नेकपाको स्थायी कमिटी बैठकमा ५ एजेन्डा पेस हुँदै
काठमाडौँ — सत्तारूढ नेकपाको सचिवालयले बैठकले स्थायी कमिटी बैठकका लागि ५ एजेन्डा तय गरेको छ ।
प्रधानमन्त्री निवास बालुवाटारमा आइतबार बिहान बसेको बैठकले स्थायी कमिटीको बैठकका लागि एजेन्डाहरू तय गरेको हो । स्थायी कमिटी बैठक दिउँसो १ बजे पार्टी कार्यालय धुम्बाराहीमा बस्दैछ ।
प्रवक्ता नारायणकाजी श्रेष्ठका अनुसार स्थायी कमिटी बैठकमा अध्यक्ष पुष्पकमल दाहालले राजनीतिक प्रतिवेदन पेस गर्नेछन् । यसबाहेक विधान संशोधन, केद्रीय कमिटी बैठक, नेपाल भारत सीमा समस्यालगायत एजेन्डा छन् ।
सचिवालय बैठकमा प्रधानन्त्री एवं नेकपा अध्यक्ष केपी शर्मा ओली केहीबेर मात्रै बसेका थिए । उनले आफ्नो स्वास्थ्य स्थिति राम्रोसँग सुधार भइरहेको ब्रिफिङ गरेका थिए ।
बैठकमा पेस गर्नुअघि दाहालले आफूले तयार गरेको राजनीतिक प्रतिवेदनबारे प्रधानमन्त्री ओलीसँग छलफल गरेका थिए । अध्यक्ष दाहालको प्रतिवेदनमाथि सचिवालयमा पनि छलफल गरिएको छ ।
