तीनै सरकारबीच सुदृढ समन्वय गर्न राष्ट्रपतिको आह्वान

कान्तिपुर संवाददाता

काठमाडौँ — राष्ट्रपति विद्यादेवी भण्डारीले कोरोना भाइरस संक्रमण रोकथामका लागि स्वास्थ्यसम्बन्धी भौतिक पूर्वाधार तथा प्राविधिक तयारी गर्न संघ तथा प्रदेश सरकार, जिल्ला समन्वय समिति र पालिकाहरूबीच सुदृढ समन्वय हुनुपर्नेमा जोड दिएकी छन् ।

सरकारले चालेका कदमलाई गम्भीरतासाथ आत्मसात गर्न पनि उनले अपिल गरेकी छन् ।


राष्ट्रपति भण्डारीले बुधबार वक्तव्य जारी गर्दै सरकारका आधिकारिक निकायले जारी गरेका निर्देशन र आचारसंहिता पालन गर्न भनेकी छन् । ‘कोरोनाको रोकथाम तथा नियन्त्रणका लागि नेपाल सरकारले चैत ९ देखि २१ गतेसम्म मुलुकभर अत्यावश्यकबाहेकका सबै सेवा र हाललाई अन्तर्राष्ट्रिय सीमा नाकासमेत बन्द गर्ने निर्णय गरेको छ ।


यसबाट आम जनताको दैनिक जीवनमा केही कठिनाइ हुने भए तापनि सरकारको यस सुझबुझपूर्ण र सामयिक निर्णयलाई सबैले गम्भीरतापूर्वक आत्मसात गर्नुपर्छ,’ राष्ट्रपतिको वक्तव्यमा छ, ‘यस परिवेशमा वर्तमान संवेदनशील अवस्थालाई मध्यनजर राख्दै हरेक नागरिकले सरकारका आधिकारिक निकायले जारी गरेका निर्देशन एवं आचारसंहिता पालना गर्दै घरमै बसेर आफू र आफ्नो परिवारको अमूल्य जीवनको रक्षा गर्न म हार्दिक आह्वान गर्न चाहन्छु ।’


उनले यस संवेदनशील परिस्थितिमा सही सूचना ग्रहण र प्रवाह गर्दै कोभिड–१९ को विरुद्धमा सचेतनापूर्वक अग्रसर हुन राजनीतिक दल तथा तिनका भ्रातृ तथा भगिनी संगठन, युवा तथा विद्यार्थी, कल्याणकारी संघसंस्था लगायतलाई आह्वान गरेकी छन् ।


‘सम्पूर्ण सुरक्षा संयन्त्र र चिकित्सक एवं स्वास्थ्यकर्मर्हीरूबाट भइरहेको सत्प्रयासमा सम्बद्ध सबै पक्षबाट आवश्यक सहयोग र समन्वयको अपेक्षासमेत लिएको छु,’ राष्ट्रपति भण्डारीको वक्तव्यमा भनिएको छ । प्रकाशित : चैत्र १२, २०७६ २१:२०

प्रतिक्रिया
पठाउनुहोस्

लकडाउनको दोस्रो दिन : दुई हेलिकप्टरद्वारा उद्धार उडान

सुरज कुँवर

काठमाडौँ — कोरोना भाइरसबाट उत्पन्न जटिल अवस्थाका कारण सरकारले जोखिम घटाउन मंगलबार बिहानदेखि गरेको एक साता लामो लकडाउनको दोस्रो दिन दुइटा हेलिकप्टर रेस्क्यु उडान भएका छन् । 

त्रिभुवन अन्तर्राष्ट्रिय विमानस्थलका प्रवक्ता देवचन्द्रलाल कर्णका अनुसार बुधबार उपल्लो डोल्पा र लुक्लाबाट दुईटा हेलिकप्टर उद्धार उडान भए । ती उडान एयर डायनेस्टीका दुइटा हेलिकप्टरले गरेका हुन् । डायनेस्टीका प्रबन्धक बालकृष्ण पण्डितका अनुसार बुधबार बिहान लुक्ला नजिकैको पाङबोचेबाट एक जना रसियन पर्यटकलाई उद्धार गरिएको हो । ‘पदयात्रमा रहेकी ती महिलासहित तीन जना रसियन नागरिकलाई पाङ्बोचेबाट काठमाडौं ल्यायौं,’ पण्डितले भने, ‘ती रसियनलाई लिन सोमबार नै डायनेस्टीको हेलिकप्टर लुक्ला पुगेको थियो । तर मौसम बिग्रिएका कारण काठमाडौं फर्किन सकेको थिएन ।’

मंगलबार लकडाउनको पहिलो दिन यो हेलिकप्टरलाई गृह मन्त्रालयले अनुमति नै नदिएपछि बिरामी पर्यटकसहित उतै रोकिएको थियो । अहिले ती रसियनको राजधानीको स्वाकोन इन्टरनेसनल हस्पिटलमा उपचार भइरहेको डायनेस्टीले जनाएको छ ।

त्यसैगरी डायनेस्टीकै अर्को हेलिकप्टरले माथिल्लो डोल्पामा पदयात्रामा रहेका एक फ्रान्सेली नागरिकलाई पनि बुधबार दिउँसो काठमाडौं ल्याएको छ । लकडाउनको दोस्रो दिन भएको यो दोस्रो उद्धार उडान हो । ‘ती बिरामी र उनका सहयात्रीसहित दुबै फ्रेन्च पर्यटकलाई माथिल्लो डोल्पाबाट आजै (बुधबारै काठमाडौं ल्यायौं,’ म्यानेजर पण्डितले भने । ती फ्रेन्चको लैनचौरस्थित सिविक हस्पिटलमा उपचार भइरहेको उनले बताए ।

यसैबीच डायनेस्टीले बिहीबार पनि दुइटा हेलिकप्टर चार्टर उडान गर्दै छ । खुम्बु क्षेत्रको नाम्चे र गोरकसेपबाट दुइटा उद्धार उडान गर्न लागेको कम्पनीले जनाएको छ ।

नेपालले लकडाउन गरे पनि विभिन्न हिमाली क्षेत्रमा पर्यटकहरु रोकिएका खबर प्राप्त भएका छन् । हेलिकप्टर कम्पनीहरुका अनुसार मनाङमा ३० जना, मुक्तिनाथमा ४ जना र लाङटाङमा ६ जना जर्मन नागरिक उद्धारको पर्खाइमा रहेको खबर आएको छ । ती नागरिकलाई काठमाडौं फर्काउन सम्बन्धित मुलुकको दूतावासले पहल गरिरहेको जनाइएको छ ।

यसैबीच पर्यटन बोर्डले चितवन, पोखरा, काठमाडौंमा अलपत्र परेका कोही विदेशी भएमा खबर गर्न दुइटा मोबाइल नम्बरसहित सम्पर्क व्यक्ति तोक्दै फेसबुक पेजमा राखेको छ ।
बोर्डले नेपालमा रहेकाहरुलाई आफ्ना मुलुकका दूतावासमा सम्पर्क गर्न, नजिकै सञ्चालनमा रहेका होटल, रेस्टुरेन्ट, हेलिकप्टर उद्धार उडान, अस्पताल, प्रहरीलगायत विषयमा जानकारी दिन बेग्लै साइट स्ट्रयान्डेडइननेपाल डट कम साइट पनि सञ्‍चालनमा ल्याएको छ ।

प्रकाशित : चैत्र १२, २०७६ २१:०३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×