भारतीय सुरक्षाकर्मीले सीमामा छाडेका नेपालीलाई फिर्ता पठाइयो

बिहीबार राति भारतमै क्वारेन्टाइनमा बस्दै आएका उनीहरूलाई कन्हौली नाकास्थित दशगजा क्षेत्र लखनदेही खोला नजिकै ट्रकमा ल्याएर छाडिदिएका थिए । तीमध्ये ९१ जनालाई भारतीय सुरक्षा अधिकारीसँग समन्वय गरी शुक्रबार बेलुकी पुनः भारततर्फ नै फर्काइएको प्रमुख जिल्ला अधिकारी मोहनबहादुर जीसीले बताए ।

जीसीका अनुसार नेपाली सुरक्षा निकायसँग समन्वय नै नगरी भारतले उनीहरूलाई सीमामा ल्याएर छाडेको हो । ‘दुई देशबीच भएको सहमति मान्नैपर्छ तर भारतका सुरक्षाकर्मीले राति हामीलाई जानकारी नै नगराई १ सय २३ नेपालीलाई सीमामा छाडेको थियो,’ उनले भने, ‘सहमति पालना गराउन एक दिन नै लाग्यो । सीमामा छाडेका नेपालीलाई क्वारेन्टाइनमा राख्ने गरी लगेका छन् ।’

सीमामा ल्याएर छाडिएकामध्ये २४ जना भने सर्लाहीको चन्द्रनगर आइपुगेका छन् । ९१ जनालाई नेपालतर्फका सुरक्षाकर्मीले सीमामै रोकेर राखे पनि २४ जना भने लुकिछिपी चन्द्रनगरसम्म आइपुगेका हुन् ।

उनीहरूलाई अहिले कामद माविमा निर्माण गरिएको क्वारेन्टाइनमा राखिएको र तत्कालै बबरगन्जस्थित दुर्गा खोभारी जनता माविमा क्वारेन्टाइन बनाएर सार्ने तयारी भइरहेको चन्द्रनगर गाउँपालिकाले जनाएको छ । सीमामा छोडिएकामध्ये आठ जना भने सम्पर्कमा नरहेकाले उनीहरूको खोजी भइरहेको प्रजिअ जीसीले जानकारी दिए ।

कोरोना संक्रमणको जोखिम कम गर्न सरकारले भारततर्फको सीमामा कडाइका साथ निगरानी गरिरहेको छ । तर भारतीय सुरक्षाकर्मीले नै क्वारेन्टाइनमा बसेका नेपालीलाई ‘चोर बाटो’ हुँदै ट्रकमा पठाएपछि यहाँस्थित प्रशासनले दुई देशबीच भएको सहमति पालना गर्न भारतका सुरक्षा अधिकारीहरूलाई आग्रह गरेका थिए । चौतर्फी दबाब परेपछि मात्र भारतीय सुरक्षाकर्मीले दशगजामै अड्किएका नेपालीलाई पुनः भारत लगेका हुन् ।