कान्तिपुर वेबसाईट
AdvertisementAdvertisement

स्ववियु निर्वाचनको तयारी थाल्न निर्देशन

कान्तिपुर संवाददाता

काठमाडौँ — त्रिभुवन विश्वविद्यालयले स्वतन्त्र विद्यार्थी युनियनको तयारी थाल्न क्याम्पसहरूलाई निर्देशन दिएको छ । उपकुलपति धर्मकान्त बाँस्कोटा र विद्यार्थी कल्याण तथा खेलकुद निर्देशनालयका निर्देशक गंगाबहादुर थापाले क्याम्पस प्रमुखहरूलाई डाकेर फागुन १४ गते निर्वाचन गर्नेगरी तयारी थाल्न भनेका हुन् ।

छलफलमा क्याम्पस प्रमुखहरू निर्वाचन गराउन सकारात्मक भएका छन् । उनीहरूले स्ववियु निर्वाचनको तयारी र प्रक्रिया अघि बढाउने समेत प्रतिबद्धता जनाएका छन् । निर्वाचन तयारी थाल्न निर्देशनालयले मुलुकभरका क्याम्पसलाई परिपत्र पनि गरेको छ । त्रिवि कार्यकारी परिषद्को निर्णयअनुसार फागुन १४ मा निर्वाचन सम्पन्न गराउन पूर्वतयारीका लागि क्याम्पस प्रमुखलाई निर्देशन दिइएको जानकारी थापाले दिए ।


घोषणा भएसँगै विद्यार्थी संगठन पनि निर्वाचन गराउन सकारात्मक देखिएका छन् । ०७३ मा निर्वाचित स्ववियु पदाधिकारीको म्याद ०७५ फागुनमा सकिएको थियो । त्यसपछि ६/६ महिनाका लागि दुई पटक थपिएको म्याद आगामी फागुन १३ बाट सकिँदै छ । ०७३ मा अधिकांश आंगिक क्याम्पसमा निर्वाचन हुन सकेको थिएन ।


त्रिविले विद्यार्थी भर्नालगायतका काम समयसीमाभित्रै सक्न भनेको छ । यतिबेला स्नातकोत्तर तहको भर्ना चलिरहेको छ । त्रिविले एक साताभित्रै निर्वाचनसम्बन्धी कार्यतालिका सार्वजनिक गरेर थप प्रक्रिया अघि बढाउने थापाले जनाए । निर्वाचनका लागि उम्मेदवार बन्न २८ वर्षको उमेर हद तोकिएको छ ।

प्रकाशित : पुस २८, २०७६ २१:५८
प्रतिक्रिया
पठाउनुहोस्

निर्मला पन्त प्रकरण : धर्नामा प्रहरी हस्तक्षेप

कान्तिपुर संवाददाता

कञ्चनपुर — बलात्कारपछि हत्या गरिएकी बालिका निर्मला पन्तको हत्यारा पत्ता लगाउन माग गर्दै सोमबार जिल्ला अदालतअगाडि धर्ना बसेका महिला अधिकारकर्मीमाथि प्रहरीले हस्तक्षेप गरेको छ ।

सो क्रममा अधिकारकर्मी शारदा चन्द घाइते भएकी छन् । उनको घाँटी र पेटमा चोट लागेको छ । महाकाली अस्पतालमा उपचार हुन नसकेर उनलाई धनगढी रिफर गरिएको छ । ‘हामी शान्तिपूर्ण रूपमा धर्नामा थियौं, प्रहरीले हामीमाथि दमन गरेको छ,’ अधिकारकर्मी चन्दले भनिन्, ‘पुरुष प्रहरीले समेत हातपात गरे ।’

डेढ वर्षअघि भएको घटनामा संलग्न हालसम्म पनि पत्ता नलागेको भन्दै उनीहरूले धर्ना दिएका थिए । धर्नाकारीले निर्मलाको न्यायका लागि भएको आन्दोलनमा घाइते भएकाहरूले उपचार खर्च पाउनुपर्ने समेत माग राखेका छन् । ‘वास्तविक अपराधी पत्ता लगाउनुपर्ने हाम्रो मुख्य माग हो,’ अर्की अधिकारकर्मी लक्ष्मी मल्लले भनिन् ।

प्रकाशित : पुस २८, २०७६ २१:४६
पूरा पढ्नुहोस्
प्रतिक्रिया
पठाउनुहोस्
×