दूरसञ्चार प्राधिकरण अध्यक्षमा पुरुषोत्तम खनाल नियुक्त

पुस ११ मा दिगम्बर झाले प्राधिकरण अध्यक्ष पदबाट राजीनामा दिएपछि सरकारले वरिष्ठ निर्देशक पदमा कार्यरत खनाललाई निमित्त अध्यक्षको जिम्मेवारी दिएको थियो ।

लगत्तै सरकारले दूरसञ्चार नियमावली संशोधन गर्दै अध्यक्षको अधिकारसहितको कार्यकारी अध्यक्षको पद सिर्जना गरी खनाललाई नियुक्त गरेको थियो । दूरसञ्चार नियमावली संशोधन गरी बढीमा ६ महिनाको लागि कार्यकारी अध्यक्ष नियुक्त गर्न सकिने प्रावधान राखिएको छ ।

गत महिना सरकारले सञ्चार सचिव महेन्द्रमान गुरुङको संयोजकत्वमा अध्यक्ष पदको लागि सिफारिस समिति गठन गरेको थियो । समितिको सिफारिसमा मन्त्रिपरिषद्ले खनाललाई अध्यक्ष नियुक्त गरेको हो ।

दुई सचिव हेरफेर

यसैगरी सोमबार बसेको मन्त्रिपरिषद्को बैठकले सहरी विकास मन्त्रालयका सचिव रमेशप्रसाद सिंहलाई सरुवा गरेको छ । उनलाई जल तथा ऊर्जा आयोगको सचिवालयमा सचिवको रुपमा पठाइएको सरकारका प्रवक्ता बाँस्कोटाले जानकारी दिए ।

सिंहको स्थानमा मधुसुधन अधिकारीलाई सहरी विकास मन्त्रालय सरुवा गरिएको छ । उनी जल तथा ऊर्जा आयोगको सचिवमा कार्यरत थिए ।