कर्णाली प्रदेशमा आवासीय विद्यालय खोल्ने तयारी

ज्योति कटुवाल

सुर्खेत — कर्णाली प्रदेश सरकारले साविक कर्णालीका ५ जिल्लामा आवासीय विद्यालय सञ्चालनमा ल्याउने भएको छ । आगामी तीन वर्षभित्र सञ्चालन हुने गरी चालु आर्थिक वर्षबाट काम सुरु गरिने सामाजिक विकास मन्त्रालयले जनाएको छ ।

हुम्ला, जुम्ला, मुगु, कालीकोट र डोल्पामा एक–एकवटा विद्यालय स्थापना गरिने सामाजिक विकासमन्त्री दल रावलले बताए । उनका अनुसार ती विद्यालयमा कक्षा ८ देखि १२ सम्म पढाइ हुनेछ । ‘भौगोलिक विकटताको कारण विद्यालय जान नसक्ने विद्यार्थीलाई लक्षित गरी यस्ता विद्यालय स्थापना गर्न लागिएको हो,’ उनले भने, ‘यसबाट विकट क्षेत्रका पिछडिएका, गरिब र दलित वर्गका विद्यार्थी लाभान्वित हुनेछन् ।’

साविक कर्णालीका कतिपय विद्यालयमा विद्यार्थी दैनिक ३–४ घण्टा पैदल हिँडेर अध्ययन गर्न जान्छन् । विद्यालय टाढा भएकै कारण विद्यार्थीले अध्ययन छोड्नुपर्ने बाध्यता पनि छ । मन्त्री रावलले आवासीय विद्यालय स्थापनापछि विपन्नताकै कारण शिक्षाबाट वञ्चित हुनुपर्ने अवस्थाको अन्त्य हुने बताए ।

मन्त्रालयले चालु आर्थिक वर्षमा प्रतिविद्यालय १ करोड रुपैयाँ विनियोजन गरेको छ । उक्त बजेटबाट अपाङ्गमैत्री, लैंगिकमैत्री विद्यालय र छात्रावास निर्माण हुनेछ । तीन वर्षभित्र निर्माणकार्य सम्पन्न गर्ने गरी काम थालिने मन्त्री रावलले बताए । उनका अनुसार ती विद्यालयमा करिब २ हजार विद्यार्थीले निःशुल्क आवाससहित अध्ययनको अवसर पाउनेछन् ।

मन्त्रालयले गत आर्थिक वर्षमै आवासीय विद्यालय स्थापनाका लागि १२ करोड रुपैयाँ विनियोजन गरेको थियो । काम भने हुन सकेन । मन्त्री रावलले निर्माणकार्य सुरु गर्नेगरी बजेट विनियोजन गरिए पनि पहिलो वर्ष अध्ययनको काम मात्र भएको बताए । आवासीय विद्यालय स्थापनाका लागि सम्भाव्यता अध्ययन भइसकेकाले चालु आर्थिक वर्षमा विद्यालय निर्माणको काम सुरु हुने उनले बताए ।

मन्त्रालयले विद्यालय शिक्षाको स्तर सुधार्न प्रदेशका ७९ वटै स्थानीय तहमा नमुना विद्याय स्थापनाको नीति पनि लिएको छ । नमुना विद्यालयका लागि छनोट भएका प्रत्येक विद्यालयलाई ५० लाख अनुदान दिइने मन्त्री रावलले बताए । यसका साथै मध्यमस्तरका प्राविधिक जनशक्ति उत्पादन गर्न प्रत्येक जिल्लामा एक/एकवटा बहुप्राविधिक विद्यालय पनि स्थापना गर्ने सरकारी नीति छ । ती विद्यालयमा स्वास्थ्य, निर्माण, पशु स्वास्थ्य, कृषिलगायत विषय अध्ययन हुने मन्त्री रावलले बताए ।

यसैबीच, सरकारले पर्वतीय विज्ञान तथा प्रविधि विश्वविद्यालय स्थापनाको तयारी पनि गरेको छ । यसका लागि चालु आर्थिक वर्षमा १ करोड रुपैयाँ विनियोजन गरिएको छ । मन्त्री रावलले पहिलो वर्ष सम्भाव्यता अध्ययनको काम हुने बताए ।

प्रकाशित : श्रावण ६, २०७६ ०९:४०
ADVERTISEMENT
ADVERTISEMENT
प्रतिक्रिया
पठाउनुहोस्

धनकुटामा मेडिकल कलेज खोल्ने प्रदेश सरकारको तयारी

साढे १६ करोड विनियोजन
रमेशचन्द्र अधिकारी

(धनकुटा) — धनकुटामा मेडिकल कलेज खुल्ने भएको छ । कलेज सञ्चालनका लागि प्रदेश एक सरकारबाट साढे १६ करोड रुपैयाँ विनियोजन गरिएको छ ।

पहिलो चरणमा साढे ४ करोड विनियोजन गरिएपनि पुनः अन्य बजेट थप गरिएको प्रदेश एकका आर्थिक मामिला तथा योजना मन्त्री इन्द्र बहादुर आङ्वोले जानकारी दिए। हावापानी र भौगोलिक रुपमा केन्द्रीय भागमा रहेकोले धनकुटामा मेडिकल कलेज स्थापना उपयुक्त रहेको मन्त्री आङ्वोको दाबी छ। बजेट विनियोजन भइसकेकोले अब जग्गा र भौतिक पूर्वाधारको व्यवस्थापन गरिने उनले बताए। बेलहारामा कालोपत्रे सडक शिलान्यासका क्रममा धनकुटा पुगेका मन्त्री आङ्वोले मेडिकल कलेजबारे जानकारी दिएका हुन्।

कलेजका लागि विभिन्न स्थानमा जग्गा व्यवस्थापन गर्ने कार्य भइरहेको जनाइएको छ। धनकुटा ७ चुलिबनस्थित नेपाल ट्रष्टको जग्गामा कलेजको भवन बनाउन उपयुक्त हुनसक्ने भन्दै अध्ययन भइरहेको प्रमुख जिल्ला अधिकारी सीताराम कार्कीले बताए। हालको जिल्ला अस्पताललाई स्तरवृद्धि गरी तत्काल १ सय शैय्या थप गरी कम्तिमा ३ सय शैय्या बनाउन लागिएको अस्पताल विकास समितिका अध्यक्ष तथा जिल्ला समन्वय समितिका संयोजक टंकबहादुर चुवानले जानकारी दिए। मेडिकल कलेजका लागि ५ सय शैय्यासम्म विस्तार गरिने जनाइएको छ।


प्रकाशित : श्रावण ६, २०७६ ०९:३५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×