सार्क विदेशमन्त्रीस्तरीय साइडलाइन बैठक : एउटै मञ्चमा एकैपटक बस्न चाहेनन् भारत-पाकिस्तान

देवेन्द्र भट्टराई

न्यूयोर्क — दक्षिण एशियाली क्षेत्रीय सहयोग संगठन (सार्क) को शिखर बैठकसहतिका प्रक्रियाहरु अवरुद्ध भएको लामो समयपछि न्यूयोर्कमा बिहीबार अपरान्ह सम्पन्न सार्क विदेशमन्त्रीस्तरीय साइडलाइन बैठक पनि खासै 'उपलब्धिमूलक'  देखिएन ।

ZenTravel

सार्क अध्यक्ष राष्ट्र नेपालको आग्रह तथा समन्वयमा न्यूयोर्कमा राष्ट्रसंघीय महासभा बैठक जारी रहेका बेला स्थानीय होटल वेस्टिनमा गरिएको साइडलाइन बैठकमा सार्क सदस्यहरु अफगानिस्तान, बंगलादेश र श्रीलंकका विदेशमन्त्री उपस्थित हुन सकेनन् ।
भारत र पाकिस्तानका विदेशमन्त्री बैठकमा सहभागी भएपनि बैठकको फरक-फरक समयमा उपस्थित भए । उनीहरुले एकैसमयमा एउटै मञ्च सेयर गर्न चाहेनन् ।

दिउँसो १ बजे सुरु भएको बैठकमा भारतीय विदेशमन्त्री एस जयशंकर सुरुमै आएर आफ्नो मन्तव्य राख्दै आधा घण्टाभित्रैमा होटलबाट बाहिरिएका थिए ।

जयशंकर बाहिरिएपछि मात्रै बैठकस्थलमा आएका पाकिस्तानी विदेशमन्त्री शाह महमद कुरेसीले 'कश्मीर मामला हल नभएसम्म भारतसँग कुनै प्रकारको साझेदारी हुन नसक्ने' भन्दै मिडियालाई प्रतिक्रिया दिएका थिए ।

विशेष गत अगष्ट ५ मा भारतले संविधानको ३७० धारा निलम्बन गर्दै जम्मु-कश्मिरलाई छुट्टै राज्यको मान्यता दिएपछि बढेको भारत-पाक विवादले क्षेत्रीय तहमा बेमेलको अवस्था निम्त्याएको हो ।

बैठकमा अफगानिस्तानका सहायक विदेशमन्त्री, बंगलादेशबाट विदेश मन्त्रालयका महानिर्देशक र श्रीलंकाका विदेश सचिव मात्रै उपस्थित थिए ।

तर यो साइडलाइन बैठकलाई आयोजकका तर्फबाट परराष्ट्रमन्त्री प्रदीप ज्ञवालीले निकै उपलब्धिमूलक भनेर प्रतिक्रिया दिएका छन् ।

'हामीबीच बलियो क्षेत्रीय सहकार्य जरुरी रहेको बोध सबै सदस्य राष्ट्रले गरेका छन् । व्यापार, पर्यटन र लगानीका क्षत्रेमा बलियो सहकार्य आवश्यकता देखिएको छ,' बैठकपछि मन्त्री ज्ञवालीले भने, 'जलवायु परिवर्तन, गरिवी निवारण र आतंकवाद विरोधमा साझा दृष्टिकोण चाहिएको बोध भएको छ । अब सार्क आवश्यक रहेन, यो अनुपयुक्त भयो भनेर कसैले भनेको छैन । सबैले आ-आफ्नो देशमा रहेका सार्कका संयन्त्र र सांगठनिक कामबारेमा जानकारी दिएका छन् ।'

मन्त्री ज्ञवालीका अनुसार भारतीय विदेशमन्त्री जयशंकरले 'भारत समृद्ध दक्षिण एशिया देख्न चाहेको' बताउँदै सार्क संयन्त्रकै कारण पाएका उपलब्धीहरुको चर्चा पनि गरेका थिए । उनले सार्क स्याटेलाइट, सार्क युनिभर्सिटी, सार्क डिजास्टर सेन्टर जस्ता संयन्त्रबारेमा चर्चा गरेका थिए ।

प्रकाशित : आश्विन १०, २०७६ ११:२२
ADVERTISEMENT
प्रतिक्रिया
पठाउनुहोस्
ADVERTISEMENT

परराष्ट्रमन्त्री ज्ञवालीद्वारा साउदी र बहराइनका विदेशमन्त्रीसँग भेटवार्ता, नेपालीको श्रम अधिकार प्रत्याभूति गराउन आग्रह

देवेन्द्र भट्टराई

न्यूयोर्क — परराष्ट्रमन्त्री प्रदीप ज्ञवालीले खाडी मुलुक साउदी अरेबिया र बहराइनका विदेशमन्त्रीलाई अलगअलग भेटवार्ता गर्दै दुबै देशमा रहेका नेपाली श्रमिकको सेवासुविधा तथा श्रमिक अधिकार प्रत्याभूतिका लागि आग्रह गरेका छन् ।

बुधबार अपरान्ह साउदी अरेबियाका विदेशमन्त्री इव्राहिम अब्दुलाजिज अल असफसाग न्युयोर्कस्थित राष्ट्रसंघीय स्थायी प्रतिनिधि कार्यालयमा भेटवार्ता गर्दै मन्त्री ज्ञवालीले द्विपक्षीय श्रम समझदारीका थाती रहेका प्रक्रियालाई अघि बढाउन आग्रह गरेका छन् । झण्डै ६ लाख नेपालीले साउदीमा पाइरहेको रोजगारी अवसरप्रति कृतज्ञता जनाउँदै मन्त्री ज्ञवालीले नेपालमा आएको राजनीतिक स्थिरतासँगै विभिन्न क्षेत्रमा लगानी तथा स्रोत पहिचानको जरुरी भएको समकक्षी अल असफलाई बताएका थिए । ‘अब बढी आर्थिक साझेदारीतिर लाग्न जरुरी छ । नेपालमा पर्यटन, कृषिको आधुनिकीकरण र मानव संशाधनको विकासमा साउदी लगानीको अपेक्षा गरिएको छ,’ भेटवार्तापछि मन्त्री ज्ञवालीले भने—‘नेपालमा लगानीको अनुकूल वातावरण बनेको छ, आन्तरिक बजार पनि फराकिलो बनेको छ भनेर अवगत गराएँ ।’

कुराकानी क्रममा साउदी अरेबिया सरकारले साउदी फन्ड फर डेभलेपमेन्टमार्फत नेपाल सरकारको आर्थिक समुन्न्ती अभियानमा पुर्‍याएको सहयोगको चर्चा भएको थियो । साउदी अरेबिया आगामी वर्ष मानव अधिकार परिषद्को चुनावमा एशिया प्यासिफिक क्षेत्रबाट सदस्यमा उठ्न लागेकाले साउदी विदेशमन्त्री अल असफले नेपालको ‘फेभर’ चाहेका थिए । अर्कातिर, हाल परिषद्मा सदस्य रहेको नेपालले आगामी बर्ष पनि सदस्यतामा पुन उम्मेदारी दिन लागेको स्थितिमा परस्पर सहयोगको उपाय पहिल्याइने सहमति भएको छ ।

यसैगरी, बहराइनका विदेशमन्त्री खालिद बिन अहमद अल खालिफासँगको भेटवार्तामा मन्त्री ज्ञवालीले द्विपक्षीय संवादको नियमित संयन्त्र गठनका लागि आग्रह गरेका छन् । बहराइनले भने नेपालबाट उच्चस्तरीय बिजिनेस डेलिगेसन पठाउन मन्त्री ज्ञवालीसँग आग्रह गरेको छ । नेपालमा लगानीको सम्भावना पहिल्याउन र आवश्यक क्षेत्र पहिचानमा सहजीकरणका लागि डेलिगेसन पठाउनका लागि आग्रह गरिएको हो । बहराइनमा झण्डै १० हजार नेपाली श्रमिक छन् ।

यसैबीच, नेपालले पश्चिम अफ्रिकी मुलुक घानासँग दौत्य सम्बन्ध कायम गरेको छ । परराष्ट्रमन्त्री ज्ञवाली र घानाकी विदेशमन्त्री सर्ली अयोरकोर बोट्च्वेबीच दौत्य सम्बन्ध स्थापनाको समझदारी पत्रमा बुधबार अपरान्ह हस्ताक्षर भएको छ । पछिल्लो राष्ट्रसहित गरेर नेपालको कूटनीतिक सम्बन्ध रहेको मुलुकको संख्या १६८ पुगेको छ ।

दुबै देशका विदेश मन्त्रीसँगको भेटवार्ता क्रममा न्यूयोर्कस्थित स्थायी प्रतिनिधि अमृतबहादुर राई, न्यूयोर्कस्थित राष्ट्रसंघीय नियोगका प्रवक्ता उपसचिव लोकबहादुर पौडेल क्षेत्रीसमेत उपस्थित थिए । मन्त्री ज्ञवालीले भेनेजुएलाका समकक्षी जोर्ग अलबर्टो एरेजिया मोन्टोसेराट र नर्वेका अर्न्तराष्ट्रिय विकासमन्त्री ड्याग इन्गे उलेस्टेइनसँग पनि द्विपक्षीय भेटवार्ता गरेका थिए ।

प्रकाशित : आश्विन ९, २०७६ ०८:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×