कूटनीतिक पहल गरी सीमा विवाद समाधान गर्न लोकतान्त्रिक पार्टीको माग
काठमाडौँ — नेपाल लोकतान्त्रिक पार्टीले कूटनीतिक माध्यमबाट भारतसँगको सीमा विवाद सल्ट्याउन सरकारसँग माग गरेको छ ।
भारतले हालसालै प्रकाशित गरेको राजनीतिक नक्सामा उल्लेख गरिएको कालापानी, लिपुलेक, लिम्पियाधुरा नेपालको भूभाग भएको प्रस्ट्याउँदै उक्त पार्टी विवादलाई कूटनीतिक पहल गरी समझदारी बनाउन माग गरेको हो । 'भारतले नयाँ नक्सा सच्याउनु पर्दछ' विज्ञप्तिमा छ, 'यस विषयलाई लिएर नेपाल सरकारले भारतसँग कूटनीतिक पहल गर्नको लागि नेपाल लोकतान्त्रिक पार्टी जोडदार माग गर्दछ ।'
नेपालको स्वाभिमान र राष्ट्रियतामा आँच पुर्याउने खालको गतिविधिको विरोधमा आफ्नो पार्टी सदैव क्रियाशील रहने जनाउँदै लोकतान्त्रिक पार्टीले भारतले छिमेकी मुलुकप्रति देखाएको व्यवहार सह्य नभएको बताएको छ । 'एउटा छिमेकी मुलुकले अर्को छिमेकी मुलुकको अस्तित्वमाथि आँच पुर्याउने खालको व्यवहार हुनु निश्चिचत रुपमा कसैलाई पनि सह्य हुँदैन ।'