केयूमा अनिश्चितकालीन तालाबन्दी, परीक्षा स्थगित
काभ्रे — काठमाडौं विश्वविद्यालय (केयू)का प्राध्यापक र कर्मचारीले केन्द्रीय हाताका शैक्षिक र प्रशासनिक कार्यलयमा अनिश्चितकालीन तालाबन्दी गरेका छन् । यसअघिका आन्दोलनमा प्रशासनिक कार्यालयमा मात्रै तालाबन्दी गर्दै आएका उनीहरुले सम्झौता कार्यान्वयन नभएको भन्दै सम्पूर्ण कार्यालयमा तालाबन्दी गरेको प्राध्यापक संघका पूर्व सभापति विभूतीरञ्जन झाले बताए ।
केन्द्रीय हाताभित्रका डीन कार्यालयहरु, परीक्षा नियन्त्रकको कार्यालय, टेक्निकल ट्रेनिङ सेन्टरसहित प्रशासकीय भवनहरुमा भएको तालाबन्दीका कारण भोलि(बुधबार) हुने परीक्षा स्थगित गरिएको सूचना परीक्षा नियन्त्रकको कार्यलयले जारी गरेको छ । विज्ञान र इन्जिनियरिङ संकायका स्नातक तहका आंशिक परीक्षा सञ्चालन हुँदै थिए । यसअघि पनि आन्दोलित शिक्षक विश्वविद्यालयले लिएको परीक्षामा सहभागी नभएपछि विधार्थीलाई नै निरीक्षक राखेर परीक्षा सञ्चालन गरिएको थियो ।
विश्वविद्यालय सभा र कार्यकारी परिषद्मा सहभागी गराउने पूर्वसहमति विपरीत प्रशासनले वेवास्ता गरेको भन्दै प्राध्यापक र कर्मचारी आन्दोलनमा छन् । विश्वविद्यालय सभामा सहभागी गराएपनि बोल्न समेत नदिएको भन्दै प्राध्यापकहरु आक्रोशित छन् ।
‘सिनेटमा सहभागी गरायो तर आफ्ना कुरा राख्न हात उठाउँदा समेत बोल्न नदिएर अपमान गर्यो,’ झाले भने, ‘भदौ ३० को सम्झौता अक्षराशं पालना नभएसम्म आन्दोलन जारी राख्छौं ।’ विश्वविद्यालयमा भइरहेका नीतिगत र आर्थिक भ्रष्टाचारका विषयमा संघले भ्रष्टाचारमा संलग्नलाई आवश्यक छानबिन गरी कारबाही गर्न माग गर्दा पनि कारबाहीको साटो संरक्षण गरेको, संघसँग विभिन्न समयमा भएका प्रतिबद्धता कार्यान्वयन नभएको भन्दै प्राध्यापक र कर्मचारी आन्दोलित छन् ।
४० दिनको निरन्तर तालाबन्दीपछि भदौ ३० गते भएको सम्झौतामा विश्वविद्यालय सभामा प्राध्यापक र कर्मचारीका एक/एकप्रतिनिधि आमन्त्रित गर्ने सहमति भएको थियो ।
दुवै संस्थासँग गरेका सम्झौताका बुँदाहरु कार्यकारी परिषद्ले स्वामित्व ग्रहण गरिसकेको अवस्थामा विश्वविद्यालय व्यवस्थापनले सहमति उल्लंघन भएको भएको थियो । २५ औं दिक्षान्त अन्तर्गतको पहिलो चरणको कार्यक्रमअघि बसेको सभामा प्राध्यापकका प्रतिनिधि सहभागी थिएनन् ।
प्रकाशित : पुस १५, २०७६ १९:१३