‘हेलो सरकारका गुनासा स्थानीय तहबाटै सम्बोधन’

रासस

काठमाडौँ — सरकारले स्थानीय तहबाट नै जनताका गुनासो सम्बोधन गर्न थालेको छ । प्रधानमन्त्री तथा मन्त्रिपरिषद्को कार्यालयअन्तर्गतको हेलो सरकार शाखाले ‘हेलो सरकार’को नयाँ सफ्टवेयर पोर्टल जडान गरेसँगै ७५३ वटै तहबाट जनताका गुनासो सम्बोधन हुने गरेका छन् । 

शाखाका प्रमुख शेखर पौडेलले साउनदेखि नयाँ पोर्टल जडान गरेपछि जनताका गुनासो सम्बन्धित स्थानीय तहबाट नै सम्बोधन हुन थालेको जानकारी दिए । त्यसका लागि हेलो सरकारले सबै स्थानीय तहलाई हेलो सरकारको ‘युजरनेम’ र ‘पासवर्ड’ दिएको छ । उक्त युजरनेममा हेलो सरकारमा आएका गुनासो सम्बन्धित ठाउँका स्थानीय तहमा पठाइन्छ र गुनासोलाई सम्बोधन गरिन्छ ।
“हामीले अब सिधैँ हामी कहाँ आएका गुनासो स्थानीय तहलाई पठाउँछौँ”, उनले भने, “ती गुनासोलाई सम्बन्धित स्थानीय तहका प्रमुख प्रशासकीय अधिकृत र गुनासो सुन्ने अधिकारीले सम्बोधन गर्नेछन् ।”

पहिले हेलो सरकारमा आएका गुनासोलाई यहाँका कर्मचारीले सम्बन्धित निकायसँगको सहयोगमा सम्बोधन गर्ने गर्दथे । हेलो सरकारले संघीय मन्त्रालय, विभाग, प्रदेश मन्त्रालय र जिल्ला प्रशासन कार्यालयलाई समेत हेलो सरकारको युजरनेम र पासवर्ड दिएको छ । यसले सम्बन्धित निकायमै गुनासो जाने गर्दछ र उनीहरुले नै गुनासोको फछ्र्यौट गर्नेछन् । ती निकायले गुनासो सम्बोधन भएको जानकारी भने हेलो सरकारलाई दिनुपर्ने हुन्छ ।

२०६८ कार्तिक १७ गतेबाट तत्कालीन प्रधानमन्त्री डा बाबुराम भट्टराईले जनताका गुनासो सम्बोधन गर्नका लागि हेलो सरकार सञ्चालनमा ल्याएका हुन् ।

प्रकाशित : कार्तिक ९, २०७६ १४:२७
प्रतिक्रिया
पठाउनुहोस्
ADVERTISEMENT

चीनबाट रेल ल्याउन आवश्यक छैन : शशांक

रमेशकुमार पौडेल

चितवन — प्रमुख प्रतिपक्ष नेपाली कांग्रेसका महामन्त्री एव‌ं सांसद शशांक कोइरालाले चीनबाट रेल ल्याउन आवश्यक नभएको बताएका छन् । उनले चीनबाट रेल ल्याउनै परेपनि ऋणमा ल्याउन नहुने बताएका छन् । 

नेपाल प्रेस युनियन चितवन शाखाले शनिबार बिहान भरतपुरमा आयोजना गरेको तिहार शुभकामना कार्यक्रममा बोल्दै महामन्त्री कोइरालाले प्रश्न गर्दै भने,‘हाम्रो उत्पादन बढ्यो भने बल्ल रेलको खाँचो हुन्छ, उत्पादन हाम्रो खाई ?’

चीनबाट रेलमा पर्यटक ल्याउनु असम्भव कुरा भएको कोइरालाले बताए । उनले थपे ‘टुरिष्ट त जहाजबाट नै आउँछन् ।’ रेलको सम्भावना भएपनि त्यो अनुदानमा हुनुपर्ने सांसद कोइरालाको भनाइ थियो ।

रेल ल्याउँदा अनुदानमा आउने हो कि हैन, चलाउन सक्ने हो कि हैन, रेल ल्याएर ऋणमा डुब्ने हो कि जस्तो पक्षमा ख्याल गर्नु पर्ने उनले बताए । भारतसँग सरकारले अनुदानमा रेल ल्याउन थालेको समाचार पढेको उनले बताए ।

‘भारतसँग रेलको अग्रिमेन्ट हुँदै गरेको समाचार भर्खर पढेँ । उनीहरुले अनुदानमा रेल दिदैछन् । काठमाडौंदेखि तराईसम्म रेल मार्ग सुरु गर्दै रहेछन् । त्यो गर्नु पनि पर्छ । अनुदानमा आएको ठिकै हो । तर, ऋणमा डुबाएर रेल ल्याउनुको औचित्य छैन’ महामन्त्री कोइरालाको भनाइ थियो ।

सरकारले उचित सपना बोक्न छाडेर पानी जहाज चलाउने, रेल चलाउने जस्ता ऋणमुखी सपना बोकेको उनको आरोप थियो ।

प्रकाशित : कार्तिक ९, २०७६ १३:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT