थबाङमा चन्द समर्थितको उम्मेदवारी

राउतको पार्टी सबै पदमा लड्दै
कान्तिपुर संवाददाता

रोल्पा — थबाङ गाउँपालिका १ को वडाध्यक्षका लागि तीन जनाले मनोनयन दर्ता गराएका छन् । मंसिर १४ मा हुने उपनिर्वाचनका लागि बुधबार नेकपा, कांग्रेस र प्रतिबन्धित चन्द समूह समर्थित एक स्वतन्त्र उम्मेदवारले मनोनयन दर्ता गराएका हुन् ।

वडा सदस्य भद्रकुमार झाँझीले पदबाट राजीनामा दिएर वडाध्यक्षमा स्वतन्त्र उम्मेदवारी दिएको मुख्य निर्वाचन अधिकृतको कार्यालयले जनाएको छ । उनले गाउँपालिका अध्यक्ष वीरबहादुर घर्तीमगरसमक्ष राजीनामा बुझाएका छन् । उनी चन्द समूहका समर्थक हुन् । मुख्य निर्वाचन अधिकृत रमेशप्रसाद ज्ञवालीका अनुसार झाँझी, नेकपाका जनकबहादुर बुढामगर र कांग्रेसका कलम रोकामगरको उम्मेदवारी परेको छ ।

स्थानीय निर्वाचनमा वडाध्यक्ष फर्कबहादुर बुढामगरको प्यानलै विजयी भएको थियो । उनीहरू सबै चन्द समूह समर्थित हुन् । बुढामगरको गत असार ६ मा मस्तिष्कघातबाट मृत्यु भएको थियो । उनले सत्तापक्षीय नेकपाका उम्मेदवारलाई फराकिलो मतान्तरमा हराएका थिए । झाँझीले भने कुनै समूहको समर्थक नभई आफूले स्वतन्त्र रूपमा निर्वाचनमा भाग लिएको बताएका छन् । थबाङका ५ मध्ये ४ वटा वडासहित अध्यक्ष र उपाध्यक्षमा नेकपा समर्थित उम्मेदवार विजयी भएका थिए ।

जनकपुरस्थित संवाददाताका अनुसार सीके राउत नेतृत्वको जनमत पार्टीले प्रदेश २ अन्तर्गत उपनिर्वाचन हुने सबै पदमा उम्मेदवारी दिएको छ । प्रदेश २ मा एक गाउँपालिका अध्यक्ष र ९ वडाध्यक्षका लागि मंसिर १४ मा उपनिर्वाचन हुँदै छ । पहिलो पटक निर्वाचनमा सहभागी भएको उक्त पार्टीले महोत्तरीको पिपरा गाउँपालिका अध्यक्षमा अन्जनीदेवी मण्डललाई उठाएको छ ।

राजपाबाट निर्वाचित विनोद चौधरीको मृत्युपछि रिक्त पदका लागि दलका ११ र स्वतन्त्र ९ जनाको उम्मेदवारी परेको मुख्य निर्वाचन अधिकृत विष्णु सुवेदीले जानकारी दिए । अलग मधेस राज्यको नारा दिएर विभिन्न गतिविधि गर्दै आएका राउतले ०७५ फागुनमा सरकारसँग सहमति गरेका थिए । त्यसलगत्तै उनले पार्टी गठन गरेका थिए ।

प्रकाशित : कार्तिक २८, २०७६ ०९:०८
ADVERTISEMENT
प्रतिक्रिया
पठाउनुहोस्
ADVERTISEMENT

धरानमा २३ जनाको मनोनयन

कान्तिपुर संवाददाता

विराटनगर — धरान उपमहानगरपालिका प्रमुख, पाँचथरको फाल्गुनन्द गाउँपालिका प्रमुख, संखुवासभाको मकालु गाउँपालिका अध्यक्षसहित विभिन्न स्थानीय तहको रिक्त पदमा हुने उपनिर्वाचनका लागि दलका साथै स्वतन्त्र उम्मेदवारले बुधबार मनोनयनपत्र दर्ता गरेका छन् । 

धरान उपमहानगरको प्रमुखका लागि २३ जनाले उम्मेदवारी दिएका छन्, त्यसमा ११ जना स्वतन्त्र छन् । तत्कालीन एमालेबाट विजयी तारा सुब्बाको ०७५ साउन १ गते निधन भएपछि उपमहानगरपालिका १६ महिनादेखि प्रमुखविहीन छ । नेकपाका प्रकाश राई, कांग्रेसका तिलक राई, समाजवादी पार्टीका गजेन्द्र इस्बो, राष्ट्रिय जनमुक्ति पार्टीका गोकर्ण राई, संघीय लोकतान्त्रिक मञ्चका अम्बरबहादुर इजम लिम्बू, राप्रपा (कमल थापा) का रोशन विक, राप्रपा (संयुक्त) का कुमार बराइली, नेपाल लोकतान्त्रिक पार्टीका नित्यराज काफ्लेले मनोनयन दर्ता गरेका छन् ।

त्यसैगरी साझा पार्टीका राजनकुमार श्रेष्ठ, राप्रपा लोकतान्त्रिकका भीमबहादुर लिम्बु, आमूल परिवर्तन मसिहा पार्टीका छत्रबहादुर विश्वकर्मा, नेकपा (माले) का एकराज सुब्बाले पनि उम्मेदवारी दिएका छन् । निर्वाचन अधिकृतको कार्यालयका अनुसार एलिसा राई, हर्कराज राई, दावा शेर्पा, श्यामकृष्ण पहाडी भुजेल, दिनेश श्रेष्ठ, कुमार भट्टराई, अमृतकुमार राई, जनार्दन कोइराला, मनराज राई, रुद्र बस्नेत र विशाल थापाले स्वतन्त्र उम्मेदवारी दिएका छन् ।
पाँचथरको फाल्गुनन्द गाउँपालिका अध्यक्षमा नेकपाका वीरबहादुर कुरुम्वाङ, कांग्रेसका बृजहाङ आङदेम्बे, समाजवादी पार्टीका विमला आङदेम्बे, राप्रपाका ससुहाङ चेम्जोङ, राप्रपा संयुक्तका मणि लिम्बू, मंगोल नेसनल अर्गनाइजेसनका उदय मुखिया सुनुवार, संघीय लोकतान्त्रिक मञ्चले जितेन चेम्जोङ र जनमुक्ती पार्टीका इच्छाबहादुर चेम्जोङको उम्मेदवारी दर्ता गराएका छन् ।

संखुवासभाको मकालु गाउँपालिका अध्यक्षका लागि नेकपाका तेजबहादुर पोखरेल, कांग्रेसका विमन पराजुली, संघीय समाजवादीका नर्बु शेर्पा, राप्रपा नेपालका मेघनाथ राई, राप्रपा संयुक्तका मनबहादुर विश्वकर्मा र संघीय लोकतान्त्रिक मञ्चका कविता राईको उम्मेदवारी परेको छ ।

प्रकाशित : कार्तिक २८, २०७६ ०९:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×