पक्षले ठोरी–३ स्याउलीबस्तीको दशगजा क्षेत्रमै जबर्जस्ती भ्यु टावर बनाएको छ । पटकपटक भारतीय पक्षले नेपाली भूमि अतिक्रमण गर्न खोज्दा यहाँका स्थानीयले चर्को विरोध गर्दै आएका छन् ।

प्रकाशित : जेष्ठ ७, २०७७ ०८:४३
प्रतिक्रिया
पठाउनुहोस्

लकडाउनले रगत अभाव

शंकर आचार्य

पर्सा — वीरगन्जमा रगतको चरम अभाव टार्न बुधबार आकस्मिक रक्तदान गरिएको छ । वीरगन्ज–२४ रमगढवामा हेल्पिङ ह्यान्ड फोर पिपुल नामक संस्था रेडक्रस रानीघाट उपशाखाको संयुक्त आयोजनमा गरिएको आकस्मिक रक्तदानमा तीन महिलासहित ६४ जनाले रक्तदान गरे । 

एकै दिन यति संख्यामा रगत संकलन भएपछि रक्त सञ्चार केन्द्र वीरगन्ज शाखा प्रमुख सौरभराज पाण्डेले राहतको सास फेरे । ‘कम्तीमा ३ दिनका लागि अभाव टर्‍यो,’ उनले भने, ‘केन्द्रमा रगतको मौज्दात सकिएपछि हालका दिनहरूमा हामीले रगत लिन आउनेलाई रगत शोधभर्ना गरेर मात्र दिइरहेका छौं ।’

करिब डेढ महिना लामो लकडाउनका कारण नियमित रूपमा रक्तदान कार्यक्रम आयोजना हुन बन्द भएपछि केन्द्रमा रगतको मौज्दात सकिएर चरम अभाव भएको पाण्डे बताउँछन् । ‘केन्द्रमा दैनिक २० देखि ३० पोका रगतको माग छ,’ उनले भने, ‘तर हामीसँग मौज्दात सकिएको छ, सबैभन्दा बढी पी पोजिटिभ समूहको रगतको माग छ ।’ बिहीबार बाराको निजगढमा र शुक्रबार रेडक्रस दिवसका अवसरमा वीरगन्जमा दुई वटा रक्तदान कार्यक्रम आयोजना हुने भएकाले कम्तीमा डेढ साताका लागि रगतको मौज्दात हुनेमा आफू आशावादी रहेको उनले बताए ।

सामाजिक अभियन्ता प्रकाश थारू आफूसँग नियमित रूपमा रक्तदान गर्ने रक्तदाताहरूको सम्पर्क नम्बर तथा रक्त समूहको विवरण नै रहेकाले कतैबाट रगतको मागसहितको फोन आए तत्कालै रक्तदाताहरूलाई फोनबाट आग्रह गर्ने र त्यसरी पनि सम्भव नभए सामाजिक सञ्जालमा रगतको मागसम्बन्धी व्यहोरा पोस्ट गर्ने गरेको बताउँछन् । ‘सामान्य अवस्थामा पनि म र मेरा साथीहरूको समूहले दैनिक यसरी ३/४ जनालाई रगत उपलब्ध गराउँथ्यौं,’ उनले भने, ‘लकडाउनमा पनि दैनिक यति नै संख्यामा रगतको माग आफूलाई आउने गरेको र फोन तथा सामाजिक सञ्जालबाट रगतको जोहो गर्ने गरेको छु ।’

प्रकाशित : वैशाख २५, २०७७ १७:४२
पूरा पढ्नुहोस्
प्रतिक्रिया
पठाउनुहोस्
×