पानीका स्रोत र मुहान संरक्षणमा सबैको सहयोग महत्वपूर्ण : मन्त्री मगर 

कान्तिपुर संवाददाता

काठमाडौँ — प्रतिनिधिसभाको बुधबारको बैठकले ‘खानेपानी तथा सरसफाइ विधेयक, २०७५ माथि विचार गरियोस्’ प्रस्ताव सर्वसम्मतले स्वीकृत गरेको छ । यसअघि खानेपानीमन्त्री बीना मगरले सो प्रस्ताव बैठकमा प्रस्तुत गरेकी थिइन् ।

तस्बिर : अंगद ढकाल/कान्तिपुर

प्रस्तावका सम्बन्धमा सांसदले उठाएका जिज्ञासाको जवाफ दिँदै मन्त्री मगरले जनताका मौलिक अधिकार कार्यान्वयन गर्न तीनै तहका सरकारको जिम्मेवारी भएको बताइन्। उनले सङ्घीय सरकार आफ्नो अधिकारअन्तर्गत रहेर जिम्मेवार पूरा गर्न दृढ रहेको उल्लेख गर्दै पानीका स्रोत र मुहान संरक्षणमा सबैको सहयोग र भूमिका उत्तिकै महत्वपूर्ण हुने धारणा व्यक्त गरिन्।

मन्त्री मगरले मेलम्ची खानेपानी आयोजनामा सरकारले स्पीडमा काम गर्ने पनि बताइन्। सीएमसी कम्पनीका कारण केही समय काम अवरुद्ध भए पनि आयोजनामा रहेका समस्या केलाएर छिटो काम गरिने आश्वासन दिइन्। विगतका मन्त्रीले मेलम्चीप्रति उदासिनता देखाएको भन्दै आफूले त्यसलाई चिर्ने दाबी गरिन्।

सीमएसी कम्पनी टाट पल्टिनुमा आफू र नेपाल सरकारको कुनै भूमिका नभएको भन्दै उनले उक्त कम्पनीले नेपाल बाहेकका देशहरुमा पनि आयोजना अलपत्र पार्ने गरेको उल्लेख गरिन्।

बैठकमा ‘सेफगार्ड, एन्टी–डम्पिङ तथा काउण्टरभेलिङ विधेयक, २०७५’ र ‘औद्योगिक व्यवसाय विकास प्रतिष्ठान (पहिलो संशोधन) विधेयक,२०७६’ पारित गरियोस् भन्ने प्रस्ताव उद्योग, वाणिज्य तथा आपूर्तिमन्त्री मातृकाप्रसाद यादव राखेका थिए। उक्त विषय सभामुख कृष्णबहादुर महराले कार्यसूचीबाट हटाइएको जानकारी दिए। प्रतिनिधिसभाको अर्को बैठक यही साउन २३ गते १ बजे बस्नेछ।

प्रकाशित : श्रावण २२, २०७६ १६:५४
प्रतिक्रिया
पठाउनुहोस्

दिदीबहिनीको हत्या प्रयास गर्ने २ आरोपी पक्राउ

वसन्तप्रताप सिंह

बझाङ — थलारा गाउँपालिकाका २ महिलालाई हत्या गर्न खोज्ने २ जनालाई प्रहरीले प्रक्राउ गरेको छ । घटनामा संलग्न रहेको आरोपमा थलारा गाउँपालिका ६, सँडिलका सौरभ चौहान र प्रेम कडायतलाई प्रहरीले मंगलबार बिहान पक्राउ गरेको हो ।

घटनामा घाइते भएका दिदीबहिनीलाई उपचारको लागि एम्बुलेन्समार्फत नेपालगन्ज लैजाँदै । तस्बिर : वसन्तप्रताप सिंह

उनीहरुमध्ये १ जना गाउँ नजिकको जंगलमा लुकिरहेको अवस्थामा थलारामा र अर्को व्यक्ति जिल्ला बाहिर भाग्न लागेको अवस्थामा बैतडी र बझाङको सिमाना नजिक स्याडीमा पक्राउ परेको प्रहरी निरीक्षक ईश्वरीदत्त पाण्डेले बताए । उनीहरुले महिलालाई बलात्कार गर्न खोजेको र असफल भएपछि हत्याको प्रयास गरेको प्रहरीसमक्ष बयान दिएका छन् ।

‘मुख थुनेर बलात्कारको प्रयास गरेका रहेछन्’ डिएसपी सूर्यबहादुर केसीले भने, ‘उनीहरु छटपटाएर कराएपछि अपराधको पोल खुल्ने डरले ढुङ्गाले टाउकोमा हानेको र मोबाइलको कभरले घाँटी रेटेको खुल्न आएको छ । थप अनुसन्धान भइरहेको छ ।’ घटनाअघि दुवैले अत्यधिक मदिरा सेवन गरेको पाइएको केसीले बताए ।

केदारस्युँ गाउँपालिकाको झोतामा रहेको माइतीघरबाट थलारामा रहेको पोइलीघर जाँदै गरेका दिदीबहिनीको सोमबार साँझ ६ बजेतिर थलारा गाँउपालिकाको सँडिलनेर हत्या प्रयास भएको थियो । अभियुक्तद्वयले महिलाहरुमाथि जबर्जस्ती गर्न खोजेको स्थानीय महिलाहरुले देखेपछि हत्याको प्रयास गरेका थिए । घाँस काटिरहेको अवस्थामा टाढाबाट घटना भएको देखेका स्थानीय महिलाहरु चिच्याउन थालेपछि उनीहरु दुवैजना भागेका थिए । घाँटी रेटिएकी दिदीको अवस्था गम्भीर छ । उनीहरु दुवै जनालाई थप उपचारको लागि नेपालगन्ज रिफर गरिएको जिल्ला अस्पतालका डाक्टर मिलन रावलले बताए ।

गाउँमा त्रास
दिउँसै भएको यो घटनाले थलारा गाउँपालिकाभरी त्रास फैलिएको स्थानीयले बताएका छन् । यो घटनाका कारण यहाँका महिलाहरु एक्लैदुक्लै हिँड्डुल गर्न डराइरहेको स्थानीय बाबु सिंहले बताए । उनले भने, ‘मानिसहरु मेलापात जान पनि डराइरहेका छन् । दिनदहाडै यस्तो घटना होला भनेर कसैले कल्पना नै गरेको थिएन । हिँड्डुल गर्न पनि डराउनु पर्ने अवस्था आएको छ ।’

प्रकाशित : श्रावण २२, २०७६ १६:३५
पूरा पढ्नुहोस्
प्रतिक्रिया
पठाउनुहोस्