शिक्षा अधिकृतसहित चारविरुद्ध भ्रष्टाचार मुद्दा

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले पर्साको जगरनाथपुर गाउँपालिकाका शिक्षा अधिकृत राजेश्वरप्रसाद चौरसियासहित ४ जनाविरुद्ध बुधबार विशेष अदालतमा भ्रष्टाचार मुद्दा दायर गरेको छ ।

चौरसिया र जगरनाथपुर गाउँपालिकाकै श्रीजनसेवा प्राविका प्रधानाध्यापक हकिम अन्सारीले राहत करार शिक्षक र बाल विकास सहयोगी नियुक्तिमा दस्तुर भन्दै अवैध रूपमा ३ लाख ९० हजार रुपैयाँ लिएको र फर्जी व्यक्तिलाई ३ लाख १४ हजार रुपैयाँ तलब भत्ता निकासा गरेको देखाई भ्रष्टाचार गरेको अनुसन्धानबाट पुष्टि भएकाले उनीहरूविरुद्ध मुद्दा दायर गरिएको अख्तियारले जनाएको छ ।

पर्साकै श्रीनेपाल राष्ट्रिय मावि सेढवा बिर्ताका पूर्वप्रधानाध्यापक महेशप्रसाद यादवले चौरसिया र अन्सारीसितको मिलेमतोमा फर्जी व्यक्तिलाई तलब भत्ता खुवाएको देखाई अनियमितता गरेकाले उनीविरुद्ध समेत जेल सजाय र जरिवाना माग गरिएको अख्तियारले उल्लेख गरेको छ ।

यसैगरी अख्तियारले चितवनको इलाका प्रहरी कार्यालय खैरहनीका प्रहरी नायब निरीक्षक पुष्पाकुमारी केसीविरुद्ध समेत बुधबारै मुद्दा दायर गरेको छ । केसीले नक्कली शैक्षिक योग्यताको प्रमाणपत्र पेस गरी प्रहरी सेवामा प्रवेश गरी बढुवा भएको छानबिनबाट पुष्टि भएकाले उनीविरुद्ध मुद्दा दायर गरिएको अख्तियारले जनाएको छ । मुद्दा दायर भएसँगै चारै जना सेवाबाट निलम्बित भएका छन् ।

प्रकाशित : आश्विन १, २०७६ २०:३२
प्रतिक्रिया
पठाउनुहोस्

सुदृढ बन्दै छ प्रेस : सञ्चारमन्त्री

कान्तिपुर संवाददाता

मोरङ — सञ्चार तथा सूचना प्रविधिमन्त्री गोकुलप्रसाद बाँस्कोटाले मिडिया जगत सुदृढ बन्दै गएको बताएका छन् । विराटनगरमा बुधबार पत्रकारसँग उनले समानुपातिक विज्ञापन, क्लिन फिड, पत्रकारको न्यूनतम पारिश्रमिक लागू गराउने बताए ।

‘पत्रकारहरूले नराम्रो मात्रै देखाउँदै आएका छन्, सरकारले गरिरहेका राम्रा काम देखाइदिए जनतामा आशा पलाउँथ्यो,’ उनले भने, ‘पत्रकारहरूले राम्रा कामबारे लेखिदिएर परिवर्तन भइरहेको सूचना आम जनसमुदायमा पठाउने दायित्व निर्वाह गर्नुपर्छ ।’

नागरिकका कतिपय काम सरकारले समयमा नगरेको गुनासो रहेको उनले स्विकारे । ‘नागरिकको सही आलोचना स्वीकार्य हुन्छ,’ उनले भने, ‘तर पूर्वाग्रही भएर सरकारको आलोचना गर्नेलाई सहन सकिँदैन ।’

प्रकाशित : आश्विन १, २०७६ २०:१०
पूरा पढ्नुहोस्
प्रतिक्रिया
पठाउनुहोस्