संविधान दिवसको बिदा व्यक्तिगत काम गर्नका लागि होइन : मन्त्री बाँस्कोटा

रासस

काठमाडौँ — नेपाल सरकारका प्रवक्ता एवं सञ्चार तथा सूचनाप्रविधि मन्त्री गोकुलप्रसाद बाँस्कोटाले संविधान दिवसलाई राष्ट्रिय दिवसका रुपमा मनाउन सरकारले बिदा दिएको बताएका छन् । उनले सो दिनको बिदामा सबै सचेत नागरिकले घरघरमा राष्ट्रिय झण्डा फहराउनुपर्ने बताए ।

'सरकारले राष्ट्रिय दिवस मनाउनका लागि बिदा दिएको हो,' उनले भने, 'व्यक्तिगत मोजमजा गर्नका लागि होइन ।'

सञ्चारमन्त्री बाँस्कोटाको अध्यक्षतामा गठित उपसमितिले संविधानबारे विशेष सामग्री प्रकाशन, प्रसारण गर्न सबै सञ्चारमाध्यमलाई आग्रह पनि गरेको छ । विसं २०७२ असोज ३ गते संविधानसभाबाट नेपालको संविधान जारी भएको दिनलाई राष्ट्रिय दिवसका रुपमा मनाइन्छ ।

सरकारले राष्ट्रिय झण्डा र राष्ट्रिय गानको प्रयोगसम्बन्धी कार्यविधि, २०६९ परिवर्तन गरी राष्ट्रिय झण्डालाई निजी घरमा पनि राख्न पाइने गरी निर्देशिका समेत परिवर्तन गरेको छ । दिवसको मूल समारोह समितिअन्तर्गत गठित प्रचारप्रसार उपसमितिको आजको बैठकमा सो अवसरमा राष्ट्रिय झण्डा र राष्ट्रियतालाई केन्द्रमा राखी संविधानको महत्व झल्काइने जानकारी दिइएको हो ।

झण्डा प्लास्टिकको बनाउन नपाइने र कपडा वा कागजको झण्डा हुनुपर्ने निर्देशिकामा उल्लेख छ । झण्डालाई सम्मानपूर्वक प्रयोग गरी टिसर्टका रुपमा पनि लगाउन पाइने प्रबन्ध गरिएको छ ।

मन्त्री बाँस्कोटाले २०६२/०६३ मा जन्मेका नयाँ पुस्ताले पनि संविधानबारे बोध गर्ने गरी आकर्षक प्रचारप्रसार हुनुपर्ने भएकाले यसका लागि नवीन सुझाव ग्रहण गरिने बताए । 'संविधान त्यतिकै आएको होइन, अब संविधान संशोधन भए पनि अर्को राष्ट्रिय दिवस हुँदैन । जो जो जतिसुकै उफ्रेपनि गणतन्त्र फालिँदैन,' सरकारका प्रवक्तासमेत रहेका मन्त्री बाँस्कोटाले भने, 'कतिपय अवस्थामा अराजकता पनि देखिन्छ, अधिकारको उन्माद तर कर्तव्यको शून्यता देखिन्छ । यस्तो अवस्था अन्त्यका लागि युवापुस्तालाई पनि समेट्ने कार्यक्रम गरौँ । हरेक प्रगतिभित्र इतिहासको जीवन्तताको विरासत भने चाहिन्छ ।'

मन्त्रालयका सचिव महेन्द्रमान गुरुङले दिवसलाई व्यापक र जनस्तरमा लैजान यही भदौ ४ गते सम्पन्न मूल समारोह समितिको बैठकमा प्रधानमन्त्री एवं मूल समारोह समितिका अध्यक्ष केपी शर्मा ओलीको निर्देशनानुसार सबै नेपालीले हाम्रो दिवस हो भन्ने भावना विकासका लागि उपसमितिको महत्वपूर्ण भूमिका हुने बताए ।

उपसमितिले असोज २ गते नेपालको संविधानका विषयमा केन्द्रित रही विशेष परिसंवाद र प्रचारप्रसार गर्ने, राष्ट्रियस्तरका पत्रपत्रिकामा संविधान विशेषाङ्क प्रकाशन गरी संविधानको बहुआयामिक पक्षलाई उजागार गर्ने, सबै सञ्चार माध्यमबाट संविधानको महत्व प्रसारण गर्ने, असोज ३ गतेको मूल कार्यक्रम नेपाल टेलिभिजन, रेडियो नेपाललगायत राष्ट्रिय प्रसारणका साथ प्रत्यक्ष प्रसारण गर्ने, रेडियो नेपालले असोज ४ गते जागरण गीत सम्मेलन गर्ने, ‘मास एसएमएस’ गर्ने, सिनेमा हलमा सिनेमा प्रारम्भ हुनुअघि राष्ट्रिय गान बजाउने आदि कार्यबारे जिम्मेवारी बाँडफाँट गरेको छ ।

दिवसलाई औपचारिक नबनाई जनजनमा संविधानबारे चेतना फैलाउनुपर्ने, प्रचार सामग्री तयार गर्ने, संविधानसँगका जल्दोबल्दो विषय पहिचान गर्नुपर्ने, व्यवसायीले सामानहरुमा विशेष छुट दिने, निःशुल्क स्वास्थ्य परीक्षण गर्ने, विद्यालय तहमा संविधानबारे प्रचार गर्ने आदि सुझाव बैठकमा दिइएको छ ।

दिवसको मूल नारा ‘संविधान तथा राष्ट्रिय दिवस हर्षोल्लासपूर्वक मनाऔं, घरघरमा राष्ट्रिय झण्डा फहराऔं’ भन्ने तय भएको छ । उक्त नारा मोबाइलमा एसएमएस सन्देशमार्फत सबैलाई दिवसका अवसरमा पठाइनेछ । सन्देशमा झण्डाको रङ र आकारका बारेमा पनि जानकारी दिइनेछ ।

प्रकाशित : भाद्र ११, २०७६ १५:०६
प्रतिक्रिया
पठाउनुहोस्

पर्यटनमन्त्रीको प्रश्न– 'पोखराबाट प्लेनमा के बोकाएर पठाउनुहुन्छ ?'

दीपक परियार

पोखरा — संस्कृति, पर्यटन तथा नागरिक उड्डयनमन्त्री योगेश भट्टराईले बुधबार निर्माणाधिन पोखरा क्षेत्रीय अन्तर्राष्ट्रिय विमानस्थलको निरीक्षण गरे । विमानस्थल निर्माणको प्रगतिबारे जानकारी लिए । जनप्रतिनिधिका कुरा र स्थानीयका गुनासा पनि सुने । सबैका कुरा सुनेपछि जनप्रतिनिधितिर फर्कदै उनले सोधे– 'मान्छेबाहेक प्लेनमा बोकाएर पठाउने के छ तपाईंहरुसँग ?'



अन्तर्राष्ट्रिय विमानस्थल बनिसकेपछि हवाइजहाजले मान्छे मात्रै नबोकेर व्यापार पनि गर्नुपर्ने उनले बताए। ‘यहाँबाट कार्गो हुन सक्छ। कार्गोका निम्ति मालसामान चाहियो। पोखराका जनप्रतिनिधि साथीहरु हुनुहुन्छ, प्लेनले के बोकेर जान्छ? मान्छेमात्रै बोकेर जान्छ कि माल बोकेर जान्छ?,’ उनले भने, ‘माल बोकेर जानुपर्‍यो। माल के छ तपाईंहरुसँग? तपाईंले के माल बोकाएर पठाउनुहुन्छ प्लेनमा? सोच्नुस्।’ उनले प्यासेन्जर फ्लाइटमा मात्रै जहाज नाफामा नजाने बताए।

भने, ‘मान्छेमात्रै बोकेर प्लेन फाइदामा हुँदैन। माल बोक्नुपर्‍यो। के–के उत्पादन गर्नुहुन्छ? टनका टन माल बोकेर जानुपर्‍यो।’

विमानस्थल बनिसकेपछि पोखराका हालका सडक उपयुक्त नहुने, हालकै होटलले व्यापार गर्न नसक्ने बताए। सडकलगायत पूर्वाधार स्तरीय बनाउन तयारी थालिहाल्नुपर्ने आवश्यकता उनले औंल्याए। सडकको कुरा पोखरा विमानस्थलसँग सम्बन्धित भएपनि आफ्नो जिम्मा नभएको उनले जनाए। त्यसका लागि आवश्यक परे आयोजना, प्रदेश र स्थानीतहबीच समन्वय गर्ने संयन्त्र बनाउनपर्ने उनले बताए।

मन्त्री भट्टराईले पोखरा विमानस्थल राष्ट्रिय गौरवको आयोजना भएकाले हरेक दिन अनुगमन भइरहने बताए। उनका अनुसार अध्यागमनले ग्राउन्ड ह्यान्डलिङ, भिसा जाँच, कस्टम लगायतका लागि आवश्यक तयारी गरेको छ।

प्रकाशित : भाद्र ११, २०७६ १४:२९
पूरा पढ्नुहोस्
प्रतिक्रिया
पठाउनुहोस्