घाइते कस्तूरीको उपचार हुँदै
काठमाडौँ — सगरमाथा निकुञ्जको त्याङ्बोचे नजिकको पावर हाउस नजिक घाइते अवस्थामा एउटा पोथी कस्तूरी फेला परेको छ । निकुञ्जका प्रमुख संरक्षण अधिकृत भूमिराज उपाध्यायका अनुसार निकुञ्जको सुरक्षाथार्थ टासिङा तथा फुगिठाँगा पोस्टबाट खटिएका सेनाको संयुक्त गस्ती टोलीले शनिबार घाइते अवस्थामा कस्तूरी मृग फेला पारेको थियो ।
ढाडमा चोट लागेको अवस्थामा फेला परेको उक्त कस्तूरीलाई निकुञ्जको नाम्चेबजारस्थित् मुख्यालयमा ल्याएर उपचार गरिएको छ । उक्त कस्तूरी के कसरी घाइते भयो भन्ने पत्ता लागेको छैन । घाइते कस्तूरीको उमेर ५ देखि ७ वर्षको बीचमा रहेको निकुञ्जले जनाएको छ ।
सगरमाथा निकुञ्ज कस्तूरीको मुख्य हब हो । वैशाख तेस्रो साता तस्करले सगरमाथा पदयात्रा मार्गको तागडिमामा एकै स्थानमा ७ वटा कस्तूरी मृग पासोमा पारेर मारेका थिए ।
सगरमाथा क्षेत्रमा कस्तूरी मार्ने र अंग बेचबिखन गर्ने कार्यमा संलग्न तीन जनालाई केही दिनअघि पक्राउ गरी कारबाही अघि बढाइएको छ । उनीहरुमाथि मुद्दा चलाउन जिल्ला अदालत, सल्लेरी पठाइएको छ ।
राष्ट्रिय निकुञ्ज ऐन २०२९ को दफा २६ मा कस्तूरीको बिना खरिद गर्ने, बिक्री गर्ने वा ओसार पसार गर्ने व्यक्तिलाई ५ लाखदेखि १० लाख रुपैयाँसम्म जरिवाना वा ५ वर्षदेखि १५ वर्षसम्म कैद वा दुवै सजाय हुने व्यवस्था छ ।
