'कान्तिपुर कनक्लेभ' दोस्रो दिन पनि जारी- समाचार - कान्तिपुर समाचार
कान्तिपुर वेबसाईट
AdvertisementAdvertisement

'कान्तिपुर कनक्लेभ' दोस्रो दिन पनि जारी

कान्तिपुर संवाददाता

काठमाडौँ — शुक्रबारबाट काठमाडौंमा सुरु भएको दोस्रो कान्तिपुर कनक्लेभमा आज पनि विभिन्न सत्रहरुमा छलफल चलिरहेका छन् ।

कनक्लेभमा संसारभर छरिएका नेपालीलाई कसरी जोड्नेदेखि कला र साहित्यले मानिसहरुलाई कसरी जोड्छ भन्नेलगायतका विषयमा छलफल भएका छन् । यस्तै, जलवायु परिवर्तन र डिजिटल दुनियाँको भविष्यका बारे छलफल भए ।


छलफलहरुमा भारतीय लेखकहरु नमिता गोखले, प्रज्‍ज्‍वल पराजुली तथा सिक्किमका पुस्तक प्रकाशक रमण श्रेष्ठलगायत सहभागी थिए । भुषिता वशिष्ठ, मिस नेपाल अनुश्का श्रेष्ठ पनि छलफलमा सहभागी थिए ।


यस्तै राइड सेयरिङ एप पठाओका सीईओ हुसेन एम इलियसले विद्वत् प्रवचन दिएका थिए । इलियसले धेरैका लागि पठाओ राइडसेयरिङ एप मात्रै भए पनि आफ्ना लागि भने व्यवसायीका लागि प्लेटफर्म भएको बताए । नेपालले आफूलाई व्यक्तिगत र व्यावसायिक विकासका लागि नेपालले सहयोग गरेको उनले बताए । उनले नेपालको समृद्धिका लागि यहाँकाे युवा पुस्ता तयार रहेकाे पनि बताए । १० वर्षमा धेरै परिवर्तन भएको उल्लेख गर्दै इलियसले आगामी १० वर्षमा नेपालले सूचना प्रविधिको क्षेत्रमा व्यापक क्रान्ति गर्ने विश्‍वास व्‍यक्त गरे ।



कनक्लेभमा आजै 'नेपालमा मिटु अभियान किन अघि बढेन' भन्ने विषयमा नेतृ मानुषी यमि भट्टराई, नाट्यकर्मी आकांक्षा कार्की तथा अधिवक्ता दुर्गा कार्कीले छलफल गर्दैछन् । राजनीतिक र स्वतन्त्रताको सवालमा नेपाल अघि बढिरहेको छ कि पछि जान लागेको छ भन्ने विषयमा परराष्ट्रमन्त्री प्रदीप ज्ञवाली, कांग्रेस नेता गगन थापा तथा मानवअधिकार आयोगकी सदस्य मोहना अन्सारीबीच छलफल हुनेछ ।


'बदलिँदो भू-राजनीतिमा नेपाल' शीर्षकमा समाजशास्त्री चैतन्य मिश्र, भारतीय प्राध्यापक महेन्द्र पी लामा र पूर्वराजदूत महेश मास्केबीच छलफल हुनेछ ।


साँझको अन्तिम सत्रमा भने कान्तिपुरका प्रधानसम्पादक सुधीर शर्माले नेकपा अध्यक्ष पुष्पकमल दाहालसँग परिसंवाद गर्नेछन् ।


कनक्लेभको इकान्तिपुरले फेसबुक र युट्युबमार्फत् प्रत्यक्ष प्रसारण गरिरहेको छ ।

प्रकाशित : माघ २५, २०७६ १३:४५
प्रतिक्रिया
पठाउनुहोस्

कुशल र विनोदको अर्धशतकले नेपालको चुनौतीपूर्ण स्कोर

विनोद पाण्डे

काठमाडौँ — कुशल मल्लले विश्व कीर्तिमान बनाउँदै अर्धशतकीय इनिङ्स खेलेपछि नेपालले क्रिकेट विश्वकप लिग २ मा अमेरिकालाई १ सय ९१ रनको लक्ष्य दिएको छ । ४९ रनमा ५ विकेटको दयनीय स्थितिलाई सुधार्नेक्रममा विनोद भण्डारीले पनि अर्धशतक बनाए । 


अमेरिकाले टस जितेपछि ब्याटिङमा आएको नेपालको तर्फबाट कुशलले ५० र विनोदले ५९ रन बनाएपछि नेपाल ४९.२ ओभरमा १ सय ९१ रन बनाउँदै अलआउट भएको हो ।

कुशलको यो डेब्यु खेल हो । उनले १५ वर्ष ३ सय ४० दिनको दिनमा अर्धशतक बनाउँदै एकदिवसीय अन्तर्राष्ट्रियमा सबैभन्दा कम उमेरमा ५० रन पुरा गर्ने खेलाडी बनेका हुन् ।

उनलाई शनिबार रोहित पौडेलको स्थानमा खेलाइएको थियो र रोहितले एक वर्षअघि दुबईमा युएईविरुद्ध सबैभन्दा कम उमेरमा अर्धशतक बनाएको कीर्तिमानलाई कुशलले उछिनेका हुन् ।

कुशलले ५१ बलको इनिङ्समा ४ चौका र ३ छक्का प्रहार गरे । उनले विनोदसँग छैटौं विकेटमा ८४ रनको महत्वपूर्ण साझेदारी गरी नेपाललाई खेलमा फर्काएका थिए ।

विनोदले ७९ बल खेली ६ चौका र १ छक्का प्रहार गरेका थिए । उनीपछि आएका करण केसी १२ रनमा आउट भए भने सन्दीप लामिछाने शुन्यमा पेभेलियन फर्किए । सुसन भारी आउट हुने अन्तिम खेलाडी थिए । उनले ११ रन बनाए । अविनाश बोहरा ५ रनमा अविजित रहे ।

यसअघि नेपाल २२ औं ओभर नेपालले ४९ रन बनाउँदा ५ विकेट गुमाइसकेको थियो । नेपाल ३ रनको अन्तरमा ४ विकेट गुमाएपछि दबाबमा आएको थियो । कप्तान ज्ञानेन्द्र मल्ल र पारस खड्काले दोस्रो विकेटमा ४० रनको साझेदारी गरेपछि नेपाल १ विकेट गुमाइ ४६ रनको स्कोरमा पुगेको थियो ।

तर त्यसपछि ज्ञानेन्द्र २१, दीपेन्द्र ऐरी शुन्य, पूर्वकप्तान पारस १९ र आरिफ शेख २ रनमा आउट भएपछि नेपाल नाजुक स्थितिमा पुगेको थियो । ओपनर सुवास खकुरेल ३ रनमा यसअघि नै आउट भइसकेका थिए ।

त्रिकोणात्मक शृंखलामा नेपाल र अमेरिका दुवै पहिलो विजयको खोजिमा छ । नेपाल र अमेरिका दुवैलाई उनीहरुको पहिलो खेलमा ओमानले पराजित गरेको थियो ।

प्रकाशित : माघ २५, २०७६ १३:४४
पूरा पढ्नुहोस्
प्रतिक्रिया
पठाउनुहोस्
×