शिवमायाको राजीनामापछि अबको बैठक ठाकुरले संचालन गर्ने- समाचार - कान्तिपुर समाचार
कान्तिपुर वेबसाईट
AdvertisementAdvertisement

शिवमायाको राजीनामापछि अबको बैठक ठाकुरले संचालन गर्ने

कान्तिपुर संवाददाता

काठमाडौँ — उसपभामुख शिवमाया तुम्बाहाङ्फेले पदबाट राजीनामा दिएकी छन् । प्रतिनिधिसभाको पहिलो बैठक सकिए लगत्तै सिंहदरवारस्थित संसद सचिवालयमा पुगेर तुम्बाहाङ्फेले राजीनामा बुझाएकी हुन् । 

‘नेपालको संविधानको धारा ९१ को उपधारा (६) को खण्ड (ख) तथा प्रतिनिधिसभा नियमावली, २०७५ को नियम ११ को उपनियम (१) बमोजिम प्रतिनिधिसभाको उपसभामुख पदबाट मैले आजैको मितिदेखि लागू हुनेगरी राजीनामा दिएको व्यहोरा अनुरोध गर्दछु,’ सभामुखलाई सम्बोधन गर्दै बुझाएको राजीनामामा तुम्बाहाङ्फेले भनेकी छन् ।


अपरान्ह ४ बजेका लागि पुनः बोलाइएको संसद बैठकको अध्यक्षता जेष्ठ सदस्य महन्थ ठाकुरले गर्नेछन् ।

ठाकुर संसद सञ्चालन गर्नका लागि पद तथा गोपनियताको सपथ लिन राष्ट्रपति कार्यालय शितलनिवास जाँदैछन् ।

संसद बैठकको सुरुमा अध्यक्ष ठाकुरले प्रतिनिधिसभा नियमावली २०७५ को नियम २११ को उपनियम (१) बमोजिम उपसभामुख तुम्बाहाङ्फेले दिएको राजीनामा पत्र पढेर सुनाउने कार्यतालिका संसद सचिवालयले तय गरेको स्रोतले बताएको छ ।


त्यसपछि रिक्त सभामुख पदको निर्वाचन प्रक्रिया सुरु गर्ने कार्यतालिका छ ।

प्रकाशित : माघ ६, २०७६ १५:०१
प्रतिक्रिया
पठाउनुहोस्

राजीनामापछि शिवमायाले भनिन्- ‘बाजी मैले नै मारें तर पितृसत्ता फाल्न बाँकी छ’

जयसिंह महरा

काठमाडौँ — उपसभामुख शिवमाया तुम्बाहाङ्फेले प्रतिनिधिसभालाई नेतृत्वविहीन हुन नदिन आफूले अहिलेसम्म राजीनामा नदिई बसेको बताएकी छिन् । संसद सचिवालयमा राजीनामापत्र बुझाएपछि संसद भवन बानेश्वरमा पत्रकारहरुसँग कुरा गर्दै तुम्बाहाङ्फले संविधानले नै प्रतिनिधिसभालाई नेतृत्वविहीनको कल्पना नगरेकाले अहिलेसम्म राजीनामा नदिएको स्पष्ट पारेकी हुन् ।  

संसदको ठूलो पार्टीले सभामुखको उम्मेदवारको टुंगो लगाएकाले आफूले सोमबार मात्रै राजीनामा दिएको स्पष्ट पारेकी हुन् ।राजीनामा नगर्नु र सभामुखका लागि दाबी गर्नुमा आफूलाई कुनै संस्था वा व्यक्तिको संरक्षण नभएको पनि स्पष्ट पारिन् । उनले भनिन्, ‘मेरो ब्याकअपमा कुनै व्यक्ति वा संस्था होइन,संविधान थियो । व्यक्ति र संस्था संविधानपछिका हुन् । मलाई संविधानले नै यहाँसम्म पुर्‍याएकाे हो । आज पनि अगाडि बढेको भए नेकपासँग संविधानअनुसार महाभियोग लगाउने मात्र विकल्प थियो । मैले हटाउने भए महाभियोग लगाएर हटाउ पनि भनेकी थिएँ, तर हामी सबैले यसको सहज निकास निकाल्यौँ ।’

तुम्बाहाङ्फेले कसैको निर्देशनमा राजीनामा नदिएको पनि उनले स्पष्ट पारिन् । उनले भनिन्, ‘मैले जे बोले त्यो पुर्‍याएँ । नेताले भनेको आधारमा होइन संविधानले दिएको अधिकारको आधारमा मैले राजीनामा गरेँ ।’

उनले उपसभामुखबाट राजीनामा दिन दलले दिएको निर्देशन नमानेकै पनि बताइन् । उनले भनिन्, ‘मैले दलको निर्देशन नमानेकै हो । आग्रह भएको भए सोचिन्थ्यो । म दलको उपसभामुख थिइनँ । प्रतिनिधिसभाको थिएँ, दलीय व्यवस्थाअनुसार उपसभामुख निर्वाचित भएकाले दलसँग समन्वय र सहकार्य गरिरहेकी थिएँ ।’
आफूले दलीय स्वार्थबाट बाहिर रहेर जिम्मेवारी सम्हालेको बताउँदै उनले भनिन्, ‘दलको अर्डरबाट प्रतिनिधि सभालाई जोगाउन सक्छु कि सक्दिनँ भन्ने लडाइँमा थिएँ । त्यसमा सफल भएकी छु । आजको दिनसम्म आइपुग्दा संविधानअनुसार चलेकी थिएँ । तर त्यसमा बाधाहरु पनि धेरै थिए ।’

आफूले राजीनमा दिएपछि प्रतिनिधिसभामा नयाँ नेतृत्व सुनिश्चित भएको पनि तुम्बाहाङ्फेले बताइन् । आजका दिनसम्म प्रतिनिधिसभालाई आफूले रिक्त रहन नदिएको उनले बताइन् ।

मुलुकमा पितृसंस्था सोच मात्रै नभई संस्थागत रुपमा जरा गाडेर बसेको पनि उनले टिप्पणी गरिन्, ‘नेपालमा पितृसत्ता एकदम बलियो छ । राजसंस्थालाई सहजै फालिदियौँ तर पितृसत्ता फाल्न बाँकी छ, गाह्रो पनि छ ।’
संस्थालाई प्रणालीगत रुपमा अगाडि बढाउने सवालमा आफूले बाजी मारेको दाबी गर्दै उनले भनिन्, ‘बाजी मैले नै मारें । अब मेरो कामको ट्रयाक चेन्ज भएको छ । परिवर्तन भएको छ । युटर्न भएको छ । म नयाँ लक्ष्यसहित अगाडि बढ्नेछु ।’ तर तुम्बाहाङ्फेले ‘युटर्न’, ‘नयाँ लक्ष्य’ र ‘ट्रयाक चेन्ज’ के हो त भन्ने प्रश्नको उत्तरमा भविष्यमै दिने बताइन् ।

अब मन्त्री बन्नुहुन्छ त भन्ने प्रश्नमा भने अहिलेसम्म कुनै सहमति नभएको उनले बताइन् ।

प्रकाशित : माघ ६, २०७६ १४:५५
पूरा पढ्नुहोस्
प्रतिक्रिया
पठाउनुहोस्
x
×