'प्रधानमन्त्रीजी, आजभोलि यताबाट हेरे पनि, उताबाट हेरे पनि 'यतिवादी' मात्रै देखिनुहुन्छ'

कान्तिपुर संवाददाता

काठमाडौँ — नेपाली कांग्रेसका सांसद गगन थापाले प्रधानमन्त्री केपी शर्मा ओलीलाई पछिल्लो घटनाक्रम तथा अडियो प्रकरणका बारे संसद्‍मा आएर प्रस्ट्याउन आग्रह गरेका छन् । उनले मंगलबारको प्रतिनिधि सभाको बैठकको विशेष समयमा बोल्दै प्रधानमन्त्रीलाई यस्तो आग्रह गरेका हुन् ।

सांसद थापाले प्रतिनिधि सभा बैठकमा दिएको अभिव्यक्तिको सम्पादित अंश -

हामीले फागुन ९ गते सञ्चार तथा सूचना प्रविधि मन्त्री गोकुल बाँस्कोटा र विजयकुमार मिश्रबीचको लेनदेनको वार्तालापको अडियो सुन्यौं। यो वार्तालाप प्रधानमन्त्रीले दुई महिना अगाडि सुन्नुभएको थियो भन्ने दाबीसहित सञ्‍चार माध्यममा समाचार आइरहेका छन्। यस विषयमा संसद्‍मा उभिएर आँखामा आँखा जुधाएर, नागरिक र हाम्रा प्रश्नको जवाफ दिने हिम्मत प्रधानमन्त्रीसँग छ कि छैन।


प्रधानमन्त्रीसँग हिम्मत नभए पनि संसदसँग यो हिम्मत हुनुपर्छ। सभामुख महोदयलाई मेरो ध्यानाकर्षण मात्रै होइन, संसदले यो सामर्थ्य राख्नैपर्छ। प्रधानमन्त्री डाँडाकाँडा डुलेर बस्ने होइन, तालतलैया हेरेर बस्ने होइन, सदनमा आउनुपर्छ। संसद्को रोष्ट्रममा उभिएर हाम्रा प्रश्नको सामना गर्नुपर्छ। हामीले उहाँलाई निम्छरो होइन, गम्भीर प्रश्न सोध्नेछौं। सभामुख महोदयलाई प्रधानमन्त्रीलाई संसदमा उपस्थित हुन रुलिङ गर्न आग्रह गर्न चाहन्छु।

प्रधानमन्त्रीले के भन्नुहुन्छ मलाई थाहा छैन। तर, उहाँका आसेपासेहरुले केही दिनदेखि भनिरहनुभएको छ, प्रधानमन्त्रीको तुलो चलाउने, तुलोमा राख्दैगर्दा कसैले नभ्याउने र प्रधानमन्त्रीकै भनाइलाई आधार मान्ने हो भने काभ्रेले आजसम्म जन्माएको सर्वाधिक प्रतिभाशाली उहाँ नेतृत्वका सरकारका प्रवक्ताले गरेका कार्य उहाँलाई थाहा छैन भनेर हामीले पत्याइ दिनुपर्ने? हामीले पत्याउने नै हो भने प्रधानमन्त्रीलाई प्रश्न छ, ‘सबै कुरा तपाईँलाई थाहा छैन भने कसलाई थाहा छ?’

नागरिकहरु के भन्दैछन् सेक्युरिटी प्रेसको मात्रै होइन, स्याटेलाइट, फोरजी विस्तार, अप्टिकल फाइबर विस्तार, मोबाइल डिभाइस म्यानेजमेन्ट सिस्टम, सामुदायिक विद्यालयलगायत सरकारी संघसंस्थामा फ्री इन्टरनेट पुर्‍याउने ठेक्काका बारेमा सबै कुरा थाहा थियो। परिस्थिति नियन्त्रण बाहिर गएपछि अहिले गोकुल बाँस्कोटालाई बलिको बोका बनाइएको छ।

प्रधानमन्त्रीले भ्रष्टाचारीको अनुहार हेर्दिन भनेर पटक–पटक दोहर्‍याउनु भएको छ। तर नागरिकहरु तपाईंलाई प्रश्न गर्दैछन्, ‘बालुवाटारमा ऐना छ कि छैन्?’ तपाईंका पार्टीका कार्यकर्ताहरु ठूलो स्वरले बोल्न सक्दैनन्। तर, संसदको लबीमा भेट्दै गर्दा हामीलाई झिनो स्वरमा कानेखुसी गर्दै भन्छन्, ‘हाम्रो प्रधानमन्त्री पहिला पहिला मार्क्सवादीजस्तो देखिनुहुन्थ्यो। बीचमा समाजवादीजस्तो देखिन थाल्नुभयो। आजभोलि यताबाट हेरे पनि, उताबाट हेरेप नि यतिवादी मात्रै देखिनुहुन्छ।’

प्रधानमन्त्रीजी तपाईंले पत्तो पाउनुभयो, एमसीसीको प्रकरणमा तपाईंका पार्टीभित्रका खाँटी राष्ट्रवादीहरुले तपाईंलाई कसरी तह लगाइदिए? अहिले जति जालझेल गरेर होइन, होइन भने पनि दुई दिन अगाडि मात्रै एउटा व्यक्तिलाई प्रधानमन्त्री बनाउन संविधान संशोधन गर्ने प्रस्ताव तयार गर्ने कार्यदल बनाउने विषयमा तपाईं जसरी कमजोर देखिनुभयो। त्यो देखिपछि तपाईंलाई बाहिर भन्दैछन्, ‘देखिँदा फेरि सुरो यथार्थमा बिचरो हुनुहुन्छ।’

प्रधानमन्त्रीजी म तपाईंको जन्मदिनको बारेका केही भन्न चाहन्‍नँ त्यो तपाईंको व्यक्तिगत विषय हो। तर, नागरिकहरु भन्दैछन् राष्ट्रिय ठाँटका साथ मनाइएको जन्मदिनले हामीलाई २०६०/०६१ सालको पूर्वराजा ज्ञानेन्द्रको न्यास्रो मेटाइदिएको छ। पूर्वराजा यसैगरी हिँडिबक्सन्थ्यो। आफैं अभिनन्दन गराउन लगाइबक्सन्थ्यो।विद्यार्थीहरुलाई आफ्नो जय जयकार गर्न लगाइबक्सन्थ्यो। र, आफ्ना भारदारलाई सोधिबक्सन्थ्यो एक दुई जना मानिसहरु यता उता विरोध गरिरहेका त छैनन् नि? भारदारले भन्थे, 'महाराज सबै ठिक छ, एक दुई जना मानिस मात्रै विरोध गरिरहेका छन्।'

अहिले प्रधानमन्त्रीले जन्मोत्सव मनाउँदा पछि लागेको भीडभाडले पूर्वराजा ज्ञानेन्द्रको न्यास्रो मेटाइदिएका छन्।

यस्ता विषय प्रधानमन्त्रीले थाहा पाउनु भएको छ कि छैन मलाई थाहा छैन। तर, थाहा पाएर पनि न थाहा पाए जस्तो गर्नुभएको छ भने त्यो पाप हो। यी कुरा थाहा पाउनु भएको छैन् भने तपाईंको अक्षमता हो। संख्या तपाईंसँग होला प्रधानमन्त्रीजी। तर, शासन गर्ने बलिदान, योग्यता, क्षमता भने अब गुमाइसक्नुभयो। तसर्थ सम्माननीय प्रधानमन्त्री जी नेपाल कम्युनिष्ट पार्टीको स्वास्थ्यका लागि र सिंगो देश नेपालको स्वास्थ्यका लागि तपाईं स्वास्थ्यलाभ गर्न गइदिनुस्। धन्यवाद !

(थापाले मंगलबारको प्रतिनिधिसभाको बैठकमा व्यक्त गरेको धारणाको सम्पादित अंश) प्रकाशित : फाल्गुन १३, २०७६ १५:३५

प्रतिक्रिया
पठाउनुहोस्

आइरिस क्रिकेटर केभिन ओ'ब्रायन पुन: काठमाडौं किंग्समा

कान्तिपुर संवाददाता

काठमाडौँ — एभरेष्ट प्रिमियर लिग(ईपीएल)का लागि काठमाडौं किंग्स इलाभेनले आयरल्यान्डका स्टार खेलाडी केभिन ओ'ब्रायनलाई भित्र्याएको छ ।

नेपाली क्रिकेटप्रेमीसामु परिचित रहेका ओ'ब्रायन सन् २०१८ मा काठमाडौं किंग्सबाटै ईपीएल खेलेका थिए। उनी त्यस संस्करणमा ७ खेलमा ९ विकेट लिँदै प्रतियोगितामै सबैभन्दा बढी विकेट लिने खेलाडी थिए। साथै प्रतियोगितामा सबैभन्दा बढी रन बनाउने पनि उनी नै थिए।

केभिन ओ'ब्रायन सन् २००६ देखि आइरिस टोलीको महत्वपूर्ण सदस्य रहेका छन्। उनले आयरल्यान्डबाट तीन वटा एकदिवसीय र ५ वटा टी-२० विश्‍वकप क्रिकेटमा सहभागिता जनाएका छन्।

काठमाडौं किंग्सका सीईओ राजजंग थापाले ओ'ब्रायन विश्‍वस्तरीय खेलाडी भएको र उनको नेतृत्व र खेलकौशलले टिमले उत्कृष्ट प्रदर्शन गर्ने विश्‍वास व्यक्त गरेका छन्।

एभरेष्ट प्रिमियर लिग आउँदाे मार्च १४ देखि त्रिवि क्रिकेट मैदानमा सुरु हुनेछ।

प्रकाशित : फाल्गुन १३, २०७६ १५:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×