राजसंस्था हटाउन ‘रअ’ को भूमिका बारे छानबिन हुनुपर्छ : राप्रपा अध्यक्ष थापा  

प्रमिता ढकाल

भरतपुर — राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले नेपालबाट राजसंस्था हटाउन भारतीय गुप्तचर संस्था ‘रअ’ ले नेपाली नेता प्रयोग गरेको आरोप लगाएका छन् । 

बिहीबार भरतपुर विमानस्थलमा पत्रकारहरुसँग कुराकानी गर्दै अध्यक्ष थापाले ‘रअ’अले तत्कालीन नेकपा (माओवादी) का अध्यक्ष पुष्पकमल दाहाललाई प्रयोग गरी राजसंस्था हटाउन षडयन्त्र गरेको भन्दै यस विषयमा छानबिन हुनुपर्ने माग समेत गरेका छन्।

‘यो सामान्य विषय हुँदै होइन,’ उनले भने, ‘यस विषयमा सर्वदलीय उच्चस्तरीय संसदीय छानबिन समिति गठन गरी सत्यतत्थ्य पत्ता लगाउनु पर्छ।’ एउटा विदेशी गुप्तचर संस्थाले नेपालको राजनीतिक व्यवस्थाको परिवर्तनमा निर्णायक भूमिका खेल्नु र त्यसमा राजनीतिक दलका नेता प्रयोग हुनु निकै संवेदनशील र गम्भीर विषय भएको उनले टिप्पणी गरे।

दुई तिहाई बहुमतको सरकारले दुई वर्ष पुग्दा पनि जनतालाई सकारात्मक परिवर्तनको अनुभूति दिलाउन नसकेको भन्दै उनले देशमा राजनीतिक परिवर्तन पछि जनताको अभिमत विना नै धर्म निरपेक्ष लागू गर्नु त्रुटि भएको बताएका छन्। पछिल्लो समय देश भयानक धार्मिक द्वन्द्वमा फस्ने खतरा बढ्दै गएकोतर्फ उनले सचेत गराएका छन्।

धर्म परिवर्तनको नाममा भइरहेका गतिविधिलाई समयमा नै नियन्त्रण गर्न नसके सामाजिक सद्भाव र एकतामा खलल पुग्ने उनको भनाई छ। नेपालगञ्जबाट दैलेख पठाइएका गाई हत्याको विषयमा छानबिन गरी दोषीलाई कारवाही गर्न थापाले माग गरेका छन्।

प्रकाशित : भाद्र १९, २०७६ १२:२५
प्रतिक्रिया
पठाउनुहोस्

पूर्व सभासद् डिबी कार्की पक्राउ

जनकराज सापकोटा

काठमाडौँ — प्रहरीको केन्द्रीय अनुसन्धान ब्युरो (सीआईबी)ले पूर्वसभासद् डोलबहादुर (डीबी) कार्कीलाई पक्राउ गरेको छ। सीआईबीका एसपी दीपक रेग्मीका अनुसार कार्कीलाई बिहीबार बिहान काठमाडौंबाट पक्राउ गरिएको हो । उनले भने, 'कार्कीलाई अदालतले दोषी ठहर गरेको थियो । त्यसैले हामीले पक्राउ गरेका हौं । उनीबारे फाइलहरु अध्ययन भइरहेको छ ।' उनले विस्तृतमा केहीसमय पछि जानकारी आउने बताए । 

पुर्ख्यौली स्याङ्जा घर भइ हाल लमजुङ निवासी कार्की समानुपातिकको कोटामा पहिलो संविधानसभामा तत्कालीन एमालेबाट सभासद् चुनिएका थिए। उनले २०६७ मा प्रहरी भर्नाका क्रममा जागिर लगाइदिने भन्दै एक दर्जन बढी सर्वसाधारणसँग रकम लिएका थिए। एक लाख रुपैयाँ घुस लिँदै गर्दा रंगेहात पक्राउ पनि परेका थिए।

अख्तियार दुरुपयोग अनुसन्धान आयोगको टोलीले कार्कीलाई उनकै निवासबाट पक्राउ गरेको थियो। सो मुद्दामा दोषी ठहर गर्दै विशेष अदालतले उनलाई ६ महिना कैदा र एक लाख रुपैयाँ जरिवाना तोकेको थियो। सो निर्णयमा चित्त नबुझेर कार्की सर्वोच्च अदालतमा गएका थिए।

कार्की पूर्वगृहमन्त्री वामदेव गौतमका निकटतम मानिन्छन्। पहिलो संविधानसभाको चुनावपछि बनेको पुष्पकमल दाहाल नेतृत्वको सरकारमा गौतम गृहमन्त्री हुँदा प्रहरी सरुवा बढुवामा कार्कीको हालिमुहाली निकै चल्थ्यो।

प्रकाशित : भाद्र १९, २०७६ १२:२०
पूरा पढ्नुहोस्
प्रतिक्रिया
पठाउनुहोस्