कान्तिपुर वेबसाईट
AdvertisementAdvertisement

कर्मचारीकै कारण संघीयता कार्यान्वयन जटिल : दाहाल

कान्तिपुर संवाददाता

धनगढी — नेकपा अध्यक्ष पुष्पकमल दाहालले व्यवस्था फेरिए पनि कर्मचारीतन्त्र पुरानै अवस्थामा रहेकाले संघीय व्यवस्थामा चुनौती देखापरेको बताएका छन् । सुदूरपश्चिम प्रदेश सरकारद्वारा धनगढीमा आयोजित सुदूरपश्चिम वित्तीय सम्मेलनमा शुक्रबार उनले कर्मचारीतन्त्र फेरबेदल गर्न नसक्नु कमजोरी भएको बताए । ‘खटाएको ठाउँमा जान नमान्ने कर्मचारीकै कारण संघीयता कार्यान्वयनमा जटिलता थपिएको छ,’ उनले भने, ‘कर्मचारीतन्त्रलाई परिवर्तन गर्न नसक्दा हात्ती छिर्‍यो पुच्छर अडयो भनेजस्तो भएको छ ।’

नेकपा अध्यक्ष दाहालले विभिन्न बहाना बनाएर कर्मचारीले कामै अगाडि बढ्न नदिने गरेको बताए । ‘गणतन्त्रपछि सुरुमा प्रधानमन्त्री भएको मैले नै कर्मचारीतन्त्र फेरबदल गर्न सकिनँ, अहिले त झन् जटिल भएको देख्छु,’ उनले भने, ‘पुरानै व्यवस्थामा काम गरेका मुख्य सचिव, सचिव र उपसचिव भएपछि कसरी काम हुनु ?’


कर्मचारीले विभिन्न बहाना बनाएर नेताको ‘दिमाग खराब’ गर्ने गरेको उनको टिप्पणी थियो । कर्मचारीले जित्ने र नेताले हार्ने अवस्था आउन नहुने उनको भनाइ थियो । ‘हरेक राजनीतिक परिवर्तनलाई कर्मचारीतन्त्रले नै असफल पार्ने गरेको छ,’ उनले भने, ‘अहिले पनि पुरानै शैली र सोचका कर्मचारीकै कारण नेतृत्वलाई सोचेअनुरूपका काम गर्न असजिलो छ ।’


उद्योग वाणिज्य तथा आपूर्तिमन्त्री लेखराज भट्टले धनगढी–गेटा औद्योगिक करिडोरको प्रक्रिया अघि बढेको जानकारी दिए । उनले ५ वर्षभित्र सबै पालिकामा उद्योग ग्राम स्थापना गर्ने पनि बताए ।


प्रदेश सरकारले प्रदेशमा वित्तीय पहुँचमा सुधार ल्याउने उपायको खोजी गर्न भन्दै वित्तीय सम्मेलनको आयोजना गरेको हो । आर्थिक मामिला तथा योजनामन्त्री झपट बोहराले वित्तीय सूचकांकमा पछाडि रहेको प्रदेशका लागि संघीय सरकारले गरेको राजस्व बाँडफाँट न्यायिक नरहेको बताए । आर्थिक मामिला तथा योजना मन्त्रालयका सचिव सुमनराज अर्यालले औद्योगिक क्षेत्रमा कर्जा प्रवाह न्यून रहेको औंल्याए । प्रदेशसभामा प्रमुख प्रतिपक्षी दलका नेता कांग्रेस सांसद रणबहादुर रावलले सुदूरपश्चिम स्रोतले समृद्ध हुँदाहुँदै पनि सरकारकै कारण २ वर्षको अवधिमा ठोस परिवर्तन हुन नसकेको टिप्पणी गरे ।

प्रकाशित : मंसिर २०, २०७६ २१:०७
प्रतिक्रिया
पठाउनुहोस्

कुस्तीमा भारतकै दबदबा

भारतलाई ४ स्वर्ण, नेपाललाई १ रजत ३ कास्य
सन्तोष सिंह

धनुषा — १३ औं दक्षिण एसियाली खेलकुद अन्तर्गत जनकपुरमा भएको कुस्ती खेलको पहिलो दिन शुक्रबार भारतले चार स्वर्ण जितेको छ । नेपालले प्रतिस्पर्धी खेलमा १ रजत र ३ कास्य जितेको छ । श्रीलंकाले ३ वटा रजत र १ वटा कास्य जितेका छन् ।

जनकपुरको मुजेलियास्थित कर्भडहलमा भइरहेको कुस्ती प्रतियोगिताको पहिलो दिन महिलातर्फ ५० र ५२ तौल समूह र पुरुषतर्फ ५७ र ६५ तौल समूहबीच प्रतिस्पर्धा भएको थियो । ५३ किलो तौल समूहमा भारतकी पिंकी कुमारीले स्वर्ण जितेकी छन् । नेपालकी शिवांगी दुवेलाई पराजित गर्दै स्वर्ण जितिन् । नेपालकी शिवांगीले भारतकी पिंकीलाई अन्तिम चरणमा कडा टक्कर दिएकी थिइन् । उक्त तौल समूहमा श्रीलंकाकी खेलाडी शमिकाले कास्य जितिन् ।

यसैगरी ५० किलो तौल समूहको कुस्ती खेलमा भारतकी शीतल तोमरले स्वर्ण पदक जितिन् । श्रीलंकाकी खेलाडी रोशनीले रजत र नेपालकी मनिषा सिंहले कास्य जितिन् । नेपाल, भारत, बंगलादेश र श्रीलंकाकी महिला खेलाडी मात्र सहभागी यो तौल समूहमा भारतका खेलाडीको दबदबा देखिन्थ्यो । भारतका खेलाडीसँग नेपालको खेलाडी मात्रै धेरै समय रिङमा टिकिरहे ।

साँझ भएको ५७ तौल समूहको कुस्ती खेलमा भारतको राहुल कुमारले स्वर्ण, श्रीलंकाका कथोरंगनाले रजत र नेपालको नरेश यादवले कास्य जिते । पुरुष समूहमै ६५ किलो तौल समूहमा भएको प्रतिस्पर्धामा भारतका अमित कुमारले स्वर्ण, श्रीलंकाको चमाराले रजत र नेपालका सरोज यादवले कास्य जितेका छन् । पाकिस्तानले यो दुबै तौल समूहमा प्रतिस्पर्धा गरेनन् । बंगलादेशको खेलाडी सहभागी भए पनि भारत र नेपालसँग परेको सबै खेलमा पराजित भए ।
प्रदेश २ का मुख्यमन्त्री लालबाबु राउतले कुस्ती खेलको उद्घाटनको घोषणा गरेलगत्तै प्रतिस्पर्धा थालिएको थियो । उद्घाटन समारोहमा राष्ट्रिय खेलकूद परिषद्का सदस्य सचिव रमेशकुमार सिलवालले हिमाल, पहाड र तराई जोड्न सागको कुस्ती प्रतियोगिता जनकपुरमा गरिएको बताए ।

उद्घाटन समारोहमा नेपाली सेनाको सांस्कृतिक टोली र जनकपुरको मिथिला नाट्य कला परिषद्का कलाकारले झाँकी र नृत्य प्रस्तुत गरेका थिए । साँझ कर्भडहल बाहिर आतिशबाजी गरिएको थियो ।

प्रकाशित : मंसिर २०, २०७६ २०:४६
पूरा पढ्नुहोस्
प्रतिक्रिया
पठाउनुहोस्
×