सुध्रिएनन् टिपर चालक

दीपेन्द्र विष्ट

काठमाडौँ — कंलकीबाट थानकोटतर्फ गइराखेको बा ३ ख ३८१७ नम्बरको टिपरले सोही दिशा गइराखेको बा ४६ प ४९०३ नम्बरको मोटरसाइकललाई ठक्कर दिँदा बुधबार चितवनका सुनिल अधिकारीको मृत्यु भयो ।

मोटरसाइकल पछाडि सवार अधिकारीको घटनास्थलमै मृत्यु भयो भने, चालक हिराबहादुर बानियाँ घाइते भए ।

बानियाँको ओमसमाज अस्पतालमा उपचार भइरहेको छ । गत भदौमा तीनकुनेबाट गौशालातर्फ जाँदै गरेको टिपरले आइतबार राति सिनामंगलमा मोटरसाइकललाई ठक्कर दिँदा पासाङ भोटेको मृत्यु भयो ।

तीव्र गतिमा आएको टिपरले कार्गो कार्यालयनेर बा ८५प ५६९, बा ३८प २३९३ र ना ४३ प ८७३५ नम्बरका तीनवटा मोटरसाइकललाई ठक्कर दिएको थियो । बा८५प ५६९ नम्बरका चालक छाङबुङ भोटे, ना ४३प ८७३५ नम्बरका चालक प्रमोद धिताल घाइते भए भने बा ३८प २३९३ नम्बर मोटरसाइकलका चालक भोटेको मृत्यु भयो ।

उपत्यका ट्राफिक महाशाखाको तथ्यांक हेर्दा साउनदेखि असोजसम्म टिपरकै ठक्करबाट ३ जनाको मृत्यु भइसकेको छ । टिपर र ट्रकको ठक्करबाट मानिसको मृत्यु भएको यो नौलो घटना होइन । प्रत्येक वर्ष टिपर र ट्रकको ठक्करले मृत्यु र घाइते हुनेको संख्या बढ्दो छ । तर, यसलाई नियन्त्रण तथा न्यूनिकरण गर्ने प्रयास भएको देखिँदैन । एक वर्षअघि स्कुटरमा यात्रारत २४ वर्षीया अस्मिता भण्डारीलाई काठमाडौंको जडीबुटी चोकमा बा ४ ख ३५५० नम्बरको टिपरले किचेर मृत्यु भयो । गत वर्ष जेठमा भक्तपुर सागामा टिपरकै कारण हरि कटुवाल, सविता घिमिरे र अविन्द्र घिमिरेको ज्यान गएको थियो ।

मुलुकभर सवारी दुर्घटनाबाट दैनिक ७ जनाको मृत्यु हुने गरेको तथ्यांक छ । आर्थिक वर्ष २०७५/७६ मा मात्र २ हजार ७ सय ६२ जनाको दुर्घटनामा मृत्यु भएको प्रहरी प्रधान कार्यालयअन्तर्गतको ट्राफिक प्रहरी निर्देशनालयको तथ्यांक छ । मुलुकभर २१ हजार ६ सय ५४ सवारी दुर्घटना भएका थिए । निर्देशनालयकाअनुसार टिपर र ट्रकसँग जोडिएका ८० प्रतिशत दुर्घटनामा चालकको लापरबाही देखिएको छ ।

सवारी दुर्घटना र त्यसबाट घाइते र मृत्यु हुनेको संख्या प्रत्येक वर्ष बढ्दै गएको देखिन्छ । आव २०७३/७४ मा १६ हजार ५ सय १५ वटा दुर्घटना भएका थिए । त्यसमा टिपर र ट्रकका कारण मात्र भएका दुर्घटना २ हजार २ सय ३० वटा थिए । दुर्घटनामा २ हजार ३ सय ८४ जनाको मृत्यु भएको थियो । यस आर्थिक वर्षमा चालकको लापरबाहीले गर्दा भएका दुर्घटना संख्या ७ हजार ४ सय ८७ थिए । आव ०७४र७५ मा १८ हजार ३४ वटा दुर्घटना भएका छन जसमा टिपर र ट्रकका कारणले मात्र २ हजार ४ सय ३० दुर्घटना भएका थिए ।

महानगरीय ट्राफिक महाशाखाका प्रमुख भिम ढकालले टिपर दिउँसो चलाउन बन्द गरेपनि दुर्घटना भइरहेको बताए । सडक लेन अनुशासन उल्लंघन गर्ने, तीव्र गतिमा गाडी कुदाउने, जथाभावी ओभरटेक गर्ने, गाडी चलाउदा मोबाइलमा कुरा गर्ने, गीत सुन्नेजस्ता कारणले पनि दुर्घटना बढिरहेको उनले बताए ।

‘गन्तव्यमा पुग्न तछाडमछाड गर्छन्’ उनले भने, ‘ट्रिप गरेर बढी कमाउन तीव्र गतिमा चलाउँछन ।’ टिपर अन्य गाडीको तुलनामा बलियो हुने भएकाले चालकले सामान्य ठोक्किदा फरक पर्दैन भन्ने मनोविज्ञानबाट तीव्र गतिमा चलाउने गरेको उनले बताए ।

सहरभित्र पस्दा टिपरको गति सिमित गराउनेबारे पनि छलफल भइरहेको उनले जानकारी दिए । ‘बेलुका ८ बजेपछि रिङरोडभित्र छिर्ने, र बिहान ७ बजे अघि रिङरोड छोडिसक्ने प्रावधान त छदैछ’ उनले भने, ‘अब त्यो समयमा कति गति राख्ने भन्ने पनि सोच्न पर्ने बेला आएको छ ।’ उपत्यकामा मात्र पछिल्लो एक वर्षमा टिपरले ठक्कर दिएर मृत्यु भएकाको संख्या १२ पुगेको छ ।

महाशाखाको तथ्यांकअनुसार आव २०७५र ७६ मा २७ सय ९ दुर्घटना टिपर र ट्रकबाट भएका थिए । यी समेतका सडक दुर्घटनामा परी उपत्यकामा २ सय ५४ जनाको मृत्यु भएको थियो । यी दुर्घटनामध्ये अधिकांशमा चालकको लापरबाही नै मुख्य कारण देखिएको छ ।

नेपाल प्रहरीका पूर्वएआईजी जयबहादुर चन्दले दण्ड जरिवानाको व्यवस्थै संशोधन गर्नुपर्ने बताए । ‘अनुगमन फितलो छ, चालक गम्भीर छैनन्, चालक शिक्षाको पनि कमी छ,’ उनले भने । सडकको नाजुक अवस्था पनि दुर्घटनाको कारक रहेको उनले बताए । ‘बिना इन्जिनियरिङ सडक निर्माण गरिएको छ,’ उनले भने । टिपर दुर्घटनाको जिम्मेवार चालक नै भएको यातायात व्यवस्था विभागका महानिर्देशक गगन हमालले बताए । ‘टिपर चालक निकै अराजक छन’ उनले भने ।

प्रकाशित : आश्विन १६, २०७६ २२:०१
प्रतिक्रिया
पठाउनुहोस्
ADVERTISEMENT
ADVERTISEMENT

प्रहरी मुख्यालयभित्रै चारको हत्या

फ्रान्समा प्रहरीमाथि आक्रमणको श्रंखला बढेपछि सुरक्षाकर्मी हड्तालमा गएको भोलिपल्ट चक्कुले तीन पुरुष र एक महिलाको हत्या भएको हो ।
एजेन्सी

पेरिस — फ्रान्सको पेरिसस्थित प्रहरी मुख्यालयमा एक जना आक्रमणकारीले चार कर्मचारीको चक्कु प्रहार गरी हत्या गरेका छन् । फ्रान्सेली सञ्चारमाध्यमहरुका अनुसार आक्रमणकारीको नाम उल्लेख गरिएको छैन तर तिनी पूर्व कर्मचारी हुन् । 

प्रहरीले ती आक्रमणकारीलाई नियन्त्रणमा लिन गोली प्रहार गर्दा उनको घटनास्थलमै मृत्यु भएको छ । यसबारे आधिकारिक प्रतिक्रिया नआए पनि पेरिसको केन्द्रमै रहेको ‘डेले डे ला साइट’ क्षेत्रलाई सिलबन्दी गरिएको छ ।

प्रहरी अधिकारीहरुमाथि आक्रमण बढेको भन्दै फ्रान्सभरिका सुरक्षाकर्मी हड्तालमा गएको भोलिपल्ट यो आक्रमण भएको बीबीसीले जनाएको छ । यो आक्रमण प्रहरी मुख्यालयको परिसरमा स्थानीय समयअनुसार १ बजे भएको हो ।
फ्रान्सका राष्ट्रपति इम्यानुएल म्याक्रोंन, प्रधानमन्त्री एडोर्ड फिलिप र आन्तरिक मन्त्री क्रिस्टोफ कास्टानेर लगायतका उच्च स्तरीय प्रतिनिधिहरु घटनास्थलमा पुगेका छन् । पेरिसका मेयर ऐनी हिडाल्गोले ट्वीटरमार्फ आक्रमणको पुष्टि गर्दै ‘धेरै’ मानिस मारिएको उल्लेख गरेका छन् ।

उनले लेखेका छन्, ‘घटना नोट्रे–डेम क्याथेड्रमसहित प्रमुख पर्यटक स्थलहरु नजिकै भएको छ ।’ फ्रान्सेली प्रचारक बीएफएमटीभीका अनुसार चक्कु प्रहारबाट तीन पुरुष र एक महिलाको मृत्यु भएको छ ।

प्रकाशित : आश्विन १६, २०७६ २१:४४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT