रोल्पा पहिरो : मृतकको शव निकालियो, पोष्टमार्टम गर्न चिकित्सक गाउँ जाने

काशीराम डाँगी

रोल्पा — बिहीबार राति रोल्पाको थबाङ-२ छेर्लोबाङस्थित सहिद मार्ग अन्तर्गत घर्तीगाउँ-थबाङ खण्डमा पहिरो खस्दा मृत्यु भएका ६ जनाको शव निकालिएको छ । उनीहरु बसेको घरमाथिबाट पहिरो खसेपछि सबैको मृत्यु भएको थियो । 

घरमाथि पहिरो आएपछि पुरिएकामध्ये थबाङ गाउँपालिका-२ छेर्लोबाङस्थित २८ वर्षकी शीरकुमारी र उनका छोरा ४ वर्षका असल लगायत पुरिएका थिए । प्रहरीले उद्धारका क्रममा शुक्रबार बिहान आमा–छोराको शव फेला पारेको थियो भने पुरिएर ज्यान गुमाएका अन्य ४ को शव दिउँसो निकालिएको प्रमुख जिल्ला अधिकारी लक्ष्मण ढकालले बताए । पुरिएको घरको तल्लो तलामा बास बसेका वर्ष ३६ का जय बुढामगर, पत्नी वर्ष ४० की मुलज्योति बुढामगर, छोरीहरु वर्ष १० की गृष्मा र डेढ वर्षकी अर्की छोरीको ज्यान गएको थियो । उद्धारकर्ताहरुले उनीहरुलाई जीवितै फेला पार्ने प्रयास गरेपनि सफल भएनन् ।

प्रहरी र स्थानीयको पहलमा पहिरोले थिचेको घरभित्र पुरिएका थप चार जनाको शव समेत निकालिएको हो । उद्धारकर्ताले शुक्रबार दिउँसो घरको तल्लो तलामा रहेका शव निकालेको प्रमुख जिल्ला अधिकारी ढकालले बताए । उनका अनुसार घरटापछि उद्धारका लागि परिचालित प्रहरी र स्थानीयले बिहान दुई जनाको र दिउँसो चार जनाको शव पहिरोबाट निकालेका हुन् ।
यसैबीच घटनास्थलमा पानी परिरहेको र यातायातका साधन पुग्न नसक्ने भएपछि मृतकका शवको पोष्टमार्टम गर्न चिकित्सक गाउँमै पठाउने निर्णय भएको जिल्ला सुरक्षा समितिले जनाएको छ । ‘पानी परेको र सडक अवरुद्ध भएकाले मृतकको शव पोष्टमार्टमका लागि जिल्ला अस्पताल ल्याउन नसकिने अवस्था छ,' जिल्ला सुरक्षा समिति तथा जिल्ला दैवी प्रकोप उद्धार समितिका संयोजक रहेका प्रजिअ ढकालले भने, ‘त्यसैले घटनास्थलमै मृतकको शवको पोष्टमार्टम गर्न रोल्पा जिल्ला अस्पतालबाट डा प्रकाशबहादुर बुढालाई पठाउने तयारी भएको हो ।’

घटनास्थल जान चिकित्सक बुढासहितको जिल्ला स्वास्थ्यको टोली शुक्रबार हिँडेपनि यातायात अवरुद्ध भएकाले शनिबार मात्रै पुग्ने छ । सदरमुकाम अघि कोर्चाबाङ, घर्तीगाउ, इरिबाङ र कुरेली लगायतका विभिन्न स्थानमा सडक अवरुद्ध हुने गरी पहिरो खसेकाले आवतजावत गर्न मुस्किल छ ।

प्रकाशित : भाद्र २७, २०७६ १६:१५
ADVERTISEMENT
प्रतिक्रिया
पठाउनुहोस्
ADVERTISEMENT

कृषि र पशु कार्यालय सारिएको विरोधमा किसानको आन्दोलन

चन्द्र कार्की

तेह्रथुम — जिल्लामै कृषि ज्ञान केन्द्र र पशु विज्ञ केन्द्रको कार्यालय हुनुपर्ने भन्दै तेह्रथुमका किसानले आन्दोलन सुरु गरेका छन् । म्याङलुङमा रहेका कृषि र पशु कार्यालय धनकुटा सारिएको विरोधमा किसानले चरणबद्ध आन्दोलन सुरु गरेका हुन् । उनीहरुले शुक्रबार म्याङ्लुङ बजारमा लागेको साप्ताहिक हाटमा कृषि उत्पादन बिक्री वितरण गरेनन् ।

जिल्लाभरका किसान भेला भएर म्याङलुङ बजारको टुँडिखेलमा लागेको साप्ताहिक हाटमा पूर्वी तराईबाट व्यापारीले ल्याएका तरकारी तथा अन्य कृषि उपजसमेत बिक्री गर्न नदिएको स्थानीयले बताए ।

आफूहरुको माग सुनुवाई नभएसम्म बजार क्षेत्रमा किसानका कुनै पनि उत्पादन बिक्रीका लागि नल्याउने र बाहिरी जिल्लाबाट समेत कृषिजन्य उत्पादन बिक्रीका लागि ल्याउन नदिने जिल्ला किसान सञ्जालका अध्यक्ष योगेन्द्र गड्तौलाले बताए । जिल्लास्तरमा पाउँदै आएको कृषिसम्बन्धी सरकारी सेवा कटौती भएर धनकुटा पुगेपछि बाध्य भएर आन्दोलन थालिएको राष्ट्रिय कृषि समूह महासंघ अध्यक्ष अविन्द्र श्रेष्ठले बताए । शुक्रबारको कोणसभालाई सम्बोधन गर्दै सञ्जालका अध्यक्ष गड्तौलाले तत्कालै आफूहरुका माग सुनुवाई नभए चरणबद्ध आन्दोलनमा उत्रिने चेतावनी दिए।

म्याङलुङ बजारमा म्याङलुङ र लालीगुराँस नगरपालिका, पाँचथरको कुम्मायक र तुम्बेवा गाउँपालिका र पूर्वी तराईसम्मका किसान र व्यापारीले तरकारी र अन्य कृषि उपज बिक्रीका लागि ल्याउने गर्छन् । किसानको अवरोधले शुक्रबार म्याङलुङ बजारमा तरकारी, दूध, दलहन, तेलहन, मसलाबाली, खसीबोका, कुखुरा, बंगुर लगायत कुनै पनि बस्तु बिक्री वितरण भएन । बजार क्षेत्रमा तरकारी र मासुजन्य बस्तुको अभाव हुन थालेको म्याङलुङ बजारमा रहेको होटल सञ्चालक तेजु खड्काले बताए ।

तरकारी अभावमा पकाएर खुवाउन समस्या भएको होटल व्यवसायीको भनाइ छ ।

प्रकाशित : भाद्र २७, २०७६ १६:०२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT