दुई सातामै उप्कियो कालोपत्र

कान्तिपुर संवाददाता

दमौली — तनहुँको छाब्दी मार्गमा गरिएको कालोपत्र दुई साता नपुग्दै भत्किएको छ । छाब्दीबराही मन्दिर जाने मुख्य मार्ग तीनै तहका सरकारको चार करोड रुपैयाँ लगानीमा कालोपत्र गरिएको थियो । ‘उपभोक्तासँग समन्वय नगरी सिधै ठेक्का दिइएको थियो । कालोपत्र धेरै दिन टिकेन,’ छाब्दी मार्ग उपभोक्ता समितिका अध्यक्ष मणिजंग बस्नेतले भने ।

बस्नेतले उपभोक्तासँग समन्वय नगरे पनि सडकको स्तरोन्नति हुँदा स्थानीय खुसी रहेको तर त्यो खुसी २ साता पनि नटिकेको बताए । वर्षायाममा हिलो र हिउँदमा धुलाम्मे हुने सडकमा कालोपत्र गरिएको थियो । झरी परिरहेका बेला कालोपत्र गरिएको स्थानीयले बताए । कमसल निर्माण सामग्री राखेर झुक्याइएको स्थानीय लक्ष्मी पन्तले बताइन् । ‘ठेकेदारले आँखामा छारो हाल्ने काम मात्रै गरे,’ उनले भनिन् ।
संघीय सरकारको १ करोड लगानीमा उक्त मार्गमा पहिलो चरणमा व्यास नगरपालिका–१ स्थित कुन्छाली गाउँदेखि व्यास नगरपालिका–१२ भड्खालासम्मको ८ सय मिटर कालोपत्र गरिएको थियो । भड्खालादेखि गौडापहरासम्म दोस्रो खण्डमा व्यास नगरपालिकाको २ करोड र गौडापहरादेखि छाब्दी मन्दिरसम्मको तेस्रो खण्डमा प्रदेश सरकारको एक करोड बजेटबाट कालोपत्र गरिएको हो ।

संघ र प्रदेशको बजेटबाट कालोपत्रे हुने सडकको ठेक्का डायमन्ड कन्स्ट्रक्सन प्रालि दमौलीले पाएको थियो । व्यास नगरपालिकाको ठेक्का जीएस कन्स्ट्रक्सन प्रालि दमौलीले पाएको थियो । जीएस कन्स्ट्रक्सनका प्रमुख आरसी पौडेलले मुख्य सडकमा जोडिएको शाखा सडकबाट लोड गाडी जबर्जस्ती लगिँदा भत्किएको बताए ।

प्रकाशित : श्रावण २७, २०७६ १९:१२
प्रतिक्रिया
पठाउनुहोस्

कांग्रेसले महाधिवेशन प्रतिनिधिलाई प्रशिक्षण दिने

कान्तिपुर संवाददाता

काठमाडौँ — कांग्रेसले महाधिवेशन प्रतिनिधिलाई लक्षित गरी प्रशिक्षण थाल्ने भएको छ । पार्टीको नीति अनुसन्धान तथा प्रशिक्षण प्रतिष्ठानले पहिलो चरणमा तीन वटा प्रदेशमा यस्तो प्रशिक्षण चलाउने भएको हो । दोस्रो चरणमा अन्य चार प्रदेशमा प्रशिक्षण गर्ने तयारी छ ।

प्रशिक्षणमा पार्टीको सांगठनिक संरचना, विधान र विशेषता, पार्टीको राजनीतिक, आर्थिक दृष्टिकोण, कम्युनिष्ट पार्टीको नेतृत्वमा रहेको सरकारको मुल्याङ्कन जस्ता सवालमा प्रशिक्षण दिइने तयारी भएको कांग्रेस केन्द्रीय कार्यालयद्वारा सोमबार जारी विज्ञप्तिमा उल्लेख छ ।

कांग्रेसका महाधिवेशन प्रतिनिधि पार्टीका अगुवा कार्यकर्ता हुन् । पार्टीको १३ औं महाधिवेशनमा निर्वाचित मुलकभरका प्रतिनिधिको संख्या करिब तीन हजार छ ।

उपसभापति विमलेन्द्र निधि नेतृत्वमा रहेको प्रतिष्ठानले गण्डकी प्रदेशको पोखरामा साउन ३१ र ३२ गते, प्रदेश ५ को भैरहवामा भदौ २ र ३ गते र भदौ ५ र ६ गते कर्णाली प्रदेशको सुर्खेतमा प्रशिक्षण गर्ने भएको हो । ‘प्रशिक्षणमा कांग्रेसका सदस्यहरुलाई जनतासंग कसरी आत्मीय सर्म्पक राख्ने भन्ने लक्ष्य पनि हो’ कांग्रेसको विज्ञप्तिमा छ । प्रशिक्षणको उद्घाटन कांग्रेस सभापति शेरबहादुर देउवाले गर्ने छन् ।

प्रकाशित : श्रावण २७, २०७६ १९:०४
पूरा पढ्नुहोस्
प्रतिक्रिया
पठाउनुहोस्