पुस्तकको कर हटाउन त्रिविको आग्रह

कान्तिपुर संवाददाता

काठमाडौँ — त्रिभुवन विश्वविद्यालयले पुस्तक आयातमा लगाइएको कर हटाउन प्रधानमन्त्री तथा कुलपति केपी शर्मा ओलीलाई आग्रह गरेको छ । त्रिवि उपकुलपति धर्मकान्त बाँस्कोटाले प्रधानमन्त्री तथा मन्त्रिपरिषद् कार्यालयलाई पत्राचार गरेर पुस्तकमा कर लगाउने निर्णय पुनरावलोकन गर्न आग्रह गरेका हुन् ।

सरकारले आर्थिक वर्ष २०७६/७७ को बजेटबाट विदेशमा मुद्रण भई आयात हुने पुस्तकमा १० प्रतिशत भन्सार महसुल लगाउन थालेको हो। भन्सार महसुलका कारण विदेशी पाठ्यपुस्तक नपाइने र महँगो हुने गरेको विद्यार्थीले गुनासो गर्दै आएका छन्। विश्वविद्यालयका अधिकांश पाठ्यपुस्तक विदेशबाट आयात हुन्छन्। १० प्रतिशत कर लगाउने सरकारी निर्णयका कारण चालु आर्थिक वर्षको ६ महिनामा पुस्तक आयात ३४ प्रतिशतले घटेको राष्ट्र बैंकको तथ्यांक छ।


‘विश्वविद्यालयको पाठ्यक्रमसँग सम्बन्धित केही पुस्तक मात्र नेपालमा पाइन्छन्, विद्यार्थी र शिक्षक विदेशमा प्रकाशित पुस्तकमा भर पर्नुपर्ने बाध्यता छ,’ उपकुलपति कार्यालयले पठाएको पत्रमा भनिएको छ, ‘थप कर लागेपछि पुस्तक महँगो हुने र त्यसले विद्यार्थी तथा शिक्षकको पठनपाठनमा असर पर्ने गरेको छ।’


कर लगाइएपछि विद्यालय तहदेखि उच्च शिक्षाको पाठ्यपुस्तक बजार खुम्चिएको छ। मेडिकल, इन्जिनियरिङ लगायत उच्च शिक्षाका प्राविधिक धारका अधिकांश पुस्तक विदेशबाटै आयात हुने गर्छन्। त्रिवि पाठ्यक्रम विकास केन्द्रका प्रमुख पारसनाथ यादवले स्नातकोत्तर तहका पुस्तकका लागि विदेशी प्रकाशनमै भर पर्नुपर्ने अवस्था रहेको जनाए।


मुलुकमा सञ्चालित अन्य विश्वविद्यालयका विद्यार्थीले समेत करका कारण पुस्तक महँगो हुने गरेको गुनासो गरेका छन्। व्यवसायीले पुस्तकमा लगाइएको कर हटाउन सरकारलाई आग्रह गर्दै आएका छन्। प्रकाशित : फाल्गुन १०, २०७६ २०:४५

ADVERTISEMENT
प्रतिक्रिया
पठाउनुहोस्
ADVERTISEMENT

बम डिस्पोज गर्दा घरमा क्षति

अर्जुन शाह

धनगढी — बाजुरा सदरमुकाम मार्तडीमा जिल्ला प्रहरी कार्यालयको छेवैमा रहेको गैरसरकारी संस्था पीसविन बाजुराको कार्यालयको आँगनमा शनिबार भेटिएको प्रेसर कुकर बम निष्क्रिय गर्ने क्रममा कार्यालय सञ्चालन भएको घरमा क्षति भएको छ । 



बम डिस्पोज गर्ने क्रममा कार्यालयका सामग्री र घरमा क्षति भएको जिल्ला प्रहरी कार्यालयले जनाएको छ। कार्यालय भाडाको घरमा छ। घरधनी धर्म रोकायाका अनुसार पक्की घर चर्किएको र झ्याल/ढोकाका सिसा सबै फुटेका छन्। ‘घरमा ६ लाख बढीको क्षति भएको छ,’ रोकायाले भने।

शुक्रबार साँझै पीसविनका कर्मचारीहरुले कालो झोलाभित्र राखेको वस्तु देखेका भएपनि वास्ता गरेका थिएनन्। उनीहरुले शनिबार बिहान प्रहरीलाई खबर गरेका हुन्। प्रहरीले बम रहेको अनुमान गरेपछि मार्तडीस्थित सेनाको गुल्ममा खबर गरेको थियो।

सेनाको बम डिस्पोजल टोलीले निष्क्रिय गराउने क्रममा घरमा क्षति भएको हो। बाजुराका प्रमुख जिल्ला अधिकारी गंगाप्रसाद न्यौपानेले बम भेटिएको स्थानबाट यताउता सार्न नमिल्ने भएकाले सेनाले त्यही निष्क्रिय गरेको जानकारी गराएको बताएका छन्। उनले घरमा भएको क्षतिको मूल्यांकन गर्न प्रतिनिधि खटाइएको बताएका छन्। बम कसले राखेको हो भन्ने अनुसन्धान भइरहेको उनले बताए।

प्रकाशित : फाल्गुन १०, २०७६ २०:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×