८ जना विरुद्ध भ्रष्टाचार मुद्दा दायर

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले बैंकको रकम आफूले निकालेर अनियमितता गरेको आरोपमा आठ जना विरुद्ध भ्रष्टाचार मुद्दा दायर गरेको छ ।

अख्तियारले कृषि विकास बैंकको न्यूरोड शाखाकी सहायक दिपिका रेग्मीसहित शाखा प्रबन्धक प्रेमहरी ढुंगेल, ऋण शाखा प्रमुख गोपाल गिरी, ऋण अधिकृत सलिल रेग्मी, ऋण शाखाका अर्का प्रमुख महेश्वर मरहट्टामाथि भ्रष्टाचारमुद्दा दायर गरेको हो । त्यसैगरी तारानाथ पाण्डे, रमेशराज विष्ट र दुर्गा ज्वेलर्सका सञ्चालक प्रकाश घतानीलाई पनि अख्तियारले विपक्षी बनाएको छ ।


अख्तियारले सहायक रेग्मी र ढुंगेलमाथि चार करोड २४ लाख रुपैंया र गिरीमाथि दुई करोड ६१ लाख रुपैंया बिगो मागदाबी गरेको छ ।


ऋण अधिकृत रेग्मीमाथि एक करोड १० लाख,विष्टमाथि चार करोड २४ लाख,घतानीमाथि दुई करोड ६७ लाख रुपैंया बिगो मागदाबी गरेको छ । उनीहरुले एकाउन्ट पेशी चेक अर्का खातामा पठाई त्यहाँबाट रकम निकालेको आरोप छ ।

प्रकाशित : पुस २९, २०७६ १९:३३
प्रतिक्रिया
पठाउनुहोस्
ADVERTISEMENT
ADVERTISEMENT

प्रदेश-१ र कर्णाली प्रदेशमा बुधबार सार्वजनिक बिदा

कान्तिपुर संवाददाता

काठमाडौँ — प्रदेश नम्बर १ र कर्णाली प्रदेशले बुधबार सार्वजनिक बिदा दिएका छन् । प्रदेश एकमा माघे संक्रान्ति र कर्णाली प्रदेशमा माघी पर्वको अवसरमा बिदा दिइएको हो । दुवै प्रदेशका मन्त्रिपरिषद् बैठकले सार्वजनिक बिदा दिने निर्णय गरेका हुन् ।

प्रदेश १ मन्त्रीपरिषदको बैठकले माघ १ गते माघे संक्रान्तिको अवसरमा सार्वजनिक बिदा दिने निर्णय गरेको सरकारका प्रवक्ता एवं आन्तरिम मामिला तथा कानून मन्त्री हिक्मत कार्कीले बताए । माघी पर्वको अवसरमा प्रदेश १ प्रमुख सोमनाथ अधिकारी शुभकामना सन्देशसमेत दिएका छन् ।

कर्णाली प्रदेश सरकारको कात्तिक १९ गते बसेको मन्त्रिपरिषद् बैठकले माघी पर्वमा बिदा दिने निर्णय गरेको थियो । सोही निर्णयका आधारमा माघ १ गते सार्वजनिक बिदा हुनेगरी सूचना प्रकाशन गरिएको आन्तरिक मामिला तथा कानून मन्त्रालयका प्रवक्ता तुलबहादुर खड्काले जानकारी दिए । बुधबार कर्णाली प्रदेशभरका सबै सरकारी र सार्वजनिक कार्यालयका साथै विद्यालयहरु बिदा हुनेछन् ।

प्रकाशित : पुस २९, २०७६ १९:०९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×