पूर्वआईजीपी खनालले सांसद यादवको अपहरण गरेका हुन् ?- समाचार - कान्तिपुर समाचार
कान्तिपुर वेबसाईट
AdvertisementAdvertisement

पूर्वआईजीपी खनालले सांसद यादवको अपहरण गरेका हुन् ?

सांसद यादवसँगै काठमाडौं आएको हुँ, यसलाई अपहरण भन्न मिल्दैन : खनाल
मातृका दाहाल

काठमाडौँ — सामाजिक सञ्जाल दुरुपयोगको अभियोगमा पूर्वसचिव भीम उपाध्याय बुधबार साँझ ललितपुरबाट पक्राउ परे । उनीमाथि विद्युतीय कारोबार ऐनले बर्जित गरेका सामग्री फेसबुक र ट्विटरमार्फत सार्वजनिक गरेको अभियोग लगाइएको छ । उपाध्याय अहिले प्रहरी हिरासतमै छन् ।

बिहीबार नै पूर्वप्रधानमन्त्री बाबुराम भट्टराईले नेपाल प्रहरीका एक पूर्व आईजीपीमाथि आफ्ना सांसद डा. सुरेन्द्र यादवको अपहरणमा संलग्न भएको आरोप लगाएका छन् । पार्टी विभाजनको सम्भावित हल्ला चलेपछि यादवलाई प्रहरी लगाएर जबर्जस्ती काठमाडौं ल्याइएको आरोप लगाइएको छ । त्यही मेसोमा बिहीबार पूर्वप्रधानमन्त्री भट्टराईले एक पूर्व आईजीपी भनेर उल्लेख गर्दै अपहरणकारीको संज्ञा दिएका छन् । उनले संकेत गरेका ती प्रहरी अधिकारी निवर्तमान आईजीपी सर्वेन्द्र खनाल भएको भट्टराईनिकट स्रोतले बतायो । भट्टराईकै स्वकीय सचिवसमेत रहेका समाजवादी पार्टीका प्रचार विभाग उप–प्रमुख विश्वदीप पाण्डेले पनि पूर्व आईजीपी खनाल सांसद यादवको अपहरणमा संलग्न भएको आरोप लगाएका छन् ।

पूर्वआईजीपी खनालले नेकपा सांसदद्वय बस्नेत र श्रेष्ठसँग महोत्तरी गएको, समाजवादीका सांसद यादवको घरमा गएर खाना खाएको बताए । ‘समाजवादीका सांसद यादव, अर्का सांसद उमाशंकर अरगरीया तथा नेकपाका २ सांसदसँगै म काठमाडौं आएको हो । काठमाडौं आउनुअघि सांसद यादवकै घरमा खाना पनि खाएका हौं,’ खनालले भने, ‘तर यसलाई पूर्वप्रधानमन्त्री भट्टराईले अपहरणको रुपमा चित्रण गर्नु अशोभनीय हो ।’ समाजवादी पार्टीका थुप्रै नेता कार्यकर्तासँग आफ्नो पुरानो चिनजान रहेको तथा आफ्ना हितैषीको रुपमा नेकपा सांसद किसान श्रेष्ठ र महेश बस्नेतसँग लकडाउनमा अलपत्र परेकालाई केही सहयोग गर्न सकिन्छ कि भनेर आफू तराई मधेसतिर गएको उनले बताए ।

खनालसँगै बिहीबार बिहान काठमाडौं आइपुगेका समाजवादी पार्टीका सांसद यादव र अरगरीया नक्सालस्थित मेरियट होटेलमा केहीबेर बसेका थिए । निवेदन दर्ता हुनुअघि समाजवादीबाट अलग्गिएर छुट्टै दल दर्ता गर्ने तयारीका साथ उनीहरु काठमाडौं आएका थिए । यही प्रकरणमा सांसद यादवसहितको टोलीलाई ल्याउन सरकारकै निर्देशनमा पूर्वआईजीपी खनाललाई प्रयोग गरिएको आरोप लागेको छ ।

भट्टराई र पाण्डेले लगाएको आरोपलाई बल पुग्ने गरी जिल्ला प्रहरी कार्यालय महोत्तरी स्रोतले पनि सांसद यादवलाई लकडाउनका बेला काठमाडौं ल्याउन पूर्वआईजीपी खनाल बर्दिबास पुगेको बतायो । खनालसँगै नेकपाका सांसदद्वय महेश बस्नेत र किसान श्रेष्ठ पनि महोत्तरी पुगेका थिए । यही प्रकरण अहिले ‘अपहरण’ सँग जोडिएको विषय बनेको छ । के अब प्रहरीले यस प्रकरणमा सासंद यादवलाई जबर्जस्ती ल्याउनेमाथि अनुुसन्धान गर्छ त ? प्रधानमन्त्रीको ओहदामा समाजवादी पार्टीका सांसद भट्टराईले लगाएको अपहरणको आरोपमा प्रहरीले अनुसन्धान गरिरहेको छ ? नेपाल प्रहरीका प्रवक्ता एसएसपी उमेशराज जोशीले साइबर अपराधसम्बन्धी अनुसन्धान गर्ने निकायसँगै बुझ्न आग्रह गरे । एसएसपी जोशीले भने, ‘साइबर ब्युरोसँग यस विषयमा बुझ्नुहोला । मलाई यस विषयमा तलबाट केही रिपोर्ट आएको छैन ।’

तर साइबर ब्युरोका निमित्त प्रमुख एसएसपी नविन्द अर्याल यो विषय आफ्नो नोटिसमा नरहेको र थप विषय केन्द्रीय प्रवक्तासँगै बुझ्न भन्दै पन्छिए । ‘पूर्वसचिव उपाध्यायविरुद्ध उजुरी परेपछि पक्राउ गरिएको हो तर तपाईंले भनेको विषय हामीलाई जानकारीमा आएको छैन ।’

एकले अर्कालाई देखाएर प्रहरी अधिकृतहरु पन्छिन खोजे पनि यो मामिला जटिल देखिन्छ। पूर्वआईजीपी खनालको भूमिका र पूर्वप्रधानमन्त्री भट्टराईले लगाएको आरोप दुवैमाथि अनुसन्धान हुनुपर्छ। यदि खनालको अपराध र त्यसमा संलग्नता नदेखिएको खण्डमा पूर्वप्रधानमन्त्री भट्टराईमाथि पनि छानबिन हुनुपर्ने एक पूर्व प्रहरी अधिकृत बताउँछन्। उनी सांसद यादवलाई जबर्जस्ती ल्याउन खटिएका भनिएका सांसद श्रेष्ठ र बस्नेतमाथि पनि छानबिन हुनुपर्ने बताउँछन्।

प्रकाशित : वैशाख ११, २०७७ १५:४४
प्रतिक्रिया
पठाउनुहोस्

लकडाउनमा घर फर्केका सांसद : कोही मल बोक्दै, कोही बारी जोत्दै

लकडाउनले अलपत्र परेका मजदुर, विद्यार्थीहरु 'समस्या भयो गाउँ फर्कनुपर्‍यो' भन्दै फोनमा गुनासो गर्छन्। उनीहरु घरबाटै समन्वयको प्रयास गरिरहेका छन्।
विद्या राई

काठमाडौँ — लकडाउनले उकुसमुकुस महसुस गरेपछि नेकपा संसदीय दलकी सचेतक शान्ता चौधरी आइतबार घर फर्किएन्। वीरगन्जमा पढ्दै गरेकी छोरी एक महिनाअघि नै घर पुगिसकेकी थिइन्।

चितवनमा पढ्दै गरेका छोरा लकडाउनले त्यहीँ थुनिएका थिए। सांसद चौधरीले चितवनबाट छोरालाई लिएरै दाङको घोराही उपमहानगरपालिका–४ डाँडागाउँस्थित घर पुगिन्।

अहिले उनको दिनचर्या फेरिएको छ। ‘घरमा आएपछि काम भइहाल्छ। तरकारी रोपियो, मल ओसारियो, यस्तै छ,’ बुधबार बेलुकी फोन सम्पर्कमा उनले सुनाइन्। उनले मल ओसार्दै गरेको भिडियो पनि फेसबुकमा पोस्ट गरेकी छन्। जहाँ लेखिएको छ- ‘खेती गर्ने, अर्गानिक खानेकुरा खाने, खाद्यान्न किनेर खान सकेसम्म नपर्ने, यही निष्कर्ष निकाल्दै हामी आजबाट खेती गर्ने अभियानमा जुटियो, छोरा अनिल जोतेर साथ दिँदै। भिडियोमा सांसद चौधरीसहित केही महिलाले मल ओसार्दै गरेको र छोरा अनिलले खेतबारी जोतिरहेको देखिन्छ।

यसबारे धेरैले टीकाटिप्पणी गरेको विषयलाई जोड्दै चौधरीले भनिन्, ‘गर्दा पनि सुख छैन, नगर्दा पनि सुख छैन, आज (बुधबार) त दिनभरि नै मल बोकेको हो। अरुलाई पनि उत्प्रेरणा होस् भनेर हो। अरुले नाटक ठान्छन्, ठाने नि ठानून् आफूले नाटक नगर्ने त हो नि।’ उनले माइतीघरमा पनि काम सघाउन भ्याएको सुनाइन्।

लकडाउनमा गाउँघरको बसाइ कस्तो हुदो रै'छ भन्ने जिज्ञासामा उनले भनिन्, ‘म अरुबेला पनि महिनामा दुईतीन फेर आउँदै गर्छु। सधैं गाउँमा बसेको, हुर्केको, काम गरेको मान्छेलाई कुनै नौलो कुरा नै भएन।’

चौधरी ललितपुरको ग्वार्कोस्थित डेरामा बस्छिन्। सधैजसो संसदीय गतिविधि र अध्ययनमा व्यस्त हुने उनलाई लकडाउनले एकैकोठाको बसाइ निक्कै सकसपूर्ण भएको थियो। ‘कोठामा गुम्सिँदा सासै थुनिएला जस्तो गाह्रो भो, छोराछोरीसँग पनि छुट्टिएर बस्नुपर्ने, भोलि केही भो भने पानी पिउने मान्छे नि नहोला भनेर घर आएँ,’ उनले भनिन्। घर गएपछि मानसिक र शारीरिक रुपमा सहजता भएको उनले महसुस गरेकी छन्।


मजदुरहरुको उद्धार गर्नुपर्ने, राहत दिनुपर्ने फोनहरु आइरहन्छन्। फोनबाटै समन्वय गर्छिन्। स्वास्थ्य समस्याले भौतिक रुपमा जनताका माझ पुग्न भने सम्भव छैन। ‘जनताका बीच गएर समस्या बुझिदिँदा उनीहरु अझ खुसी हुन्छन्। कोरोना रोगबारे बताउँछु,' उनले भनिन्, 'म प्रेसर र दमको औषधि खान्छु, यसले गर्दा जनताकै बीचमा गएर काम गर्न गाह्रो छ, फोनमार्फत सहयोग र समन्वय गरिरहेको छु।’

गतवर्ष एसईई पास गरेकी उनी कानुन विषयमा कक्षा ११ की विद्यार्थीसमेत हुन्। वैशाखमा हुने भनिएको वार्षिक परीक्षा कोरोना महामारीकै कारण स्थगन भएपछि विद्यार्थीहरुलाई अन्योल भइरहेको छ। उनी भने फुर्सद निकालेर बेलाबेला पढ्न बस्छिन्। ‘कोरोनाको तनावले गर्दा पढेको पनि उतिखेरै बिर्सिन्छ,’ उनले भनिन्। दैनिकीलाई जतिसक्दो सरल र सहज तरिकाले बिताउने प्रयत्न गर्छिन्। कोरोना महामारीलाई उनले मानव सभ्यता र आत्मनिर्भताको सिकाइ ठानेकी छन्।

यसैगरी, प्रतिनिधिसभा सांसद भवानीप्रसाद खापुङ पनि लकडाउन अवधि तेह्रथुमस्थित घरमै बिताइरहेका छन्। उनले बारी जोत्दै गरेको फोटो फेसबुकमा भाइरल नै भयो। बिहीबार उनीसित फोन गर्दा आफू होम क्वारेन्टाइनमा बसेको सुनाए। ‘म त गाउँघरको मान्छे, खेतीकिसान गरिरहेको छु, यसो दिन काट्ने मेलो,’ उनले भने, ‘माननीय भएर पनि जोतेको भनेर अनौठो मानियो होला, म त किसानै मान्छे परे नौलो भएन, पहिलेदेखि गरिल्याको काम हो।’

उनी लकडाउन हुनुभन्दा चार दिनअघि मात्रै गृहजिल्लाका कार्यक्रम भ्याएर काठमाडौं आइपुगेका थिए। कोरोना महामारीले संसद् स्थगन हुने भएपछि लकडाउन घोषणासँगै फर्किइहाले।

लकडाउनले अलपत्रमा परेका मजदुर, विद्यार्थीहरु समस्या परेको भन्दै फोनमा गुनासो गर्छन्। जिल्लाभित्र फर्कने जिल्लावासी र गाउँमा मरिमराउ, निम्ता मान्न आएकाहरु थातथलो फर्कन नपाएर फोन आइरहन्छन्। कोही घर आउन नपाएर बिजोग भयो भन्दै फोन गर्छन्, कोही राहत भएन भनेर। खापुङ भने फोनबाटै समन्वय गरिरहेका छन्।

महामारीले गर्दा गाउँमा नयाँ मान्छे आए त्रसित हुने अवस्था छ। यस्तोबेला फर्कन चाहनेलाई कसरी फर्काउने तयारी भइरहेको उनले बताए। ‘यस्तोबेला घर बसेको भनेर मान्छेले अनेक भन्लान् तर वर्तमान परिस्थितिमा के गर्ने कसो गर्ने भन्नेबारे जिल्लाको ‘हाइकमान्ड कन्ट्याक’मा रहेर काम गरिरहेको छु,’ उनले भने, ‘पूरै बेखबर भएर गाउँको कुनामा हलो जोतेर बसेको बुझ्लान्, त्यस्तोचाहिँ होइन।’

प्रकाशित : वैशाख ११, २०७७ १५:३९
पूरा पढ्नुहोस्
प्रतिक्रिया
पठाउनुहोस्
×