५५ अर्बका लागि राष्ट्रहितविपरीत सम्झौता हुँदैन : दाहाल

‘५५ अर्बको लागि राष्ट्रविपरीत सम्झौता हुनै सक्दैन, कार्यदलको सुझाव लिएर मात्रै अगाडि बढ्छौं,’ दाहालले भने ।

एमसीसी श्रीलंकाली संसदले अस्वीकृत गरेको उदाहरण दिँदै दाहालले देशको स्वाधिनतालाई उचो राख्न सम्पूर्ण बुँदा हेरेरमात्रै अगाडि बढ्न अमेरिकासँग घनिभूत छलफल भइरहेको बताए । ‘अमेरिकाले एमसीसी संशोधन गर्न कठिन भनेको छ, तर यो कुनै बाइबल होइन, संशोधन गरेमात्रै अगाडि बढ्छौं,’ दाहालले भने । जिल्लादेखि केन्द्रसम्म नेकपा अब एउटै पार्टी भइसकेको र यो फुट्छ भन्नु भ्रमपूर्ण कुरा मात्रै भएको दाहालले बताए ।

पार्टीभित्र विवाद बढिरहेका बेला चितवनबाट शुक्रबार सिँधै पर्यटकीय 'हब' सुकुटे आइपुगेका दाहालले पार्टीभित्र फरक विचार देखिए पनि नेकपा एकताबद्ध रहेको बताए । ‘नेकपा टुक्रिन्छ भन्नु एउटा भ्रम हो, कसैले फरक विचार राख्दैमा पार्टी फुट्छ र ?,’ उनले प्रश्न गरे । जिल्लादेखि केन्द्रसम्म पूर्वमाओवादी केन्द्र र पूर्वएमालेका नेता कार्यकर्ता एउटै पार्टीमा गोलबद्ध भएकाले एक भएर अगाडि बढ्ने दाबी उनको थियो ।

राष्ट्रिय र अन्तर्राष्ट्रियस्तरमा उच्च छवि बनाइसकेको हुनाले वामदेव गौतमलाई राष्ट्रिय सभामा लैजाने पार्टीले निर्णय गरेको बताउँदै दाहालले यसबारे कसैले केही भन्दैमा निर्णय परिर्वतन नहुने बताए । ‘पार्टीको निर्णयअनुरुप सबै कुरा हुनेछ,’ उनले भने ।

दाहाल शुक्रबार पत्नी सिता, छोरी गंगा दाहालसहित चौतारा साँगाचोकगढी नगर क्षेत्रको पर्यटकीय हब सुकुटेमा आइपुगेका थिए । दाहालले बिहान भोटेकोसी बीचमा ‘एडभेन्चरको र्‍याफ्टिङ’को आनन्द लिए ।