सरकार संक्रमितको उपचार, आपूर्ति र शान्ति सुरक्षामा केन्द्रित : उपप्रधानमन्त्री पोखरेल

कान्तिपुर संवाददाता

काठमाडौँ — सरकारले कोरोना भाइरसबाट संक्रमितको उपचार, आपूर्ति र शान्ति सुरक्षामा केन्द्रित भएर काम गरिरहेको स्पष्ट पारेको छ । उपप्रधानमन्त्री तथा रक्षामन्त्री ईश्वर पोखरेलले बिहीबार सञ्‍चारकर्मीसँग कुरा गर्दे संक्रमितको उपचार पहिलो प्राथमिकता भएकाले सोहीअनुसार सरकारले काम गरिरहेको स्पष्ट पारेका हुन् । 

कोरोना संक्रमण रोकथाम तथा नियन्त्रण उच्चस्तरीय समन्वय समितिका संयोजक रहेका उपप्रधानमन्त्री पोख्रेलले आपूर्ति व्यवस्थापन सहज बनाउनुको साथै शान्ति सुरक्षा प्रदान गर्ने विषयमा सरकार गम्भीररुपमा लागेको बताए । संक्रमितको उपचार, बिरामी राख्ने आइसोलेसन लगायत कामका लागि आवश्यक मेडिकल सामग्री अभाव भएकाले तत्काल उपचार प्रभावकारी ढंगले गर्न नसकिए पनि सरकारले छिट्टै सामान आपूर्ति गर्ने विश्वास दिलाए । उनले स्वास्थ्यकर्मीका लागि अत्यावश्यक व्यक्तिगत सुरक्षा सामग्री (पीपीई) परीक्षण कीट लगायतका स्वास्थ्य आयातमा देखिएका प्रक्रियागत जटिलताको अन्त्य गर्दै सरकारले छिट्टै सामान ल्याउने बताए ।


उनले भने, “उपयुक्त साधनहरु थिएनन् । ल्याउनुपर्ने थियो । हाम्रो देशमा मात्रै अभाव होइन । दुनियाँभर अभाव भएको बेलामा उपचारमा देखा परेका समस्या समाधान गर्न तर्फ सरकार लागेको छ । प्रक्रियागत जटिलताहरु छन् । ती प्रक्रियागत जटिलतालाई तोडेर हामी चाँडै सामान ल्याउँछौं । त्यसपछि ती सामानहरुलाई प्रदेशतहका हस्पिटलहरुमा पनि पुऱ्याउँछौं ।” उनले बन्दाबन्दीको अवस्थामा दैनिक उपभोग्य सामान, औषधि, खाद्यान्न, तरकारी, दूध लगायत अत्यावश्यक सामग्रीका पसलहरु खुल्ला हुने स्पष्ट पारे । उनले विभिन्न पेसासँग सम्बन्धित दैनिक ज्यालादारी कर्मचारीलाई बिदा मिलाई काम नगुम्ने अवस्थाको प्रत्याभूति गर्न ती संस्था, व्यक्ति र फर्महरुसँग सरकारले समन्वय गरिहेकाले कसैले पनि काम गुमाउने अवस्था नरहने दाबी गरे ।


प्रकाशित : चैत्र १३, २०७६ १९:५९

ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नेपालमा अड्किएका जर्मन नागरिक लिन कतार एयरवेज आउँदै

कान्तिपुर संवाददाता

काठमाडौँ — कोरोना सन्त्रासकाबीच नेपालमा अड्किएका जर्मन नागरिक लिन भोलि (शुक्रबार) कतार एयरवेजको चार्टड विमान काठमाडौं आउने भएको छ ।

विशेषतः पोखरा, लुक्ला र काठमाडौंमा अड्केर बसेका ४ सयभन्दा बढी जर्मन पर्यटक नेपालबाट फिर्ता लैजानेबारे प्रबन्ध मिलाइदिन काठमाडौंस्थित जर्मन दूतावासले परराष्ट्र मन्त्रालयलाई गत सोमबार अनुरोध गरेको थियो ।

कोरोना भाइरस संक्रमणका कारण चैत १९ सम्म नेपाल सरकारले सबै अन्तर्राष्ट्रिय उडान आवागमनमा प्रतिबन्ध लगाएकोमा जर्मन दूतावाससहित युरोपेली संघले गरेको आग्रहमा नागरिक उड्डयन प्राधिकरणले शुक्रबार र शनिबार दुई फ्लाइट उडानको अनुमति दिएको हो । कतार एयरवेज दोहा हुादै जर्मनीको फ्रेंकफर्ट जानेछ ।

नेपालमा पर्यटक बनेर आएका फ्रेन्च, अमेरिकी र बेलायती नागरिक समेत काठमाडौंमा अल्झेर बसेकाले तिनलाई समेत फिर्ता लैजान सम्बद्ध कूटनीतिक नियोगले परराष्ट्रमा आग्रह गरिसकेका छन् ।

‘तर, यसबारे भने औपचारिक निवेदन आइसकेको छैन,’उड्डयन प्राधिकरणका एक पदाधिकारीले भने ।

प्रकाशित : चैत्र १३, २०७६ १९:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×