दसैंकै मुखमा किन हुन्छ जाम ?

१० चक्के सवारीलाई भोलिदेखि उपत्यका छिर्न निषेध
विमल खतिवडा

काठमाडौँ — राजधानी छिर्ने र बाहिरिने मुख्य सडक नागढुंगा-नौबिसे खण्डमा १२ घण्टासम्म जाम हुन थालेको छ । यसबाट दसैंका लागि घर जाने र राजधानी भित्रिनेहरूले सास्ती बेहोर्नुपरेको छ । जामकै कारण उपचार नपाएर बिरामीको ज्यानसमेत गएको छ । चाडपर्व सुरु हुनै लाग्दा थालिएको सडक मर्मतका कारण सवारी जाम बढेको हो । बिहीबारको तुलनामा शुक्रबार भने जाम कम भएको महानगरीय ट्राफिक प्रहरी महाशाखाका एसपी रवि पौडेलले बताए । 

ZenTravel

गत वर्ष पनि दसैंका बेला नागढुंगादेखि पिपला मोडसम्म सडक मर्मत गर्दा यात्रु लामो जाममा बस्न बाध्य भएका थिए । एक वर्षपछि त्यही समस्या दोहोरिएको छ । सडक विभागले सडक मर्मत गर्न थालेको दुई साता मात्र हुँदै छ । उसले काम सकेको छैन । विभागले भने सडक मर्मतका कारण जाम नभएको दाबी गरेको छ । राति १२ देखि ३ बजेसम्म मात्र सडक मर्मतको काम भइरहेको विभागको भनाइ छ ।

‘नागढुंगा-नौबिसे खण्डमा एकदमै जाम भएको छ, बढी सवारीसाधन गुड्ने यो सडकलाई बर्सेनि टालटुल गरी चलाउनुपर्ने बाध्यता छ,’ विभागका उपमहानिर्देशक एवं प्रवक्ता शिवहरि सापकोटाले भने, ‘पानी पर्न थालेपछि मर्मतको काम भएको छैन, मर्मत गरिएको सडकसमेत पानीले बिग्रिएको छ ।’ लरी (१८ चक्के सवारीसाधन) बिग्रिएका कारण यो खण्डमा जाम बढेको उनले दाबी गरे । यो सडकमा दैनिक ८ हजारभन्दा बढी सानाठूला सवारी गुड्छन् । चाडपर्वका बेला यो संख्या दोब्बर हुन्छ ।

‘क्षमताभन्दा बढी सामान बोकेर आउने सवारीसाधनका कारण यो खण्डमा बढी जाम हुने गरेको छ,’ सापकोटाले भने, ‘अहिले भएकै त्यही हो, जाम घटाउन हामी लागिपरेका छौं ।’ बुधबार राति पनि १८ चक्के लरी बाटोमै बिग्रँदा जाम भएको एसपी पौडेलले जानकारी दिए । ‘पानी परिरह्यो, त्यसलाई राति नै निकाल्न सक्ने अवस्था भएन,’ उनले भने, ‘बिहीबार बिहान पानी पर्न कम भएपछि निकाल्यौं । त्यसपछि पनि फेरि ६ वटा गाडी बिग्रिँदा समस्या भयो ।’ राजधानीबाट बाहिरिनेभन्दा भित्रिने सवारीलाई बढी समस्या छ ।

‘बाहिरबाट आउँदा सडक उकालो छ, बिस्तारै गुड्ने ठूला गाडी लाइनमा हुन्छन्,’ उनले भने । चाडपर्वलाई लक्ष्य गरी शुक्रबारबाट उक्त सडकखण्डमा प्रहरी निरीक्षकको कमान्डमा १० जना ट्राफिक प्रहरी खटाइएको छ । ‘बढी जाम हुने नागढुंगा खण्ड हेर्नकै लागि प्रहरी टोली खटाइएको हो,’ उनले भने, ‘चारवटा मोटरसाइकल पनि पठाएका छौं, त्यसमा २/२ जना बसेर सडक हेर्नेछन् ।’ तत्काल गाडी बिग्रिए २ वटा ४० टनसम्मका तौल भएका गाडीलाई उचालेर सडक छेउमा लगेर यातायात सञ्चालन गर्ने र्‍याकरसमेत परिचालन गरिएको छ । जाम हुन नदिन ओभरटेक गर्ने सवारी चालकलाई कारबाही गरिनेछ । ‘यति भएपछि केही सहज हुनेछ,’ पौडेलले भने ।

गत असारमै सक्नुपर्ने नौबिसे-नागढुंगा सडक मर्मतको काम अहिले सुरु गरिएको हो । मर्मतको जिम्मा पाएको ठेकेदार कम्पनी जीएमआरले दसैंको चहलपहल सुरु हुने बेला आएर मर्मत गरिरहेको छ । मर्मतका कारण उक्त सडकखण्डको धादिङतर्फ ३० किलोमिटरसम्म सवारी जाम हुने गरेको छ । नागढुंगा-पिपलामोड सडक मर्मतका नाममा राति राजमार्ग बन्द गर्न थालेपछि यात्रुहरू लामो जाममा बस्न बाध्य भएका छन् । नौबिसेबाट काठमाडौं पस्ने देब्रे लेनको उकालोमा बढी खाडल परेर सडक जीर्ण छ ।

खाल्डाखुल्डी बढी भएको उकालो र साँघुरो बाटो, घुमाउरा मोड, अत्यधिक भार बोकेका गाडी र लेन अनुशासन मिच्ने प्रवृत्तिले पनि सडक जाम बढाउने गरेको छ । राति बनाएको सडक भोलिपल्ट बढी भार भएका गाडीका कारण भत्कने गरेको छ । यता निर्माण कम्पनीका सञ्चालक गणेश पाण्डेले भने अत्यधिक वर्षाका कारण असारमा काम गर्न नसकिएको बताए । वर्षा सकिएपछि काम गर्न थाल्दा सडक मर्मत नसकिएको उनको भनाइ छ । शुक्रबारसम्म आफूहरूले काम सक्ने उनले बताए ।

लेखा समितिको ध्यानाकर्षण
यसैबीच प्रतिनिधिसभाअन्तर्गत सार्वजनिक लेखा समितिले नागढुंगा-नौबिसे खण्डमा यात्रुले भोग्नुपरेको समस्या समाधानका लागि तत्काल कदम चाल्न सरकारको ध्यानाकर्षण गराएको छ । ‘हामीले गृह एवं भौतिक पूर्वाधार तथा यातायात मन्त्रालयलाई शुक्रबार पत्र लेखेर पठाएका छौं,’ समितिका सचिव रोजनाथ पाण्डेले भने, ‘तीन दिनभित्रमा लिखित जवाफ मागेका छौं ।’

चाडपर्वको समयमा नागढुंगा-नौबिसे सडकखण्डमा यात्रुको आवतजावत बढी हुने भएकाले यो खण्डमा बढी सचेत हुनुपर्ने उनको भनाइ छ । ‘जामले गर्दा एम्बुलेन्स पनि चल्न नपाएर बिरामीको मृत्यु भएको कुरा आएको छ,’ उनले भने, ‘मन्त्रालयले के गरिराखेको छ ? किन यस्तो समस्या भइरहेको छ भनेर कारणसहित जवाफ मागेका हौं ।’

१० चक्केलाई काठमाडौं प्रवेश रोक
दसैंका बेला सडक जाम हुन नदिन यातायात व्यवस्था विभागले आइतबारदेखि ठूला मालवाहक सवारीलाई काठमाडौं प्रवेशमा रोक लगाएको छ । नागढुंगा-नौबिसे खण्डमा यात्रुहरू लामो समयसम्म जाममा फसेपछि विभागले शुक्रबार विज्ञप्ति जारी गरी असोज १८ सम्म १० चक्के र त्योभन्दा ठूला सवारीसाधनलाई चितवनको नारायणगढमै रोक्न भनेको हो । अत्यावश्यक औषधि र खाद्यान्न बोकेका ठूला गाडीलाई भने काठमाडौं प्रवेश गर्न दिइने विभागले जानकारी दिएको छ ।

प्रकाशित : आश्विन ११, २०७६ ०७:१६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नागढुंगा–नौबिसेमा १२ घन्टासम्म जाम, यात्रुलाई चरम सास्ती

तत्काल जाम खुलाउन संसदीय समितिको निर्देशन
विमल खतिवडा

काठमाडौँ — दसैं नजिकिदैं गर्दा राजधानी प्रवेश गर्ने र बाहिरिने प्रमुख सडकको नागढुंगा–नौबिसे खण्डमा यात्रुले आवागनममा सास्ती भोगिरहनु परेको छ । सडक जाम हुँदा उपचार नपाएर एम्बुलेन्समा चल्न नपाएर बिरामीको ज्यानसमेत गएको छ ।

उपत्यका भित्रने र बाहिरिने सवारी साधन यही खण्डमा आएर १२ घन्टासम्म जाममा पर्ने गरेका छन् ।

लामो समयको जामले चरम सास्ती भोग्नु परेको गुनासो यात्रुहरूको छ । जब चाडबाड आए सडक मर्मत थालिँदा जाम हुन थालेको गुनासो यात्रुहरूको छ । बिहीबारभन्दा शुक्रबार कम जाम भएको महानगरी ट्राफिक प्रहरी महाशाखाका एसपी रवि पौडेलले दाबी गरेका छन् ।

गत वर्ष यही समयमा नागढुंगादेखि पिपलामोडसम्म सडक मर्मत गर्दा यात्रुले यस्तै चरम सास्ती खेप्नु परेको थियो । ठीक एक बर्षपछि त्यही समस्या दोहोरिएको छ । सडक विभागले सडक मर्मत गर्न थालेको दुइ साता हुँदै छ । तर अझै पूरा भएको छैन । विभागले भने सडक मर्मतले गर्दा जाम नभएको दाबी गरेको छ । आवागमन कम हुने रातिको १२ बजेदेखि ३ बजेसम्ममात्र सडक मर्मतको काम भइरहेको दाबी विभागको छ ।

‘नागढुंगा–नौबिसे खण्डमा एकदमै जाम भएको छ, बढी सवारी साधन गुड्ने यो सडकलाई बर्षेनी टालटुल गर्दै चलाउनु पर्ने बाध्यता छ,’ सडक विभागका उपमहानिर्देशक एवं प्रवक्ता शिवहरि सापकोटाले भने, ‘पानी पर्न थालेपछि मर्मतको काम भएको छैन, मर्मत गरिएको सडकसमेत पानीले बगाएको छ ।’

उनले सडक मर्मतका कारण नभई लरी (१८ चक्के सवारी साधन) बिग्रिएका कारण जाम भएको बताए । यो काठमाडौं भित्रने मुख्य नाका हो । यो खण्ड भएर दैनिक ८ हजारभन्दा बढी साना/ठूला सवारीसाधन ओहोर/दोहोर गर्छन । चाडबाडको समयमा यो संख्या दोब्बर हुन्छ । ‘क्षमता भन्दा बढी सामान बोकेर आउने सवारी साधनका कारण यो खण्डमा बढी जाम हुने गरेको छ,’ उनले भने, ‘अहिले भएकै त्यही हो, जाम घटाउनका लागि सरोकारवाला निकाय लागिपरेका छौं ।’ यो खण्ड समस्याको रूपमा देखा परेको छ ।

महानगरीय ट्राफिक प्रहरी महाशाखाका एसपी पौडेलका अनुसार बुधवार राती १८ चक्के लरी बिग्रँदा जाम भएको हो । ‘पानी परिरह्यो, त्यसलाई राती नै निकाल्न सक्ने अबस्था भएन’ उनले भने, ‘विहिवार विहान पानी कम भएपछि निकाल्यौं, यो निकाल्नासाथ फेरी ६ वटा गाडी बिग्रिँदा समस्या भयो ।’ विहिवार विहानदेखिको जामले गर्दा समस्या भएको हो । राजधानीबाट बाहिरिने सवारी साधनका लागि समस्या छैन । बाहिरबाट राजधानी भित्रिने सवारी आवागमन शुक्रवार राती अवेरसम्म सहज बनी सकेको छैन ।

‘बाहिरबाट आउँदा सडक उकालो छ, ठूला गाडी लाइनमा छन्, विस्तारै गुड्छन्’ उनले भने, ‘त्यसैले जाम भएको हो ।’ सडक मर्मतले समस्या नभई सवारी साधन बिग्रिएकै कारण जाम भएको उनले दाबी गरे । चाडबाडलाई लक्षित गर्दै शुक्रबारबाट प्रहरी निरिक्षकको कमाण्डमा १० जना ट्राफिक प्रहरी खटाइएको छ ।

‘प्रहरी टोली बढी जाम हुने नागढुंगा खण्ड हेर्नकै लागि खटाइएको हो’ उनले भने, ‘चारवटा मोटरसाइकल पनि पठाएका छौं, मोटरसाइकलमा २/२ जना बसेर सडक हेर्ने छन् ।’ तत्काल गाडी बिग्रिए २ वटा ४० टनसम्मका तौल भएका गाडीलाई उचालेर सडक छेउमा लगेर यातायात सुचारु गर्ने र्‍याकरसमेत परिचालन गरिएको छ ।

उनका अनुसार जाम हुन नदिन ओभरटेक गर्ने सवारी चालकलाई कारबाही गरिने छ । ओभरटेकले गर्दा समेत जाम हुने गरेको छ । ‘यति भएपछि केही सहज हुनेछ,’ उनले भने,‘ अहिले भएको जाम शुक्रवार राती अबेरसम्म हटाउने छौं ।’

यसैबीच प्रतिनिधी सभाको सार्वजनिक लेखा समितिले नागढुंगा–नौबिसे खण्डमा यात्रुले भोग्नु परेको समस्या समाधानप्रति तत्काल कदम चाल्न सरकारको ध्यानाकर्षण भएको जनाएको छ । ‘हामीले गृह र भौतिक पूर्वाधार तथा यातायात मन्त्रालयलाई शुक्रवार पत्र लेखेर पठाएका छौं’ समितिका सचिव रोजनाथ पाण्डेले भने, ‘तीन दिनभित्रमा लिखित जवाफ मागेका छौं ।’

‘चाडपर्वको समयमा नागढुंगा–नौबिसे सडक खण्डमा यात्रुको आवत/जावत बढी हुन्छ । यो सडक उपत्यका भित्रने र बाहिरिने लाइफलाइन हो,’ उनले भने, ‘जामले गर्दा एम्बुलेन्स पनि चल्न नपाएर बिरामीको मृत्यु भएको कुरा आएको छ, सडक खुलाउन र व्यवस्थित गर्नका लागि के योजना छ, मन्त्रालयले के गरिराखेको छ र किन यस्तो समस्या भइरहेको छ भनेर कारणसहित जवाफ मागेका हौं ।’

प्रकाशित : आश्विन १०, २०७६ १९:३९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×