चट्याङले ट्रान्सफर्मरमा क्षति, १२ घण्टादेखि गोरखामा विद्युत सेवा अवरुद्घ
गोरखा — सोमबार साँझको चट्याङले गोरखा सदरमुकामस्थित सव स्टेशनको ट्रान्सफर्मरमा क्षति पुर्याएपछि १२ घण्टा यता गोरखाको विद्युत सेवा अवरुद्घ भएको छ ।
झण्डै २० हजार ग्राहक विद्युत सेवाबाट वन्चित भएका छन् । ‘६/८ एमभिए क्षमताको पावर ट्रान्सफर्मरमा समस्या आएको छ,’ प्राधिकरणका प्राविधिक कृष्ण कँडेलले भने । सोमबार साझँबाटै मर्मतको प्रयास भइरहेपनि समस्या पहिचान भइसकेको छैन ।
विद्युत प्राविधिकरण पोखरा ग्रिडका प्राविधिकहरु वोलाएर मर्मत थालिएको उनले बताए । ‘यदि ट्रान्सफर्मर नै जलेको हो भने हेटौँडाबाट नयाँ ट्रान्सफर्मर ल्याउनुपर्छ, एक दुइ दिन लाग्ला,’ उनले भने, ‘अर्थिङमा समस्या रहे मर्मत गरेर साझसम्म विद्युत सेवा सुचारु गर्छौ ।’
३३/११ केभि प्रसारण लाइन उत्त सव स्टेशनमा जोडिएको छ । उक्त सव स्टेशनबाट वितरण भएको खोप्लाङ, महेन्द्र ज्योति र नयाँबजार गरी तीन फिडरबाट विद्युत सेवा वितरण हुन सकेको छैन ।
गोरखा सदरमुकाम लगायत ग्रामिण भेगसम्म विद्युत सेवा अवरुद्घ हुदाँ सरकारी कार्यालय, बैंक तथा वित्तिय संस्थाको कामकाज समेत प्रभावित वनेको छ । अधिकाशं रेडियो बन्द छन् । स्थानीय पत्रपत्रिका प्रकाशित भएका छैनन् ।