धौवादी फलामखानीको सेयर स्थानीयलाई दिन्छौं : उद्योगमन्त्री
नवलपरासी — उद्योगमन्त्री लेखराज भट्टले धौवादी फलामखानीको सेयर स्थानीय नागरिकलाई दिइने र रोजगारीमा पहिलो प्राथामिकता पनि स्थानीयलाई नै दिने बताएका छन् ।
३ वर्षभित्र फलाम निकाल्नेगरी सरकारले सबै तयारी गरेको उनले जानकारी दिए । कम्तीमा ५० वर्षसम्म फलाम निकाल्न मिल्ने खानी भएकाले यो कारखाना सञ्चालन भएपछि स्थानीय बासिन्दाको जीवनमा कायापलट आउने मन्त्री भट्टले दाबी गरे ।
मंगलबार पूर्वी नवलपरासीको धौवादी फलाम खानी निरीक्षणका लागि आएका उद्योगमन्त्रीले हुप्सेकोट गाउँपालिकामा आयोजित कार्यक्रममा प्रधानमन्त्रीले यो फलामखानीवाट चाँडो फलाम निकाल्न निर्देशन आएको बताए । संघीय सरकारले धौवादी फलामखानीलाई प्राथमिकतामा राखेको उनले बताए । खानी निरीक्षणका लागि उद्योगमन्त्रीसँग उद्योग सचिव यमकुमारी खतिवडा र फलामखानी कम्पनी लिमिटेडका विभागीय प्रमुखहरु आएका थिए ।
धौवादी फलामखानीबाट फलाम निकाल्न उद्योग मन्त्रालयका सहसचिवको संयोजकत्वमा धौवादी फलामखानी कम्पनी लिमिटेड गठन भई काम सुरु भएको छ ।
धौवादी फलाम कम्पनी लिमिटेड गठन
हुप्सेकोट गाउँपालिका र बुंदीकाली गाउँपालिकाको सीमामा १० किलोमिटर लामो फलाम खानी भेटिएपछि सरकारले फलाम निकाल्ने प्रक्रिया अघि बढाएको छ । पहिलो चरणमा फलामखानीसम्म पुग्ने पक्की सडक बनाउने काम सुरु भइसकेको छ ।
सरकारले पहिलो चरणमा धौवादी फलामखानीका लागि २५ करोड रुपैयाँ निकासा गरेको खानी तथा भूगर्भ विभागले जानकारी दिएको छ ।
प्रकाशित : माघ २२, २०७६ ०९:२४
