२२२ रोपनीको विवाद टुंग्याउन आदेश

लालप्रसाद शर्मा

(पोखरा) — पृथ्वीनारायण क्याम्पससँगैको २२२ रोपनीभन्दा बढी विवादित जग्गाको टुंगो लगाउन उच्च अदालत पोखराले मालपोत कार्यालय कास्कीलाई आदेश गरेको छ । पोखरा–१ बगरस्थित तल्लो तगराको कित्ता नम्बर ८३३ को उक्त जग्गा पृथ्वीनारायण क्याम्पसको कि व्यक्तिको भन्ने विवाद लामो समयदेखि जारी छ । 

मुख्य न्यायाधीश यज्ञप्रसाद बस्याल र न्यायाधीश डालकुमार खड्काको संयुक्त इजलासले आइतबार कास्की मालपोतलाई आदेश दिएको हो । उक्त जग्गाको टुंगो नलगाई व्यक्तिले आफ्नो दाबी गरी जग्गा दर्ताका लागि दिएको निवेदन मालपोतले तामेलीमा राखिदिएको थियो । स्थानीय ध्रुवप्रसाद पराजुलीसहित ८६ जनाले उक्त जग्गा आफ्नो भएको दाबी गर्दै मालपोतमा निवेदन दिएका थिए ।


पृथ्वीनारायण क्याम्पस र विभिन्न विद्यार्थी संगठनले उक्त जग्गा क्याम्पसकै नाममा हुनुपर्ने भन्दै आएका छन् ।


‘वादी र प्रतिवादीले दाबी गरेको जग्गामा निजहरूको दाबी पुग्ने/नपुग्ने सम्बन्धमा आवश्यक छानबिन र जाँचबुझ गरी बुझ्नपर्ने प्रमाण बुझी शीघ्र निर्णय गर्नुपर्नेमा त्यो नगरी लामो समयसम्म दर्ता प्रक्रिया रोक्का राख्ने कास्की मालपोत कार्यालयको निर्णय गैरकानुनी देखिँदा तामेली आदेश उत्प्रेषणको आदेशले बदर हुने ठहर्छ,’ आदेशमा भनिएको छ ।


मालपोतले २०६७ पुस २९ को निर्णय आदेशबमोजिम भनी २०७६ असार ४ मा विवादित जग्गासम्बन्धी निवेदन तामेलीमा राखेको थियो ।

‘आदेशको सार भनेको जग्गा दर्ता निवेदनको कारबाही नगरी तामेलीमा राखिएकामा त्यो नगरी अन्य प्रमाण बुझेर मालपोत आफैंले टुंगो लगाउने वा अदालतमा जान भनिएको हो,’ उच्च अदालत पोखराका उपरजिस्ट्रार पुष्पराज दाहालले भने ।


यस मुद्दामा प्रशासन, मालपोत र नापी कार्यालय कास्की, पृथ्वीनारायण क्याम्पस, नेपाल विद्यार्थी संघ, अनेरास्ववियु क्रान्तिकारी, अखिल छैटौं, अनेरास्ववियु एकीकृत र अनेरास्ववियु प्रतिवादी छन् । उक्त जग्गा स्थानीयले २०३२ यता चारपटकसम्म दर्ताको पहल थालेका थिए । तर क्याम्पसले पनि आफ्नो दाबी गरेपछि दर्ता रोकिएको हो ।


त्यसपछि स्थानीयले २०४० मा मालपोत कार्यालयमा जग्गा दर्ताको निवेदन दिएका थिए । तर मालपोतले अहिलेसम्म कुनै टुंगोमा नपुर्‍याई निवेदन तामेलीमा राखिदिएको थियो ।


कास्की प्रशासनले २०६७ वैशाख १४ मा मालपोतलाई लेखेको पत्रका आधारमा जग्गा दर्ता प्रक्रिया रोक्का राखी निवेदकको निवेदन तामेलीमा राखेको देखिएको अदालतले जनाएको छ । प्रकाशित : फाल्गुन ६, २०७६ ०७:४१

ADVERTISEMENT
प्रतिक्रिया
पठाउनुहोस्
ADVERTISEMENT

अन्नपूर्ण क्षेत्रको हिमपहिरोमा परी ७ बेपत्ता, उद्धारमा ३ हेलिकप्टर (अपडेट)

लालप्रसाद शर्मा

पोखरा — प्रसिद्ध पर्यटकीयस्थल अन्नपूर्ण आधार शिविर जाने र फर्कने क्रममा हिमपहिरोमा परेर सम्पर्कविहीन विदेशी पर्यटक, नेपाली गाइड र पोर्टरको खोजी जारी छ ।

अन्नपूर्ण आधार शिविर, माछापुच्छ्रे आधार शिविर लगायत स्थानमा रहेका विदेशी र आन्तरिक पर्यटकको उद्धारको लागि तीनवटा हेलिकोप्टर परिचालन गरिएको प्रहरीले जनाएको छ ।

कास्की प्रहरी प्रमुख दानबहादुर कार्कीका अनुसार एयर डाइनेष्टी, सिम्रिक र प्रभुका तीन हेलिकप्टर अहिले अन्नपूर्ण क्षेत्रमा खटिएका छन् । अहिलेसम्म २० पर्यटकलाई पोखरा ल्याइसकिएको छ भने ५५ जनालाई छोम्रोङमा ल्याइएको छ । ‘ठूलो संख्यामा कोरियन, अस्ट्रेलियन र चाइनिज पर्यटक गएका रहेछन्’ कार्कीले भने, ‘हिमपातले बाटो छेकिएपछि उनीहरुलाई उद्धार गरिएको हो ।’

कास्कीको अन्नपूर्ण गाउँपालिका–११ हिमालय र देउरालीबीचको हिङकुमा शुक्रबार विहान ११ बजेतिर आएको हिमपहिरोमा ७ बेपत्ता भएको प्रहरीले जनाएको छ । कार्कीका अनुसार ४ कोरियन पर्यटक र ३ नेपाली सम्पर्कविहीन छन् । सञ्चार सम्पर्क नहुँदा यसअघि सम्पर्क विहीन हुनेको संख्या फरकफरक आएको थियो । बिहीबार र शुक्रबारको ठूलो हिमपातपछि हिम पहिरो आएको र सम्पर्क विहीन त्यही पहिरोमा परेको अनुमान गरिएको छ ।

घटनास्थल पुगेका देवकाजी गुरुङका अनुसार बाक्लो हिउँ जमेका कारण घटनास्थलमा तत्काल कुनै पनि उद्धार गर्न सकिने अवस्था छैन । ‘एउटा प्लास्टिक हिउँमा पुरिएको अवस्थामा देखिएको छ । अरु अत्तोपत्तो छैन । पहिरोले अघि बढ्ने अवस्था पनि छैन,’ गुरुङले टेलिफोनमा भने, ‘हिउँ नपग्लिएसम्म उद्धार गर्न सकिने अवस्था छैन ।’

प्रकाशित : माघ ४, २०७६ ११:२८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×