जुवाखालबाट जनप्रतिनिधि र नेता पक्राउ

आश गुरुङ

(लमजुङ) — कौडा खेल्दै गरेको अवस्थामा लमजुङ प्रहरीले जनप्रतिनिधि (वडा सदस्य) र नेतासहित २५ जनालाई पक्राउ गरेको छ । सोमबार राति २ बजेतिर बेंसीसहर नगरपालिका ११, चिती तिलाहर नजिकै पुरानो कुखुराको खोरबाट उनीहरुलाई पक्राउ गरिएको प्रहरीले जनाएको छ ।

डीएसपी रबिन्द्रमान गुरुङले गोप्य सूचनाको आधारमा २५ जनालाई पक्राउ गरिएको र उनीहरुको साथबाट २ लाख १६ हजार ४ सय ३० रुपैयाँ बरामद गरिएको बताए । उनीहरुको साथबाट ३२ थान कोडासमेत बरामद गरिएको छ । २ खाल गरेर कौडा खेलिरहेको अवस्थामा प्रहरीले उनीहरुलाई समातेको उनले बताए ।


प्रहरीका अनुसार बेंसीसहर नगरपालिका १ का ११ जना, बेंसीसहर नगरपालिका ११ का १२ जना र सुन्दरबजार नगरपालिका ९ का २ जनालाई पक्राउ गरिएको छ । प्रहरी स्रोतका अनुसार पक्राउ पर्नेमा बेंसीसहर नगरपालिका १ मा कांग्रेसबाट निर्वाचित वडा सदस्य गौबहादुर गुरुङ र नेकपा बेंसीसहर नगर कमिटी अध्यक्ष राजकुमार विष्टलगायत छन् ।


प्रहरीका अनुसार उनीहरु कोही खेल्दै गरेका र कोही हेर्दै गरेको अवस्थामा पक्राउ गरिएको हो । उनीहरु सवैलाई जुवा ऐन अन्तर्गत मुद्दा चलाइने प्रहरीले बताएको छ । विष्ट उक्त ठाउँकै हुन् भने गुरुङ छिमेकी वडाका हुन् ।


विष्टले घर नजिकै खेलेको भन्दै साथीहरुले बोलाएको र हेर्न गएको अवस्थामा प्रहरीको फन्दामा परेको दावी गरेका छन् ।

प्रकाशित : कार्तिक १२, २०७६ १८:३८
ADVERTISEMENT
ADVERTISEMENT
प्रतिक्रिया
पठाउनुहोस्

खेल्दै–पढ्दै बालबालिका

दिउासो टिफिन समयमा खाजा खाएर बालबालिका एकछिन पालैपालो खेलेपछि कक्षाकोठाभित्र गएर पढ्छन् । कहिलेकाली शिक्षकले नै पार्कमा लैजान्छन् ।
आश गुरुङ

लमजुङ — एक हुल बालबालिका साढे ९ बजे नै स्कुल आउँछन्  । पालैपालो गरी पिङ, सिलिमिली, चाकचुली, घुमाउने खेल्छन्  ।

जव घण्टीले १० बजाउँछ, बालबालिका लाइनमा बस्न जान्छन् । प्रार्थना गर्छन् । कोठाभित्र पसेपछि पढाइ सुरु हुन्छ । दिउँसो खाजा छुट्टी हुन्छ । खाजा खान्छन् र एकछिन पालैपालो खेलेपछि कक्षाकोठाभित्र पसेर फेरी पढ्न थाल्छन् । कहिलेकाहीं शिक्षकले बालबालिकालाई पालैपालो खेल्न र पढ्न पार्कमा लैजान्छन् ।

शुक्रबारको दिन आधा छुट्टीको दिन भएकाले बालबालिका धोको फेरेर खेल्छन् । क्व्होलासोंथर गाउँपालिका–१ बाग्लुङपानीको जनज्योति माविमा बालबालिकालाई पढाइप्रति आकर्षित गराउन बाल उद्यान अर्थात चिल्ड्रेन पार्क निर्माण गरिएको छ । उनीहरू खेल्दै पढ्छन् र पढ्दै खेल्छन् ।

प्रधानाध्यापक बिलप्रसाद गुरुङका अनुसार चिल्ड्रेन पार्क निर्माणपछि ससाना बालबालिका नियमित विद्यालय आउन थालेका छन् । ‘कहिले आमासँग झगडा गर्ने, कहिले केही किनिदेऊ भनेर झगडा गरेर कहिलेकाहीं स्कुल आउने थिएनन्,’ उनले भने, ‘खेल्ने ठाउँ बनाइदिएपछि, खेल्ने चिज भएपछि नानीबाबु नियमित स्कुल आउन थालेका छन् ।’

बेंसीसहर नगरपालिका–२ भकुन्डेस्थित बालकल्याण माविका प्रधानाध्यापक तीर्थ न्यौपानेले चिल्ड्रेन पार्क बनेपछि बालबालिका नियमित विद्यालय आउन थालेको बताए । ‘अरूभन्दा पनि १ देखि ५ कक्षासम्मका बालबालिका बढी मात्रामा खेल्छन्, रमाउँछन्,’ उनले भने । उनका अनुसार विद्यालयको चौरमा चिल्ड्रेन पार्क बनाइएको छ । विद्यार्थी आफैं फुर्सद निकालेर खेल्छन् । ‘विद्यार्थी खेल्छन्, रमाउँछन्, पढ्छन्,’ उनले भने, ‘खेलमा रमाउन थालेपछि विद्यार्थी नियमित छ । खेलसँगै विद्यार्थीलाई सिक्न र पढ्न जोड दिएका छौं ।’

सामुदायिक विद्यालयमा विद्यार्थी टिकाउन यी दुई विद्यालयले चिल्ड्रेन पार्क निर्माण गरेका हुन् । निजी स्कुलमा यस्ता खालका खेलका माध्यम र खेलकुद सामग्रीले विद्यार्थी आकर्षित भएपछि ग्रामीण भेगको जनज्योति र सहर नजिकैको जनकल्याणले विद्यालयमा चिल्ड्रेन पार्क निर्माण गरेको हो ।

प्राथामिक तहसम्मका विद्यार्थीलाई लक्षित गरी चिल्ड्रेन पार्क निर्माण गरिएको हो । पार्कमा पिङ, चिप्लेटी, घुमाउने पिङ, चाकाचुली, टेबलटेनिस खेल्ने बोर्ड, भलिबलका लागि नेट, क्यारमबोर्डलगायत राखिएका छन् ।

वर्ल्ड भिजन इन्टरनेशनल नेपालको सहयोगमा ग्रामीण सामुदायिक विकास केन्द्र (आरसीडीसी) को ‘सामुदायिक संलग्नता तथा बाल स्पोन्सरसीप कार्यक्रम’ अन्तर्गत विद्यालयमा चिल्ड्रेन पार्क निर्माण गरिएको विद्यालयले जनाएको छ ।

आरसीडीसीका कार्यकारी निर्देशक प्रेमबहादुर भट्टराईका अनुसार विद्यार्थीलाई पढाईसंगै मनोरञ्जन प्रदान गर्न विद्यालयमा चिल्ड्रेन पार्क निर्माणमा सहयोग गरेको हो । सामुदायिक संलग्नता तथा बाल स्पोन्सरसीप कार्यक्रमकी टीम लिडर उमा अधिकारीले जनज्योतिमा ४ लाख ५७ हजार ९ सय ७० रुपैयाँ र बाल कल्याणमा ४ लाख २४ हजार ४ सय ८१ रुपैयाँमा चिल्ड्रेन पार्क निर्माण गरेको बताइन् ।


प्रकाशित : कार्तिक १०, २०७६ १०:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×