कोरोना रोकथामबारे कूटनीतिक समुदायलाई ब्रिफिङ

परराष्ट्र सचिव शंकरदास बैरागीले सिंहदरबारस्थित परराष्ट्र मन्त्रालयमा काठमाडौंस्थित कूटनीतिक नियोगका प्रमुखहरु, संयुक्त राष्ट्रसंघ र अन्य अन्तर्राष्ट्रिय संघ–संगठनका प्रमुखहरु तथा उनीहरुका प्रतिनिधिहरुलाई बोलाएर ब्रिफिङ गरिएको हो ।

मन्त्रालयका प्रवक्ता भरतराज पौड्यालका अनुसार सचिव बैरागीले कोरोना भाइरसको रोकथामको सन्दर्भमा नेपाल सरकारले चालेको कदमको बारेमा जानकारी दिएका थिए ।

ब्रिफिङमा नेपाल सरकारले मार्च २४ देखि अप्रिल ३० सम्म अन–अराइभल पर्यटक भिसामा लगाइएको प्रतिबन्धको बारेमा जानकारी दिइएको थियो । बैठकमा अध्यागमन विभागका महानिर्देशकसहित स्वास्थ्य मन्त्रालय र पर्यटन मन्त्रालयका प्रतिनिधिहरुको पनि उपस्थिती थियो ।

स्वास्थ्य मन्त्रालयका प्रतिनिधिले विभिन्न समयमा आफूले निकालेको एड्भाइजरीको बारेमा जानकारी दिएको थियो भने पर्यटन मन्त्रालयका प्रतिनिधिले हवाई सेवाका सम्बन्धमा जानकारी दिएका थिए ।