समिट एयरको जहाज रामेछापमा आकस्मिक अवतरण 

१८ यात्रु र चालक दलका ३ सदस्य सबै सकुशल
टीकाप्रसाद भट्ट

रामेछाप — काठमाडाैंबाट लुक्काका लागि उडेको समिट एयर नाइन एन एएमजी कल साइनको विमानको इन्जिन फेल भएपछि रामेछाप विमानस्थलमा आकस्मिक अवतरण गराइएको छ । आइतबार बिहान ९ बजेतिर जहाजका दुवै इन्जिन फेल भएपछि रामेछाप विमानस्थलमा आकस्मिक अवतरण  गरेको नागरिक उडड्यन कार्यालय रामेछापका एटिसी विवस दाहालले जानकारी दिए ।

विमानमा रहेका १८ यात्रु र चालक दलका ३ सदस्य सबै सकुशल रहेका छन । दाहालका अनुसार जहाजका दुवै इन्जिन फेल भएपछि समिट एयरको सो जहाजले काठमाडौं जाँदै गरेको तारा एयरको विमानका चालकलाई सन्देश पठाएको थियो । तारा यएरको नाइन एन एईटी नम्बरको जहाजले रामेछाप टर्मिनलमा रहेका एटिसी समिट एयरको जहाजको इन्जिन फेल भएको जानकारी गराएको थियो ।


‘समस्यामा परेको जहाजले हामीलाई खवर गरेको थिएन, आकाशमै तारा एयरको जहाजसँग कुरा भएछ’ दाहालले भने ‘त्यसपछि मैले उसलाई सम्पर्क गरे । तत्काल २ मिनेट भित्र अग्नि नियन्त्रण र सुरक्षाको प्रबन्ध मिलाउँदै विमानस्थल खाली गराए ।’


एटिसीसँग सम्पर्क भएको करिब ६ मिनेटमा समिट एयरको जहाज रामेछाप विमानस्थलमा आकस्मिक अवतरण गरेको हो । अवतरणको क्रममा जहाजमा असाधारण आवाज आएपछि पाइलटले आकस्मिक सबै बत्ति बालेका थिए । तर जहाज सामान्य रुपमै अवतरण भयो । विमानमा रहेका १ बच्चा र १७ अन्य यात्रु सकुशल रहेका छन् ।


विमानका क्याप्टेन तेन्जिङ लामा र सह क्याप्टेनमा पिडि शेर्पा थिए । दाहालले इन्जिन फेल भएको उक्त विमानको प्राविधिक परीक्षणका लागि समिट एयर र नेपाल नागरिक उडड्यन प्राधिकरणको टोलीले छानबिन थालेको जानकारी दिए।


लुक्लाका लागि उडेका यात्रुहरुलाई तारा एयरको विमानले लिफ्ट गरेर गन्तव्यमा लगेको नागरिक उडड्यन कार्यालय रामेछापले जनाएको छ ।

प्रकाशित : चैत्र ९, २०७६ १२:५७
प्रतिक्रिया
पठाउनुहोस्
ADVERTISEMENT
ADVERTISEMENT

बुद्ध एयरले भाडा घटाएर उडान बढाउने  

सुरज कुँवर

काठमाडौँ — बुद्ध एयरले देशभर आफ्नो कम्पनीका उडानमा ४० प्रतिशत भाडा घटाएको छ । घटाइएको भाडा आइतबारबाट लागू हुने कम्पनीले जनाएको छ । 

कोरोना भाइरसको संक्रमण जोखिम बढेसँगै लामो दुरीका यात्रुबाहक बस सञ्चालनमा रोक लगाउने निर्णय सरकारले गरेपछि बुद्ध एयरले उडान संख्या पनि बढाएको छ । एयरका प्रवन्ध निर्देशक वीरेन्द्रबहादुर बस्नेतले आइतबारदेखी लागू भएको घटाइएको भाडादर लामो रुटका सार्वजनिक यातायात नखुल्दासम्म लागू हुने बताए ।
‘अहिले देशको आवश्यकता हो, यतिबेला नगरे कहिले गर्नु,’ बस्नेतले कान्तिपुरसँग भने, ‘सहज वातावरण नहुँदासम्म हामी सस्तो भाडा दरमै यात्रुलाई सेवा दिइरहने छौं ।’

जस अनुसार, सरकारले कायम गरेको हवाई भाडा दरको संरचनामा अपर सिलिङ (माथिल्लो तहको भाडा दर) अनुसार नभई बुद्धले नयाँ भाडा दर (सस्तो अपर सिलिङ) तोकेको छ । धनगढीको माथिल्लो तह (अपर सिलिङ)को एकतर्फी हवाई भाडा दर १४ हजार हाराहारी हो तर बुद्धले ७ हजार ९ सय भन्दा बढी नलिने जनाएको छ ।

त्यस्तै भैरहवाको ६ अपर सिलिङ भाडा दर ४ हजार ७ सयमा झारिएको छ । त्यस्तै १० हजार भाडा दर रहेको नेपालगञ्जलाई ६ हजार १ सयमा, भद्रपुरको ९ हजार ८ सयलाई ६ हजार २ सयमा, पोखराको ५ हजारलाई ३७ सयमा, राजविराजको ६ हजार ५ सयलाई ४२ सयमा कायम गरिएको छ ।

बस्नेतका अनुसार, बुद्धले टिकटको माग बढ्दै गएपछि सरकारले लागू गरेको अपर सिलिङमा टिकट बिक्रि गर्ने छैन् । टिकटको माग कम भए सबैभन्दा सस्तो भाडामा पनि यात्रुले टिकट प्राप्त गर्ने छन् ।

यात्रु अभाव हुदै गएपछी बुद्धले १३ मध्ये १२ वटा जहाज उडाइरहेको छ । एउटा ग्राउन्डेड गरेको छ । तर, यात्रुको माग बढेमा उडान संख्या थप्ने बस्नेतले बताए ।

प्रकाशित : चैत्र ९, २०७६ १२:३९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×