माया जालमा पारी फिरौती माग्ने ४ पक्राउ

अर्जुन राजवंशी

बिर्तामोड — व्यवसायीलाई बन्धक बनाई फिरौती माग गरेको आरोपमा प्रहरीले एक भारतीय नागरिकसहित ४ जनालाई पक्राउ गरेको छ । झापाको बिर्तामोडमा फ्ल्याट भाडामा लिएर उनीहरुले व्यवसायीलाई बन्धक बनाई ४० लाख रुपैयाँ फिरौती माग गरेको प्रहरीको भनाई छ ।

घटनामा संलग्न रहेको आरोपमा बिर्तामोड नगरपालिका ४ का २९ वर्षीय मेराज खान, सोही वडाका २५ वर्षीय प्रकाश दास, इलाम फाकफोकथुम गाउँपालिका १ घर भई हाल बिर्तामोड २ चारपाने बस्ने २० वर्षीया रितु फियाक लिम्बू र भारत पश्चिम बंगालको दार्जिलिङ थाना खोरीबारी निवासी सञ्जु क्षेत्री भनिने सुजन शंकर पक्राउ परेका हुन् ।

उनीहरु चारै जनालाई इलाका प्रहरी कार्यालय बिर्तामोडले मंगलबार पत्रकार सम्मेलन गरी सार्वजनिक गरेको छ । उनीहरुलाई साउन ५ गते जिल्लाको चारआलीबाट नियन्त्रणमा लिएको जिल्ला प्रहरी कार्यालयका डीएसपी महेन्द्रकुमार श्रेष्ठले बताए । उनीहरुको साथबाट बा १५ च ७३३ नम्बरको एक थान कार, नक्कली पेस्तोल एक थान र लागूऔषध बरामद गरेको डीएसपी श्रेष्ठले बताए ।

पक्राउ परेका युवकहरुले युवतीको प्रयोग गरी बिर्तामोडका व्यवसायीलाई माया जालमा पारी बन्धक बनाएको बिर्तामोडका डीएसपी मोहन थापाले बताए । डीएसपी थापाका अनुसार सुजन शंकरले भारतको दिल्लीमा बसोबास गर्दै आएकी लिम्बूलाई बिर्तामोडमा बोलाएर उक्त व्यवसायीको फोन नम्बर उपलब्ध गराएका थिए ।

युवतीले आफू जया खान भएको बताउँदै असार २८ गतेदेखि व्यवसायीलाई इमो र मोबाइल फोनबाट नियमित रुपमा सम्पर्क गरेकी थिइन । युवतीले भिडियो तथा फोनकल मार्फत साउन १ गते साँझ साढे ७ बजे व्यवसायीलाई भेट्न बोलाएकी थिइन । भेटेपछि युवतीले व्यवसायीलाई बिर्तामोडस्थित भद्रपुर रोड कुमारी बैंकको पश्चिमपट्टी गल्लीभित्र एउटा घरको चार तलामा रहेको साथीको कोठामा लगेकी थिइन ।

युवतीले व्यवसायीलाई कोठामा लगेपछि घटनामा संलग्न भनिएका युवकहरु राति १० बजे हतियारसहित आएका थिए । उनीहरुले व्यवसायीलाई कुटपिट गरी कपडा खोल्न लगाई भिडियो समेत बनाएको डीएसपी थापाले बताए । युवकहरुले नांगो भिडियो सामाजिक सञ्जालमा भाइरल बनाईदिन्छु भन्दै व्यवसायीसँग ५० लाख रुपैयाँ माग गरेका थिए ।

५० लाख दिन नसक्ने बताएपछि व्यवसायीलाई उनीहरुले साउन ५ गतेभित्रमा ४० लाख रुपैयाँ दिनुपर्ने भन्दै छोडेका थिए । पीडित व्यवसायीले साउन ३ गते इलाका प्रहरी कार्यालयमा लिखित उजुरी दिएका थिए ।

पक्राउ परेकाहरुलाई अपहरण, शरिर बन्धक, फिरौती माग र लागूऔषध कसुरअन्तर्गत मुद्दा चलाउन लागेको डीएसपी थापाले बताए । पक्राउ परेकामध्ये सुजन शंकर ०७४ सालमा दुई जना महिलालाई जबरजस्ती यौन धन्दामा लगाएकोले मानव बेचविखन तथा ओसारपसार मुद्दामा जिल्ला अदालतबाट १० वर्ष कैद सजाय तोकिएकोमा हालसम्म फरार सूचीमा रहेको जिल्ला प्रहरी प्रमुख एसपी दिनेश मैनालीले बताए ।

प्रकाशित : श्रावण ७, २०७६ १८:३६
ADVERTISEMENT
प्रतिक्रिया
पठाउनुहोस्
ADVERTISEMENT

खलंगा ९ दिनदेखि अन्धकारमा

कान्तिपुर संवाददाता

जुम्ला — जुम्लाको सदरमुकाम खलंगा ९ दिनदेखि अन्धकारमा परेको छ । साना जलविद्युत उपभोक्ता समितिको पावरहाउसमा समस्या देखिएपछि विद्युत आयोजना सञ्चालनमा आउन सकिरहेको छैन ।

आयोजनाकोटर्बाइन जडानमा ठेकेदारले लापरबाही गरेको स्थानीयले बताएका छन् ।

सदरमुकामा विद्युत आपूर्ति बन्द भएको ९ दिन भएको छ। अझै पनि विद्युत कहिले बन्ने भन्ने निश्चित भएको छैन। भारतीय कम्पनीले डिजिटल मेसिन जडान गरी पूर्ण रुपमा सञ्चालनमा ल्याउन नसक्दा विगत लामो समयदेखि जुम्ला लोडसेडिङको मार खेप्दै आएको छ।

विद्युतको विकल्प नभएपछि केन्द्र र प्रदेश सरकार गुहार्नको लागि चन्दननाथ नगरपालिकाका उपप्रमुख अप्सरादेवी न्यौपाने महतको संयोजकत्वमा ९ सदस्यीय समिति गठन गरिएको छ।

नगरपालिकालाई लोडसेडिङ मुक्त बनाउनका लागि नगरपालिकाले झण्डै ३ करोड भन्दा धेरै रकम विद्युत अयोजनाहरुलाई लगानी गरेको छ। सहकारी मार्फत् निर्माण प्रक्रिया अन्तिम चरणमा रहेका ५० किलोवाटको घोडेन्ना जलविद्युत आयोजना र एक सय किलोवाटको ठिन्के जलविद्युतमा नगरपालिकाले लगानी गरिरहेको चन्दननाथ नगरपालिकाका प्रवक्ता अर्जुन सिंह कठायतले बताए।

‘साना जलविद्युतको मर्मत सम्भारको जिम्मा लिएको भारतीय कम्पनीका सबै कामदारहरु जिल्लाबाट गइसकेका छन्’ उनले भने, ‘ठेकेदार सम्पर्कमा आएपछि एक महिनामा विद्युत बन्ने छ भने यदी ठेकेदार सम्पर्कमै नआए मेसिन बन्ने अनिश्चित भैसकेकाले अब विकल्पको खोजी गर्न जरुरी छ।’

खलंगामा झण्डै ३ हजार उपभोक्ताहरु छन्। अहिले विद्युत नहुँदा सरकारी काममा समेत समस्या भएको छ।

प्रकाशित : श्रावण ७, २०७६ १८:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×