मदिराले मात्तिएपछि एनआरएनए अध्यक्ष विमानबाटै निकालिए 

कान्तिपुर संवाददाता

काठमाडौँ — मदिराले मात्तिएर विमान प्रवेश गरेका गैरआवासीय नेपाली संघका अध्यक्ष भवन भट्ट र सनत न्यौपानेलाई सिल्क एयरले शनिबार बेलुकी डिपोर्ट (निष्कासन) गरेको छ । दुवै जना प्रधानमन्त्री केपी शर्मा ओलीलाई भेट्न उडान नम्बर एमआई४१३ मार्फत सिंगापुर जाँदै थिए ।

ZenTravel

अध्यक्ष भट्टको नेपाली कम्पनीका सल्लाहकार न्यौपानेले आफ्नो फेसबुकमा राखेको अडियो अनुसार जहाजमा बसिसकेपछि कमान्डर पाइलटले ‘म तपाईंहरुलाई लिएर जहाज उडाउन सक्दिनँ’ भनेका थिए ।

Meroghar

विमानस्थल स्रोतका अनुसार दुवै जना मदिराले अत्यधिक मातेको भन्दै सिल्क एयरले प्रहरीको सहयोग लिएको थियो । ‘जहाजबाट निकाल्न सहयोग गरिदिनुपर्‍यो भनेपछि हाम्रो प्रहरी जहाजको भर्‍याङसम्म पुगेको थियो,’ प्रहरी स्रोतले भन्यो, ‘उहाँहरु दुबैलाई जहाजबाट निकाली अध्यागमनमा डिपार्चर क्यान्सिल गराएर प्रहरीले टर्मिनल भवनबाहिर निकालेको थियो ।’

त्रिभुवन अन्तर्राष्ट्रिय विमानस्थलका एक उच्च अधिकारीका अनुसार डिएसपी राजन चापागाईंले विमानस्थलको सम्पर्क केन्द्र मानिने टर्मिनल ड्युटी अफिसलाई जानकारी गराएका थिए । कुनै पनि उडानमा यात्रुले शंकास्पद क्रियाकलाप गरे वा मदिराले मातिएको भेटिए क्याप्टेनले जहाजबाट निकाल्न सक्ने अधिकार अन्तर्राष्ट्रिय उड्डयन संगठनले प्रत्यायोजन गरेको छ । शनिबार काठमाडौंबाट ९ बजेर ५० मिनेटमा उड्नुपर्ने उक्त उडान सोही कारण ५७ मिनेट ढिलो उडेको थियो ।

न्यौपानले शनिबार दुवै जना कुनै बिजनेस मिटिङमा भएका बेला प्रधानमन्त्रीलाई स्वास्थ्यलाभको कामना गर्न सिंगापुर जाने योजना बनेको अडियोमा भनेका छन् । उनका अनुसार सिंगापुर पुगेर प्रधानमन्त्रीसँग भेटघाटसँगै अर्को बिजनेस बैठक पनि तय भएको थियो ।
दुबैले सिल्कको बिजनेश श्रेणीको टिकट लिएका थिए । इकोनमी श्रेणीको दाँजोमा झण्डै दोब्बर महँगो हुने उक्त टिकटमा काठमाडौं विमानस्थलमा र्‍याडिसन होटलको लाउन्ज निःशुल्क प्रयोग गर्न पाइन्छ । उक्त लाउन्जमा मदिरा र खानपान गरेको पैसा तिर्नुपर्दैन । अध्यागमनको जाँच सकिएपछि लाउन्जमा जान सकिन्छ । दुबै जनाले त्यहीँ मदिरापान गरेका थिए । लाउन्जको खर्च एयरलाइन्सको हुन्छ ।
काठमाडौंस्थित एयरलाइन्स स्रोतले यस घटनाबारे सिंगापुरमा रहेको मुख्यालयले चाँडै विज्ञप्ति जारी गर्ने जनाएको छ । कतिपय एयरलाइन्सले मदिराका कारण दुर्व्यवहार गर्ने कर्मचारीलाई सदाका लागि आफ्नो एयरलाइन्सको उडानमा रोक लगाउने नियम पनि बनाएका हुन्छन् । न्यौपानेले अडियोमा आफूहरुलाई ब्रेथलाइजरको प्रयोग नगरी निस्कासन गरिएकाले सिल्क एयरले अपमान गरेको अडियोमा आरोप लगाएका छन् ।

पाइलटले लिखित रुपमै निस्कासन गरेका भट्ट र न्यौपानेले टिकट फिर्ताका लागि सिल्क एयरको काठमाडौंस्थित कार्यालयमा निवेदन दिएका छन् । तर, एयरलाइन्सले हेडक्वार्टरको निर्णय पर्खिरहेको छ ।

प्रकाशित : भाद्र ८, २०७६ २१:५६
प्रतिक्रिया
पठाउनुहोस्
ADVERTISEMENT
ADVERTISEMENT

१२ महिनामा भित्रियो पौने ९ खर्ब रेमिट्यान्स

गत वर्षको रेमिट्यान्स आप्रवाह सोही अवधिको कुल गार्हस्थ्य उत्पादनको अनुपातमा करिब २५ प्रतिशत मात्र हो । यसअघि यस्तो अनुपात २९ प्रतिशतसम्म पुगेको थियो ।
यज्ञ बञ्जाडे

काठमाडौँ — गत आर्थिक वर्षमा रेमिट्यान्समार्फत पौने ९ खर्ब रुपैयाँ मुलुक भित्रिएको छ । अघिल्लो वर्षको तुलनामा गत वर्ष नेपाल भित्रिएको रेमिट्यान्स करिब १५ प्रतिशतले बढेको हो । आर्थिक वर्ष ०७४/७५ मा ७ खर्ब ५५ अर्ब रुपैयाँ बराबर रेमिट्यान्स नेपाल आएको थियो । अघिल्लो वर्षको तुलनामा गत वर्ष साढे ८ प्रतिशतको वृद्धि भएको हो । 

गत आर्थिक वर्षका सुरुका महिनामा रेमिट्यान्स वृद्धिदर उच्च भए पनि पछिल्ला महिनामा निरन्तर रूपमा घटदै गएको थियो । सोही क्रममा असारसम्म आइपुग्दा रेमिट्यान्स वृद्धिदर १५ प्रतिशतको हाराहारीमा बसेको छ । यसको अर्थ अघिल्लो आर्थिक वर्षको तुलनामा गत वर्ष थप १ खर्ब रुपैयाँभन्दा केही बढी रकम रेमिट्यान्समार्फत नेपाल आएको हो ।

गत आर्थिक वर्षको अघिल्ला तीन महिना (साउन, भदौ र असोज) मा लगातार बढेको रेमिट्यान्स वृद्धिदर त्यसपछिका महिनामा घटेको हो । खासगरी अमेरिकी डलरको मूल्यमा आएको गिरावटसँगै, बैंक तथा वित्तीय संस्थामा निक्षेपको ब्याजदर घटेकाले गत मंसिरपछि रेमिट्यान्स वृद्धिदर पनि घटेको जानकारहरू बताउँछन् ।

गत वर्षको रेमिट्यान्स आप्रवाह सोही अवधिको कुल गार्हस्थ्य उत्पादन (जीडीपी) को अनुपातमा करिब २५ प्रतिशत मात्र हो । यसअघि यस्तो अनुपात जीडीपीको २९ प्रतिशतसम्म पुगेको थियो ।

निर्यात, पर्यटनलगायत बाह्रय क्षेत्र अपेक्षित रूपमा विकास हुन नसकेको बेला विदेशी मुद्राको प्रमुख स्रोत रेमिट्यान्स मात्र बनेको छ । विगतमा व्यापार घाटा भन्दा रेमिट्यान्स आप्रवाह धेरै रहेको अवस्था थियो । त्यतिबेला व्यापार घाटाको कमीलाई रेमिट्यान्सले क्षतिपुर्ति गरेकाले चालू खाता र शोधानान्तरमा चाप परेको थिएन ।

केही वर्षयता परिस्थिति बदलिएको छ । व्यापारघाटा अकासिएको छ । रेमिट्यान्स वृद्धिदर घटदो छ । गएका दुई वर्षका प्रायः सबै महिना चालु खाता र शोधनान्तर ऋणात्मक हुनु यसैको प्रभाव भएको अर्थविदहरू बताउँछन् ।
रोजगारीका लागि बिदेसिने नेपालीको संख्या घट्नुका साथै सरकार नागरिकलाई विदेशी विनिमय सटही सुविधमा कडाइ गरेकाले अपेक्षित रूपमा रेमिट्यान्स बढ्न नसकेको राष्ट्र बैंकका पूर्वकार्यकारी निर्देशक नरबहादुर थापाले बताए । ‘विगतका वर्षमा कामका लागि मेलेसिया, दुबई, कतारलगायत राष्ट्र जाने नेपाली धेरै थिए,’ उनले भने, ‘अहिले परिस्थिति बदलिएको छ, जापान, अस्ट्रेलिया, अमेरिकालगायत ठूला राष्ट्रमा अध्ययन भिसामा जाने नेपाली धेरै छन् ।’ उनीहरूले अध्ययनसँगै काम पनि गर्ने भएकाले पछिल्ला वर्षमा अमेरिकालगायत राष्ट्रबाट मुलुक भित्रिने रेमिट्यान्स बढेको उनको भनाइ छ ।

‘जीडीपीको अनुपातमा रेमिट्यान्स २५ प्रतिशत छ, यो गत वर्षकै हाराहारीमा हो, अब योभन्दा तल जानु हुँदैन,’ उनले भने ।

एकातिर डलरको विनिमय दर घटेको तथा नेपालमा पनि बैंक ब्याजदर बढ्न नसक्दा रेमिट्यान्स वृद्धिदरमा कमी आएको जानकारहरू बताउँछन् । यसअघि ब्याजदर उच्च हुँदा राम्रो प्रतिफल कमाउने आशले आएको रेमिट्यान्स अहिले ब्याजदर कम भएकाले केही घटेको हुन सक्ने उनीहरूको अनुमान छ ।

गत आर्थिक वर्ष वैदेशिक रोजगारीमा जाने नेपालीको संख्या ३७.३ प्रतिशतले घटेको छ । रोजगारीका लागि अन्तिम श्रम स्वीकृतिका आधारमा उक्त तथ्यांक निकालिएको हो । अघिल्लो वर्षको सोही अवधिमा यस्तो संख्या ८.२ प्रतिशतले घटेको थियो । सो अवधिमा पुनः श्रम स्वीकृतिका आधारमा वैदेशिक रोजगारीमा जाने नेपालीको संख्या ५.४ प्रतिशतले बढेको देखिन्छ । अघिल्लो वर्षको सोही अवधिमा यस्तो संख्या १.३ प्रतिशतले घटेको थियो ।

नेपाल भित्रने रेमिट्यान्समध्ये करिब ७० प्रतिशतभन्दा बढी खाडी मुलुकबाट आउने गरेको छ । खाडी राष्ट्रहरूमध्ये पनि साउदी अरब, कतार, कुवेत, युनाइटेड अरब इमिरेट्स (दुबई) र बहराइनबाट मात्र उक्त रकम नेपाल भित्रिएको हो । सो क्षेत्रका सदस्य राष्ट्र ओमनबाट औपचारिक माध्यमबाट रेमिट्यान्स भित्रने गरेको छैन ।

हाल परिस्थिति बदलिएको छ । पछिल्ला एक/डेढ वर्षयता साउदी र कतारको हिस्सा घट्दै छ भने मलेसियाको अंश केही बढ्न थालेको तथ्यांहरूमा देख्न सकिन्छ ।

यस्तै हाल नेपाल भित्रिने रेमिट्यान्समध्ये सबैभन्दा धेरै अमेरिकाबाट आएको छ । विगतमा अर्थतन्त्रका हिसाबले ठूला र धेरै कमाइ हुने भनिएका राष्ट्र (जापान, दक्षिण कोरिया, अस्ट्रेलिया, क्यानडा, अमेरिका आदि) बाट निकै कम मात्र रेमिट्यान्स आउने गरेको थियो । दुई वर्षअघिको राष्ट्र बैंकको एक प्रतिवेदनमा जापान, दक्षिण कोरिया, अस्ट्रेलिया, क्यानडा, अमेरिकालगायत ठूला राष्ट्रबाट कुल रेमिट्यान्सको करिब १२ प्रतिशत मात्र भित्रँदै आएको देखाएको छ ।

अघिल्लो आर्थिक वर्ष भारतबाट मात्र सवा खर्ब रुपैयाँ रेमिट्यान्स नेपाल भित्रिएको थियो । गत वर्ष पनि त्यत्तिकै अनुपातमा भारतबाट नेपाल रेमिट्यान्स आएको छ । गत आर्थिक वर्ष भारतबाट आएको रेमिट्यान्स सोही अवधिको कुल रेमिट्यान्सको करिब १५ प्रतिशत हो । गत वर्ष करिब साढे १ खर्ब रुपैयाँ बराबर रेमिट्यान्स भारतबाट मात्र आएको देखिन्छ । राष्ट्र बैंकको तथ्यांकअनुसार गत वर्ष बैंकिङ प्रणाली (बैंक तथा वित्तीय संस्था र रेमिट्यान्स कम्पनी) बाट मात्र ७ खर्ब २८ अर्ब रुपैयाँ रेमिट्यान्स नेपाल आएको छ । भारतबाट बैंकिङ प्रणालीबाट थोरै मात्र रेमिट्यान्स आउँछ । बाँकी अरू प्रणालीबाट आउँछ । राष्ट्र बैंकले विभिन्न विधिबाट भारतबाट आउने रेमिट्यान्सको अनुमान गर्दै आएको छ ।

प्रकाशित : भाद्र ८, २०७६ २१:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×