कारागार प्रशासनविरुद्ध कैदी आन्दोलित

कारागार नियम अनुसार आधा कैद भुक्तान गरिसकेका कैदीबन्दीहरुलाई चौकीदार, मूल नाइके र नाइकेको उपाधी दिएर उनीहरुलाई व्यवस्थापन, रेखदेख र किनमेल गर्न वाहिर घुम्न पाउनेसम्म छुट हुन्छ ।

जिल्ला कारागारका तिनै चौकीदार, मूल नाइके र नाइकेहरुले शोषण गरेको भन्दै कैदीबन्दीले बहिष्कार आन्दोलन थालेका हुन् । कैदीहरुले जेलभित्र छिर्ने मुलढोकामा आइतबार विहान नारावाजी गरेका थिए ।

सुरक्षाकर्मीसमेत पस्न नदिन उनीहरुले दोस्रो मूलढोकाको तालामाथि अर्को ताला थपेका छन् । असुरक्षा बढेपछि चौकीदार र नाइकेहरुलाई सुरक्षाकर्मीको सुरक्षामा राखिएको छ ।

कैदीहरुले प्रमुख जिल्ला अधिकारी भीमकान्त शर्मासमक्ष चौकीदार र नाइकेहरुलाई अर्को जेल सरुवा नगरेसम्म आन्दोलन जारी राख्ने जानकारी गराएका छन् । प्रमुख जिल्ला अधिकारी शर्माले आन्तरिक प्रशासनका कैदीबन्दीहरुबाट रासन र सुविधामा ठगिएको भन्दै नारावाजी भएको जानकारी दिए ।

जेलभित्र गाँजा र रक्सीको व्यापार कसरी हुन्छ भन्ने प्रश्न कैदीहरुले गरेका छन् । विकृतिबारे बोलेमा चौकीदार र नाइकेहरुले कोठामा लगेर कुट्ने भएकाले असरक्षित भएको गुनासो कैदीहरुको छ ।

दोलखाका प्रहरी नायव उपरिक्षक रेवतीरमण पोखरेलले गाँजा र रक्सीको प्रयोग जेलभित्र हुने विषय गम्भीर भएकोले छानबीन गरिने बताए । गमला र स साना प्रयोगका सामान बनाउन वोतलहरु लैजान दिइएको अनुमतिको फाइदा उठाउदै रक्सीका साथै गाँजा भित्रिएको अनुमान प्रहरीको छ ।

कैदीले थाङ्कालगायतका वस्तु बेचेर कमाएको पैसासमेत नाइके र चौकीदारले लुटेको दुःखेसो कैदीको छ । प्रजिअ शर्माले कारागाभित्रको घटना कारागार व्यवस्थापन विभाग केन्द्रमा लेखि पठाएर आउने निर्देशन अनुरुप कारवाही गरिने बताए ।