नागढुंगा-नौबिसे जामको सास्ती : काठमाडौं हिँडेका एम्बुलेन्स चितवनतिर

छोरो काखमै गुम्यो

उनी कहिले छोरालाई काखमा सुताउँथिन् । कहिले पछ्यौरीले गुटुमुटु पार्थिन् । भोकप्यास लागे/नलागेको सोध्थिन् । मिर्गौलाको उपचारका लागि छोरालाई काठमाडौं लैजाँदै गरेकी रौतहटको गरुडा नगरपालिका-८ की सिर्जनदेवी साहले बिहीबार राति बसमा आँखा झिम्म गर्न पाइनन् । तर उनले बिरामी छोरालाई हस्पिटल पुर्‍याउन सकिनन् । काखमै छोरा गुमाउनुपर्‍यो ।

जनकपुरमा सम्भव नभएपछि ३५ वर्षीय छोरा रूपलाललाई थप उपचारका लागि काठमाडौं लैजान सिर्जनदेवी रौतहटबाट बिहीबार साँझ ना७ख ५३६४ नम्बरको बस चढेकी थिइन् । मध्यरातमा थाक्रे-८ चारकिलामा दुइटा मालवाहक कन्टेनर ठोक्किएर राजमार्गमा अवरोध भएपछि बिरामी बोकेको उक्त बस बिहान पौने ४ बजेदेखि महादेवबेंसी बजारनजिकै हुलाकडाँडामै जाममा फसेको थियो । शुक्रबार बिहान ६ बजेतिर बसमै रूपलालको मृत्यु भएको हो ।

जाममै रहेका बेला बिहान ३ बजेतिर बिस्कुट र पानी खाएका साहको स्थिति अकस्मात् गम्भीर भएपछि आफूहरूले एम्बुलेन्स खोज्न सघाएको चालक भगवान न्यौपानेले जानकारी दिए । एम्बुलेन्स खोजिनसक्दै रूपलालको मृत्यु भएको थियो । ‘जहाज चढ्ने रकम छैन,’ सिर्जनदेवीले भनिन्, ‘एम्बुलेन्स पनि जहाजभन्दा धेरै महँगो हुँदो रहेछ । त्यसैले सबैको सल्लाहले बस समातेका हौं ।’

एम्बुलेन्स नै ल्याएको भए पनि जामका कारण बाटो छिचोल्न सक्ने स्थिति नरहेको उनले सुनाइन् । ‘कैयौं एम्बुलेन्स साइरन बजाउँदै जाममै फसेको देखेँ’, उनले भनिन् । बसभित्रै मृत्यु भएपछि यात्रुले महादेवबेंसीस्थित प्रहरीलाई खबर गरेका थिए । घटनाको जानकारी पाएपछि अर्को गाडीमा रौतहटबाटै काठमाडौं जाँदै गरेका मृतकका भाइ रामबाबु घटनास्थल आइपुगेपछि शवको मुचुल्का गरेर प्रहरीले रौतहट पठाइदिएको छ । दुवै मिर्गौला फेल भएर गम्भीर बिरामी भएका रूपलालको यसअघि पनि ललितपुरस्थित सुमेरु अस्पतालमा उपचार गराइएको थियो ।