बहुमतको निर्णय सच्च्याउन जिल्ला सभापतिहरुको माग

कांग्रेस केन्द्रीय कार्यसमितिको पुस ११ को बैठकले आगामी अधिवेशन र महाधिवेशनको प्रयोजनका लागि मात्र भन्दै विधानको धारा ४ (२), धारा ४ (१०) (ञ), धारा ४ (१२) (ख), धारा ३५ (२) (घ), धारा ५० (६) निलम्बन गर्ने निर्णय गरेको थियो । यी धारामा सदस्यता सम्बन्धि व्यवस्था गरिएको छ। यी धारा निलम्बन गरी केन्द्रीय समितिले सिधै क्रियाशील सदस्यता दिनसक्ने व्यवस्था गरिएको छ ।

भेलाका सहभागी रोल्पा जिल्ला सभापति अमरसिंह पुनले कब्जा गर्ने शैलीबाट पार्टी चल्न नहुने बताए । ‘एक वर्षअघि महासमिति बैठकले सर्वसम्मत पास गरेका विधानका धारा कार्यान्वयन नहुँदै निलम्बन गर्ने कार्य स्वीकार गर्न सकिन्नँ,’ पुनले भने । पौडेल पक्षले बहिस्कार गरेपछि संस्थापनले बहुमतका आधारमा यो निर्णय गरेको थियो ।

आफूहरुको बहिष्कारबीच केन्द्रीय कार्यसमिति बैठकबाट बहुमतले सभापति देउवाले गरेको विधानका धारा निलम्बन गर्ने निर्णय सच्च्याउन दबाब दिन नेता पौडेलले आफूनिकट सभापतिको भेला बोलाएका हुन् ।

कांग्रेस नुवाकोट सभापति जगदिश्वरनरसिंह केसीका अनुसार सोमबारको भेलामा ४५ जिल्ला सभापति सहभागि छन् । उनले मंगलबारसम्म सहभागि हुने सभापतिको संख्या ५१ पुग्ने बताए ।

सभापतिहरुको भेला सुरु गर्दै नेता पौडेलले पुस ११ गते केन्द्रीय कार्यसमितिले बहुमतले गरेको विधानका धारा निलम्बन गर्नेलगायत निर्णय सच्च्याउनुपर्ने बताए । ‘सभापतिजी बहुमतको आधारमा एकलौटी अघि बढ्नुभयो । पार्टीकै इतिहासमा पहिलोपटक बहुमतले महाधिवेशनको मिति घोषणा गर्ने काम भयो,’ पौडेलले भने, ‘महासमिति बैठकले सर्वसम्मत पास गरेका विधानका धारा केन्द्रीय समितिबाट बहुमतका आधारमा निलम्बन गर्ने निर्णय गरियो । यो विधिसम्मत छैन, सच्याउनुपर्छ ।’

विवादित विषयमा बनिसकेको सहमति एकाएक एकलौटी ढंगले सभापति अगाडि बढेपछि उल्टिएको उनको भनाई थियो ।

पौडेलले जिल्ला सभापतिहरुसँग अब कसरी अगाडि बढ्ने भन्ने विषयमा सूझाव पनि मागेका थिए ।

भेलाको सुरुमा विवाद समाधानका लागि वार्ता गरिरहेका नेता प्रकाशमान सिंह र महामन्त्री शशाङ्क कोइरालाले पार्टीमा पछिल्लो समय बल्झिएको विवादबाट ब्रिफिङ गरेका थिए । सभापति देउवा बहुमतका आधारमा पेलेरै अघि बढ्ने मनस्थितिमा रहेको भन्दै निर्णय सच्याउन दबाब दिनुपर्ने भनाई उनीहरुको थियो ।

नेताहरुको ब्रिफिङपछि बोल्ने जिल्ला सभापतिहरुले पार्टीलाई विधिसम्मत चलाउन दबाब दिन आफूहरु जेसुकै गर्न पनि तयार रहेको बताएका थिए । सोमबारको भेलामा कांग्रेस रोल्पा सभापति अमरसिंह पुन, बर्दियाका सञ्जय गौतम, धादिङका रमेश धमला, सुनसरीका राजीव कोइराला, काभ्रेका मधु आचार्यलगायत १४ जिल्ला सभापतिले धारणा राखेका थिए ।

काभ्रे सभापति मधु आचार्यले महासमितिले बनाएको विधान केन्द्रीय समितिले निलम्बन गर्न नमिल्ने बताए । सभापतिहरुले पार्टीलाई बलियो बनाउन र नेतृत्वलाई सच्चिन दबाब दिन दुई दिने भेला आयोजना गरिएको बताएका थिए ।

मंगलबारसम्म चल्ने भेलाले पुस ११ गतेको केन्द्रीय कार्यसमितिले बहुमतले १४ औं महाधिवेशन कार्यतालिका घोषणा गर्ने, केन्द्रीय समितिको म्याद ०७७ फागुन १९ सम्म थप गर्ने र विधानविपरीत विभाग संख्या ४७ पुर्‍याउने निर्णय फिर्ता गर्न हस्ताक्षर गरेर सभापतिलाई बुझाउने बताइएको छ ।

पौडेल समूहले २६ मंसिरबाट सुरु केन्द्रीय कार्यसमिति बैठक बहिष्कार गर्दै आएको छ ।