मधेससँग 'लभ' परेको बताउँदै दाहालले मधेसवासीलाई आश्वासन बाँडे - 'समृद्धि र विकासको प्याकेजसहित प्रधानमन्त्री र म आउँदै छौं'

अजित तिवारी

जनकपुर — नेकपाका अध्यक्ष पुष्पकमल दाहालले समृद्धि र विकासको प्याकेजसहित प्रधानमन्त्री केपी शर्मा ओलीसँगै आफू छिट्टै तराई-मधेसमा आउने आश्वासन बाँडेका छन् । सोमबार धनुषाको बरमझियामा आयोजित सहिद रामवृक्ष यादवको स्मृति सभामा बोल्दै दाहालले तराई-मधेसको विकासमै पहाडको पनि समृद्धि जोडिएको बताए । 

मधेसको समस्याबारे प्रधानमन्त्रीसँग छलफल भएको बताउँदै दाहालले बाढीको क्षति न्यूनिकरण, सुक्दै गएको जलाधार, आगलागी, डुबानको समस्या हटाउन 'मास्टर प्लान' आवश्यक रहेको बताए । ‘यी सबै समस्याको दीर्घकालीन समाधान हुनुपर्छ । चुरेको संरक्षणको मास्टर प्लान नगरेसम्म तराईलाई जोगाउन सकिन्न,’ दाहालले भने, ‘जनता आवास, जनताको तटबन्ध, रेलमार्ग, हुलाकी मार्ग, फास्ट ट्र्याक, निजगढ अन्तर्राष्ट्रिय विमानस्थललगायतको परियोजनाले मधेस-तराईले विकासमा फड्को मार्छ । हामी दुवै अध्यक्ष विशेष प्याकेज लिएर तराई-मधेसमा आउँदैछौं । तराई-मधेसको समग्र विकासको खाका लिएर हामी छिट्टै आउँदैछौं ।’
जनयुद्धको पहिलो तालिम धनुषामै लिएको दाबी गर्दै दाहालले तराई-मधेससँग आफ्नो 'लभ' परेको प्रसंग कोट्याउँदै भने, ‘दोस्रो संविधानसभामा सिरहाबाट चुनाव जितेँ । प्रधानमन्त्री पनि बनेँ । त्यसैले मधेसको विकास र समृद्धि हाम्रो प्राथमिकतामा छ ।’ उनले तराई-मधेसको जनताले त्याग र बलिदानअनुसार प्रतिफल पाएका छन् कि छैनन्, त्यो महत्वपूर्ण विषय भएको बताउँदै प्रदेश २ सरकारको आलोचना पनि गरे । ‘प्रदेश २ मा भ्रष्टाचार बढ्यो, सुशासन छैन । जनताले झन दुःख पायो भनेर मैले सुनेको छु,’ दाहालले भने ।

को हुन रामवृक्ष ?
स्मृतिसभामा बर्सेनि शीर्ष नेता सहभागी हुने सहिद रामवृक्ष यादव तत्कालीन नेकपा (एकताकेन्द्र) का पोलिटब्यूरो सदस्य थिए । २०५१ भदौ २ गते धनुषाको बरमझियामा उनको हत्या भयो । नेपाल-भारतका पेशेवरबाट उनको हत्या भएको भनिएपनि पार्टीले यादवको हत्यामा कांग्रेसीहरु संलग्न रहेको आरोप लगाएको थियो ।

माओवादी जनयुद्ध २०५२ फागुनदेखि सुरु भएपनि बरमझियामा यादवकै सक्रियतामा सशस्त्र संघर्ष त्यसअघि नै थालियो । जनयुद्धको तयारी थालेका यादव सर्वहारा वर्गको नेतृत्व गर्थे । ०५१ साल भदौ १ गते संयुक्त जनमोर्चा नेपालले आह्वान गरेको बन्द कार्यक्रमबाट फर्किँदै गर्दा भदौ २ गते उनको गाउँ नजिककै कमला नहरमा हत्या गरियो ।

माओवादी जनयुद्धको क्रममा यादवको परिवारका चार सदस्यको मृत्यु भएको हो । उनका छोरा शेखर, ज्वाइँ डम्बरनारायण र अर्को नातामै पर्ने भाईसहित चारजना जनयुद्धकै लडाइँमा मारिए । यादवकी पत्नी रामकुमारीको संविधानसभाको समानुपातिक सदस्य रहेकै बेला काठमाण्डौंमा ग्यासको चुल्हो लिक भएर आगलागी हुँदा मृत्यु भएको थियो । रामवृक्षलाई मास्टरसाहेब भनेर पनि चिनिन्छ ।
रामवृक्षलाई सम्झिँदै नेकपाका अध्यक्ष दाहालले भने, ‘भजनकिर्तनबाट जनतासँग जोडिएको मास्टरसाहेब सरल, इमान्दार र लक्ष्यप्रति निष्ठावान थिए । उनको क्रान्तिकारी गीत र भाषणले तरंग ल्याउँथ्यो । उहाँलाई हामी मास्टरसाहेब भन्थ्यौं । उनी क्रान्तिकारी नेता थिए ।’ रामवृक्षको अघिल्लो स्मृतिसभामा प्रधानमन्त्री केपी ओली र नेकपा अध्यक्ष दाहाल बरमझिया पुगेका थिए । यसवर्ष, दाहालसँगै नेता नेपाल, मन्त्री मातृका यादव र रघुवीर महासेठ पनि सहभागी भए ।

प्रकाशित : भाद्र २, २०७६ १९:४१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

दाहालले भने, 'नेकपाको सरकार ५ वर्षसम्म, ओलीजी समझदारी अनुसार चल्नुहुन्छ'

अजित तिवारी

जनकपुर — नेकपाका अध्यक्ष पुष्पकमल दाहालले नेकपाको सरकार ५ वर्षसम्म रहने दाबी गर्दै प्रधानमन्त्री केपी शर्मा ओलीले ‘समझदारी’ अनुसार चल्नुपर्ने बताएका छन् । उनले समझदारीको आशय भने खुलाएनन् ।


‘नेकपाको सरकार ५ वर्षसम्म रहन्छ। यसमा कुनै दुविधा नै छैन,’ सोमबार जनकपुर विमानस्थलमा संवाददाताहरुसित कुरा गर्दै नेकपाका अध्यक्ष दाहालले भने, ‘सरकार पनि ५ वर्ष जान्छ। ओलीजी पनि समझदारीअनुसार चल्नुहुन्छ।’

धनुषाको बरमझियामा सहिद रामवृक्ष यादवको स्मृतिसभामा सहभागी हुन दाहाल नेकपाका वरिष्ठ नेता माधवकुमार नेपालसहित जनकपुर आएका हुन्।

‘सरकारको पहिलो कानुनी जटिलता थियो। छिट–छिटो विकास होस् भन्ने जनताको चाहना थियो,’ दाहालले भने, ‘सरकारले पहिलो वर्ष यी सबै आधार बनाएको छ। अब सरकार अगाडि बढ्छ।’

उनले समृद्ध नेपाल, खुशी नेपालीको अभियानलाई सरकारले अगाडि बढाउने बताए। ‘पार्टी एकतामा धेरै भ्रम छर्न खोजियो। तर हामीले पार्टी एकता टुंग्यिाएका छौं,’ दाहालले भने।

‘पार्टी एकता नगरेको भए हुन्थ्यो’ भनाईको अपव्याख्या गरिएको बताउँदै अध्यक्ष दाहालले भने, ‘मैले त्यसो भनेकै होइन। पार्टी एकता गरिसकेका हौं। अब विकल्प छैन भनेको हो। मिडियामा अपब्याख्या गरियो।’

आफूले बोलेको त्यो कार्यक्रममा पार्टीका महासचिव विष्णु पौडेल पनि उपस्थित रहेको र मिडियामा अपब्याख्या भएर आउँदा पौडेल पनि आश्चर्यमा परेको दाहालले सुनाए।

‘पार्टी एकता गर्नु गल्ती भयो भनेर प्रचार गरियो। जुन गलत हो,’ दाहालले भने, ‘पूर्व माओवादी, पूर्व एमाले भनेर माथापच्ची गर्नुको अब अर्थ छैन।’ दाहाल पत्नी सीतासहित जनकपुर आएका हुन्।

प्रकाशित : भाद्र २, २०७६ १२:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT