फ्रान्स र जर्मनीका नागरिक लिन कतारका दुइटा जहाज शनिबार काठमाडौं आउँदै 

शुक्रबार बिहान दोहाबाट आएको कतार एयरको वाइडबडी विमानले काठमाडौंबाट जर्मनसहित ३ सय ४ जना यात्रु बोकेर फर्केको थियो । एक अधिकारीकाअनुसार उडानमा ३ वटा नाबालक पनि थिए ।

काठमाडौं विमानस्थलमा रहेको अध्यागमन कार्यालयका प्रमुख सागर आचार्यका अनुसार उक्त उडानमा २ सय ७० जर्मन नागरिक थिए भने बाँकी युरोपियन युनियनका ११ वटा सदस्य मुलुका नागरिक थिए । तीमध्ये कतिपय पर्यटकका भिसाको अवधि लकडाउन सुरु हुनुअघि र केहीको लकडाउन सुरु भएपछि म्याद सकिएको अध्यागमन कार्यालयले जनाएको छ । लकडाउनअघि भिसाको म्याद सकिएका पर्यटकलाई जरिवाना लगाइएको आचार्यले बताए ।

काठमाडौंस्थित कतार एयरवेजको कार्यालयले यो उद्धार उडानको आर्थिक व्ययभार काठमाडौंमा रहेको जर्मन दूतावासले ब्यहोरेको जनाएको छ । कतारले काठमाडौंबाट उडाएका ती पर्यटकलाई दोहाबाट उनीहरुका मुलुकमा हुने नियमित उडानबाट स्वदेश फर्काउने छ ।

यसैबीच, कतारले शनिबार बिहान फ्रान्स र जर्मनी दूतावासकै खर्चमा दुइटा उद्धार उडान गर्दै छ । दुबै उडानमा ३ सय ५ यात्रु क्षमताकै वाइडबडी जहाज ल्याएर फ्रान्स, जर्मनी र अन्य युरोपियन मुलुकका नागरिकलाई दोहा लगिने भएको छ । त्यस्तै आगामी साता कतारकै जहाजबाट माल्दिप्स, अस्ट्रेलिया र अमेरिकाका नागरिक उद्धार गर्न सम्बन्धित मुलुकका दूतावास र काठमाडौंस्थित कतार एयरवेजले अनुमतिका लागि पहल गरिरहेको एक अधिकारीले कान्तिपुरलाई बताए ।

कतार एयरवेजले संसारभर १ सय ६० हाराहारी गन्तव्यमा उडान गर्दै आएकोमा अहिले विश्वभरका करिब सय गन्तव्यमा लकडाउन र कोरोनाको प्रभावका कारण उडान नभएको तथा ६० वटा गन्तव्यमा मात्रै नियमित उडान भइरहेको जनाएको छ ।

निगमको वाइडबडी शनिबार ग्वाङजाउ जाँदै, निगमको टुइनअटर लुक्लाबाट पर्यटक र नेपालगन्‍जमा बिरामीको संकलित नमुना लिन जाँदै

नागरिक उड्डययन प्राधिकरणका प्रवक्ता राजकुमार क्षत्रीले शनिबार नेपाल वायुसेवा निगमको वाइडबडी विमानलाई पनि चीनको ग्वाङजाउमा मेडिकल कार्गो उडानमा जान अनुमति प्रदान गरिएको बताएका छन् । उनका अनुसार, लकडाउनको अवधिमा नेपाली ध्वजावहाक विमानले अन्तर्राष्ट्रिय कार्गो उडान अनुमति प्राप्त गरेको यो पहिलो हो । यो अवधिमा विदेशी एयरलाइन्सले भने काठमाडौंमा रित्तो जहाज पठाएर यताबाट विदेशी उद्धार गरिरहेका छन् ।

निगमको अपरेसन विभागका प्रमुख दिपु ज्वारचनका अनुसार शनिबार बिहान साढे १२ बजे चीन जाने उक्त विमानमा ३० टन हाराहारी मेडिकल सामग्री ल्याइँदै छ । काठमाडौंबाट खाली उड्ने जहाज फर्किँदा पनि कार्गो मात्रै ल्याएर ११ घण्टापछि राति काठमाडौं अवतरण हुने छ ।

त्यस्तै शनिबार निगमको टुइनअटर विमानले लुक्लामा अलपत्र परेका विदेशीलाई काठमाडौं ल्याउँदै छ । शनिबार कम्तीमा ५ वटा काठमाडौं लुक्ला उडान हुने ज्वारचनले बताए । शनिबार निगमको वाइ१२ई विमान नेपालगन्‍ज जाँदै छ । स्वास्थ्य मन्त्रालयले गरेको चार्टर उडानले नेपालगन्जबाट बिरामीको खकारको नमुनामात्रै ल्याएर फर्किने छ ।

शनिबार सीता एयरको जहाजले पनि लुक्लामा अलपत्र परेका विदेशीलाई उद्धार गरेर काठमाडौं ल्याउने अनुमति पाएको उक्त एयरलाइन्सका एक अधिकारीले बताएका छन् । शनिबारै पोखरामा अलपत्र परेका ३ सय विदेशीलाई श्री र यति एयरलाइन्सको विमानले काठमाडौं ल्याउँदै छ । पर्यटन बोर्डका सीइओ धनञ्जय रेग्मीका अनुसार प्रतिविदेशी यात्रु ५ हजार रुपैयाँका दरले यी दुई एयरलाइन्सले काठमाडौं ल्याउन लागेका हुन् ।

बोर्डले यो वसन्तकालीन सिजनमा देशभर १० हजार पर्यटक विभिन्न ठाउँमा पदयात्रा लगायतका भम्रणमा रहेको अनुमान गरेको छ । यीमध्ये पोखरासहित २२ स्थानमा अलपत्र परेका ५ सय २६ विदेशी बोर्डको सम्पर्कमा आएका छन् । उनीहरुलाई पनि उद्धार गरिने सीइओ रेग्मीले बताए ।

यसैबीच बोर्डकै पहलमा बिहीबार र शुक्रबार गरी २ सय ५ जनालाई जहाज र बसमा गरेर काठमाडौं ल्याइसकिएको छ । शुक्रबार साँझ यति एयरलाइन्सको जहाजले पोखराबाट ५ विदेशी पर्यटकको उद्धार गरेर काठमाडौं ल्याएको छ । यतिका अनुसार, काठमाडौंस्थित स्वीस दूतावासले आफ्ना नागरिकहरुको उद्धारका लागि अनुरोध गरेपछि नागरिक उड्डययन प्राधिकरणसँग अनुमति लिएर उक्त कम्पनीले आफ्नो एटीआर विमान पोखरा पठाएको थियो ।

शुक्रबारै एयर डाइनेस्टी, सिम्रिक एयर र कैलाश एयरका हेलिकप्टरले पनि ५ वटा उद्धार उडान गरेर बिरामी विदेशी र स्वदेशीलाई काठमाडौं ल्याएका थिए ।